Мисирден чыгъыу 35

Шабат кюнню юсюнден жорукъла

1Сора Мусса, Исраил улуланы битеу жамауатларын жыйып, алагъа:

– Раббий фарыз этген затла быладыла:

2Алты кюн ишлегиз, жетинчи кюн а, сизге, сыйлы Шабат кюн, Раббийге багъышланнган ырахатлыкъ кюн болургъа керекди. Ол кюнде хар иш ишлеген адам ёлтюрюллюкдю. 3Шабат кюнде мекямларыгъызда от жандырмагъыз, – дегенди.

Сыйлы Мекямгъа керекли саугъала

(Чыгъ. 25:1-9; 39:32-43)

4Мусса, Исраил улуланы битеу жамауатларына былай айтды:

– Раббий фарыз этген зат ма буду:

5Арагъызда саугъала жыйып, Раббийге келтиригиз. Жюреги сюйген хар адам Раббийге саугъагъа алтын, кюмюш, жез, 6кёк, къызгъылдым эмда къызыл тюрсюнлю жюн, иничге гетен, эчки жюн, 7къызылгъа боялгъан къой териле, кёк сахтиян#35:7 Кёк сахтиян – неда «къонгур делфин териле»., къадаркъан агъач, 8чырахтаннга зейтун жау, майлау жау эм тютюн урдурур ючюн ариу ийисли затла, 9эфодну бла ёшюнлюкню жасар ючюн, оникс таш эм алына-салына туруучу асыл ташла.

10Арагъызда хунерли адамла бары да келип, Раббий буюргъан затланы барын да этсинле: 11Сыйлы Мекямны, аны чатырын бла тыш жабыуну, ыргъакъларын эм илкичлерин, аркъауларын, багъаналарын, аякъ тюплерин; 12Кюбюрню эм аны къурукъларын, Мархамат Жерни эмда бёлген жабыуну, 13столну эм аны къурукъларын бла битеу кереклерин эмда сыйлы ётмеклени, 14жарыкъ бериучю чырахтанны бла аны кереклерин, чыракъларын эмда жарытыр ючюн чыракъ жауну, 15ладан ийис чыгъарылыучу жерни эм аны къурукъларын, майлау жауну, ариу ийисли тютюн этиучю затланы, эмда Сыйлы Мекямны эшик жабыуун, 16толусунлай кюйдюрюлген къурман этилиучю жерни эм анга жез чалдишни, аны къурукъларын бла битеу кереклерин, къол-аякъ жууаргъа суу орунну эм аны аякъ тюбюн, 17арбазны жабыуларын, аны багъаналарын эм багъаналаны аякъ тюплерин эмда арбазны эшик жабыуун, 18Сыйлы Мекямны къазыкъларын, арбазны къазыкъларын эмда аланы жыжымларын, 19Сыйлы Жерде къуллукъ этилген заманда кийиллик кийимлени, дин къуллукъчу Харуннга сыйлы кийимлени эмда аны уланлары дин къуллукъчулукъ этген заманда киерик кийимлени этсинле.

20Сора Исраил улуланы битеу жамауаты Муссаны къатындан кетгенди. 21Бу ишге жюреги тартхан, кёлюн салгъан хар адам келип, Тюбешиу Чатырны къураугъа, анда жюрютюллюк битеу керек затланы ишине эмда сыйлы кийимлени тигерге Раббийге саугъала келтире эдиле. 22Битеу жюреклери тартханла, эр кишиле да, тиширыула да, келип, хар тюрлю алтын затларын, тюйреуючлерин, сыргъаларын, мухурларын, тагъылгъан затларын ташый эдиле. Ала алтынны Раббийге саугъагъа келтиргендиле. 23Кёк, къызгъылдым эм къызыл бетли жюню, иничге гетени эм эчки жюню, къызылгъа боялгъан къой териси эмда кёк сахтияны болгъан да, алай. 24Кюмюш неда жез бергенлени хар бири, муну Раббийге саугъагъа келтире эдиле. Чатырны ишине керек къадаркъан агъачы болгъан хар адам да аны келтире эди. 25Битеу хунерли тиширыула да кеси къоллары бла урчукъ ийире эдиле эмда ийирилген кёк, къызгъылдым, къызыл бетли халы, иничге гетен келтире эдиле. 26Урчукъ ийирирге хунерликлери болгъан тиширыула да, жюреклери тартханнга кёре, эчки жюн ийире эдиле. 27Бийле уа, эфодну бла ёшюнлюкню жасар ючюн оникс ташла бла салыныучу асыл ташла келтире эдиле, 28дагъыда, ариу ийисли затла эм чырахтаннга, майлау жаугъа эм ариу ийисли тютюннге жараулу зейтун жау келтире эдиле. 29Раббий Муссаны юсю бла буюргъан хар ишни этер ючюн, керек затланы келтирирге жюреклери тартхан Исраил улулары, хар эр киши эм тиширыу, кеси ыразылыкъларындан Раббийге саугъагъа келтире эдиле.

Бесалел бла Охолиаб устала

(Чыгъ. 31:1-11)

30Мусса Исраил улуларына:

– Къарагъыз, Раббий Яхуданы тайпасындан Хурну туудугъу, Урийни жашы Бесалелни сайлагъанды. 31Аны Аллахны Нюрюнден толтургъанды, эмда анга хунерлик, ангылаулукъ, билим эм хар тюрлю санагъат#35:31 Санагъат – жашауну, тёгерекде барлыкъны чыгъарма суратлау сыфатла бла кёргюзтмеклик; бир затны къол амал бла этиучю, профессионал иш; орус. – искусство, ремесло. усталыкъ бергенди. 32Алай бла ол алтындан, кюмюшден, жезден уста ишленнген затла этерикди, 33асыл ташланы жонуп, уяларына саллыкъды, агъач ишле эм хар тюрлю санагъат жумушда хунерин кёргюзтюрюкдю. 34Раббий анга эмда Данны тайпасындан Ахисамакны жашы Охолиабха башхаланы юйретиу фахму да бергенди. 35Хар тюрлю тужур салыу ишни, кёк, къызгъылдым эм къызыл бетли къумачланы эмда иничге гетен къумачланы уста согъуу эм накъышла тигиу ишни – хар тюрлю уста ишни ойлап этерге алагъа хунерлик бергенди.

Currently Selected:

Мисирден чыгъыу 35: МалкъСК

Highlight

Copy