Мисирден чыгъыу 7

1Раббий а Муссагъа былай айтханды:

– Къара, Мен сени фыргъаууннга Аллахны орунуна салгъанма, къарындашынг Харун а сени файхамбарынг боллукъду. 2Мен санга буюргъан затланы барысын да айтырыкъса. Къарындашынг Харун а, фыргъауун Исраил улуларын кеси къыралындан жиберир ючюн, анга айтырыкъды. 3Мен а фыргъауунну терсакъыл этерме эмда Мисирни жеринде кёп тамаша белгиле бла сейир ишле кёргюзтюрме. 4Фыргъауун сизге тынгыламаз. Сора Мен къолуму Мисирни юсюне салырма. Мисирни уллу азапха жолукъдуруп, халкъымы, Исраил улуларын, жыйын-жыйын этип, Мисирни жеринден чыгъарырма. 5Мен къолуму Мисирге жетдирип, Исраил улуларын андан чыгъаргъан заманымда, мисирлиле Мени Раббий болгъанымы билирле.

6Сора Мусса бла Харун алай этгендиле. Раббий алагъа буюргъанын толтургъандыла. 7Ала фыргъаууннга сёлешгенлеринде Мусса 80 жыллыкъ, Харун а 83 жыллыкъ эдиле.

Харунну аса таягъы жилян болады

8Раббий Муссагъа бла Харуннга былай айтханды:

9– Фыргъауун сизге: «Бир сейир иш кёргюзтюгюз», – десе, Мусса, сен Харуннга: «Аса таягъынгы алып, фыргъауунну аллына атып ий», – деп айт, ол а жилян болуп къалыр.

10Мусса бла Харун фыргъаууннга барып, Раббий буюргъанча этгендиле. Харун аса таягъын фыргъауунну эм аны къуллукъчуларыны алларына атып ийгенди, аса таякъ да жилян болуп къалгъанды. 11Фыргъауун да акъылманланы бла хыйнычыланы чакъыргъанды. Мисирни билгичлери да хыйнылары бла алай этгендиле. 12Аланы хар бири да кесини таягъын атып ийгенди, таякъла да жилянла болуп къалгъандыла. Харунну аса таягъы уа аланы таякъларын жутуп къойгъанды. 13Алай болгъанлыкъгъа, Раббийни айтханыча, фыргъауун терсакъыл болуп, алагъа тынгыламагъанды.

Биринчи палах: Нил суу къан болады

14Сора Раббий Муссагъа былай айтханды:

– Фыргъауун терсакъылды, халкъны жиберирге унамайды. 15Тамбла эрттенликде фыргъаууннга бар. Ма, ол суугъа чыгъарыкъды да, анга тюбер ючюн, Нил сууну боюнунда тур, жиляннга бурулгъан аса таягъынгы да къолунга ал. 16Анга сёлешип, былай айт: «Чюйютлюлени Раббий Аллахы: „Халкъымы жибер, ол Манга къуу жерде къуллукъ этсин“, – деп айтыргъа мени санга ийгенди. Сен а, ма, эндиге дери да тынгыламагъанса. 17Раббий былай айтады: „Мени Раббий болгъанымы ма мындан билирсе“. Мен къолумдагъы ма бу аса таякъ бла Нил сууну урурма да, суу къан болуп къалыр. 18Нилдеги чабакъ ёлюп къалыр, суу да аман ийис этер, мисирлиле суудан ичерге да болалмазла».

19Сора Раббий Муссагъа былай айтды:

– Харуннга айт: «Аса таягъынгы алып, Мисирни битеу сууларына: баргъан сууларына, илипинлерине, кёллерине эмда хар тюрлю суу тутхан орунларына – къолунгу узат, ала къан болуп къалсынла. Битеу Мисирни жеринде агъач орунлада да, таш орунлада да, суу къан болуп къалыр».

20Сора Мусса бла Харун Раббий буюргъанча этгендиле. Харун аса таягъын кётюрюп, фыргъауунну эм аны къуллукъчуларыны алларында, Нил сууну ургъанды да, битеу Нил суу къан болуп къалгъанды. 21Нилдеги чабакъ да къырылгъанды, суу да аман ийис этгенди, мисирлиле да Нилден суу ичерге болалмагъандыла. Битеу Мисирни жеринде суу къан болуп къалгъанды. 22Мисирни билгичлери да кеслерини хыйнылары бла алай этгендиле. Раббийни айтханыча, фыргъауун терсакъыл болуп, Муссагъа бла Харуннга тынгыламагъанды. 23Фыргъауун, айланып, юйюне кетгенди. Бу затха да эс бёлмегенди. 24Битеу мисирлиле, ичерге суу табар ючюн, Нил сууну къатында къуюла къазып башлагъандыла, нек дегенде, Нилни сууундан ичерге болалмай эдиле.

25Раббий сууну ургъандан сора, жети кюн толгъанды.

Currently Selected:

Мисирден чыгъыу 7: МалкъСК

Highlight

Copy