Жаратылыу 11

Бабил къаласы

1Ол заманда битеу дунияны тили бир, сёзлери да бир эди. 2Кюн чыкъгъан жанына кёчюп бара, адамла Шинарны жеринде тюз жер тапхандыла да, анда жерлешип тохтагъандыла.

3Сора бир-бирлерине:

– Келигиз, кирпичле этейик да, аланы отда кюйдюрейик, – дегендиле.

Ала ташны орунуна кирпичле, тытырны орунуна да жер чайыр хайырланнгандыла.

4Сора:

– Келигиз, жер юсюне чачылып кетгенден эсе, кесибизге шахар бла бийиклиги кёкге жетген къала ишлейик да, атыбыз айтылып турурча этейик, – дегендиле.

5Раббий адам улула ишлей тургъан шахаргъа бла къалагъа къараргъа тюшгенди.

6Раббий:

– Ма, была бир халкъ болуп, барыны да тиллери бир болуп, ала былай этип башлагъандыла; энди ала не сюйселе да, эталлыкъдыла, – дегенди. – 7Тюшейик да, аланы тиллерин къатышдырып къойяыкъ, бир-бирлерини айтханларын ангыламасынла.

8Алай бла Раббий аланы андан битеу жер башына чачып ийгенди да, аланы шахар ишлеулери тохтагъанды.

9Ол себепден шахаргъа Бабил#11:9 Бабил деген сёзню магъанасы – «катышыу». деген ат берилгенди, нек дегенде, Раббий анда битеу дунияны тилин къатышдыргъанды эмда адамланы андан битеу жер башына чачып ийгенди.

Шемны Ибрамгъа дери туудукълары

10Шемны тукъум тарыхы буду.

Суу къыямадан сора эки жыл озгъанлай, Шем 100 жыллыкъ болгъанда, анга Арпакшад туугъанды. 11Арпакшад туугъандан сора, Шем 500 жыл жашагъанды, анга башха жашла бла къызла да туугъандыла.

12Арпакшад 35 жыллыкъ болгъанда, анга Шелах туугъанды. 13Шелах туугъандан сора, Арпакшад 403 жыл жашагъанды, анга башха жашла бла къызла да туугъандыла.

14Шелах 30 жыллыкъ болгъанда, анга Эбер туугъанды. 15Эбер туугъандан сора, Шелах 403 жыл жашагъанды, анга башха жашла бла къызла да туугъандыла.

16Эбер 34 жыллыкъ болгъанда, анга Пелег туугъанды. 17Пелег туугъандан сора, Эбер 430 жыл жашагъанды, анга башха жашла бла къызла да туугъандыла.

18Пелег 30 жыллыкъ болгъанда, анга Регу туугъанды. 19Регу туугъандан сора, Пелег 209 жыл жашагъанды, анга башха жашла бла къызла да туугъандыла.

20Регу 32 жыллыкъ болгъанда, анга Серуг туугъанды. 21Серуг туугъандын сора, Регу 207 жыл жашагъанды, анга башха жашла бла къызла да туугъандыла.

22Серуг 30 жыллыкъ болгъанда, анга Нахор туугъанды. 23Нахор туугъандан сора, Серуг 200 жыл жашагъанды, анга башха жашла бла къызла да туугъандыла.

24Нахор 29 жыллыкъ болгъанда, анга Терах туугъанды. 25Терах туугъандан сора, Нахор 119 жыл жашагъанды, анга башха жашла бла къызла да туугъандыла.

26Терах 70 жыллыкъ болгъанда, аны Ибрам, Нахор эм Аран атлы уланлары болгъандыла.

Терахны тукъум тарыхы бла Хараннга кёчгени

27Терахны тукъум тарыхы буду.

Терахны Ибрам, Нахор эм Аран атлы уланлары болгъандыла. Аранны Лут атлы уланы болгъанды. 28Аран, атасы Терах сау заманда, туугъан жеринде, къасдийлилени Ур деген шахарында ёлгенди. 29Ибрам бла Нахор кеслерине къатынла алгъандыла. Ибрамны къатыныны аты Сарай, Нахорну къатыныны аты Милка эди. Милка Исканы да туудургъан Аранны къызы эди. 30Сарай къаратон болуп, сабийи жокъ эди.

31Терах, къасдийлилени Ур шахарындан чыгъып, Кенанны жерине барыр ючюн, жолгъа чыкъгъанды. Ол уланы Ибрамны, Аранны уланы болгъан Лутну, уланы Ибрамны къатыны болгъан Сарай келинин да биргесине алгъанды. Алай а, Хараннга жетип, ала анда тохтагъандыла. 32Терахны ёмюрю 205 жыл эди. Терах Харанда ёлгенди.

Currently Selected:

Жаратылыу 11: МалкъСК

Highlight

Copy