Мисирден чыгъыу 36

1Раббий Бесалелге бла Охолиабха эм битеу башха уста адамлагъа Сыйлы Жерни ишлерге хунерлик бла ангылаулукъ бергенди. Ала битеу бу ишни, тамам Раббий буюргъаны кибик, алай этсинле.

2Мусса, Бесалелни бла Охолиабны эмда Раббий хунерлик берген, фахмулу эмда ишлерге жюреклери тартхан битеу адамланы, ишни башларгъа чакъыргъанды.

3Ала, Исраил улулары, Сыйлы Жерни къураргъа келтирген битеу саугъаланы Муссадан алгъандыла. Халкъ а хар эрттен сайын анга кеси ыразылыгъындан саугъа келтириуюн тохтатмай эди. 4Ол заманда Сыйлы Жерни битеу ишлерин этген усталаны хар бири кесини ишин къоюп, Муссагъа келип:

5– Раббий буюргъан ишлеге халкъ кереклисинден да артыкъ келтиреди, – дедиле анга.

6Сора Мусса буйрукъ этди да, не эр киши, не тиширыу Сыйлы Жер ишлер ючюн энди бир тюрлю бир саугъа келтирмесин деп, къонушда хапар билдирдиле. Алай бла халкъны саугъа келтириую тохтатылды. 7Хазыр этилген затла битеу тамамланырыкъ ишлеге жете эдиле, артыкъ окъуна къала эдиле.

Сыйлы Мекямны къуралыуу

(Чыгъ. 26:1-37)

8Сыйлы Мекямны ишлеген устала аны он жабыудан этгендиле. Бесалел жабыуланы ийирилген иничге гетенден эмда кёк, къызгъылдым эм къызыл бетли къумачдан бичип, аланы уста ишленнген Керуб суратла бла жасагъанды. 9Хар жабыуну узунлугъу жыйырма сегиз къары, эни да тёрт къары эди. Битеу жабыуланы ёлчеую бир эди. 10Беш жабыуну ол бир-бирине жалгъагъанды, бирси беш жабыуну да бир-бирине къошханды. 11Биринчи къауум жабыуну къыйырында кёк бетли илгикле этгенди, бирси къауум жабыуну къыйырында да, алай. 12Биринчи къауумну биринчи жабыууна эмда бирси къауумну ахыр жабыууну къыйырына эллишер илгик тикгенди. Ол илгикле бир-бирлерине келише эдиле. 13Элли алтын ыргъакъ да ишлегенди, жабыуланы ыргъакъла бла бир-бирлерине жалгъап, алай бла Сыйлы Мекям бир сау мекям болгъанды.

14Андан сора, Сыйлы Мекямны жабар ючюн, эчки жюнден ишленнген онбир жабыудан чатыр къурагъанды. 15Хар жабыуну узунлугъу отуз къары, эни да тёрт къары эди. Онбир жабыуну да ёлчеую бир эди. 16Беш жабыуну энчи, алты жабыуну да энчи жалгъагъанды. 17Къыйырдагъы жабыуну бирси жабыугъа жалгъаннган этегинде элли илгик этгенди, бирси жабыугъа жалгъаннган жабыуну этегинде да элли илгик этгенди. 18Чатыр бир болур ючюн, аны жабыуларын жалгъаргъа да элли жез ыргъакъ салгъанды. 19Чатырны жабаргъа къызылгъа боялгъан къой териледен жабыу этгенди, аны юсюне да кёк сахтияндан жабыу сыргъанды.

20Сыйлы Мекямгъа къадаркъан агъачдан тюз сюелген илкичле да орнатханды. 21Хар илкични узунлугъу он къары, эни да бир къары бла жарым эди. 22Хар илкични бир-бирини тенгинде экишер илинмеги бар эди. Сыйлы Мекямны битеу илкичлерин ол алай сюегенди. 23Мекямны къыбыла жанына аллай жыйырма илкич этгенди. 24Жыйырма илкични тюплерине да кюмюшден къыркъ аякъ тюп, хар илкични тюбюню эки илинмегине уа экишер аякъ тюп ишлегенди. 25Сыйлы Мекямны бирси жанына, шимал жанына да жыйырма илкич 26эмда кюмюшден къыркъ аякъ тюп, хар илкинчи тюбюне экишер аякъ тюп ишлегенди. 27Сыйлы Мекямны кюн батыш, арт жанына уа алты илкич салгъанды. 28Мекямны арт жанында мюйюшлерине да эки илкич ишлегенди. 29Бу мюйюш илкичлени тюп жанлары энчи къалып, баш жанлары уа биринчи тогъайгъа жалгъаннган эдиле. Эки мюйюшню эки илкичин да алай этгенди. 30Сегиз илкич, хар илкични тюбюне экишер аякъ тюп ишленип, оналты кюмюш аякъ тюп бар эди.

31Сыйлы Мекямны бир жаныны илкичлерине къадаркъан агъачдан беш къурукъ, 32Мекямны бирси жаныны илкичлерине да беш къурукъ, мекямны арт жаныны – кюн батыш жаныны – илкичлерине да беш къурукъ ишлегенди. 33Илкичлени ортасындагъы аркъауну Сыйлы Мекямны бир къыйырындан бирси къыйырына ётдюргенди. 34Илкичлени алтын бла тышлагъан эди, къурукъла кийириллик тогъайланы да алтындан этип, къурукъланы да алтын бла тышлагъанды.

35Жабыуну да кёк, къызгъылдым эм къызыл бетли жюнден эмда согъулгъан иничге гетенден тикгенди, аны юсюн да уста ишленнген Керуб суратла бла жасагъанды. 36Жабыугъа къадаркъан агъачдан тёрт багъана ишлеп, алтын бла тышлагъанды; аны ыргъакълары да алтындан этилгендиле. Багъаналагъа кюмюшден эритип тёрт аякъ тюп къуйгъанды. 37Чатырны эшигине да кёк, къызгъылдым эм къызыл бетли жюнден эмда согъулгъан иничге гетенден накъышла салынып этилген жабыу, 38жабыугъа да ыргъакълары бла беш багъана этгенди. Аланы баш жанларын да, жалгъаннган жерлерин да алтын бла тышлагъанды эмда жезден эритип беш аякъ тюп къуйгъанды.

Currently Selected:

Мисирден чыгъыу 36: МалкъСК

Highlight

Copy