Мисирден чыгъыу 33

Синай таудан тебирерге буйрукъ

1Раббий Муссагъа:

– Сен да, Мисирни жеринден чыгъаргъан халкъынг да былайдан атланыгъыз да, Мен Ибрахимге, Исхакъгъа, Якъупха ант этип: «Аны сени туудукъларынга берликме», – деген жериме барыгъыз. 2Сени аллынгда Мёлек иерме да, кенанлыланы, аморлуланы, хитлилени, перизлилени, хивлилени, эбуслуланы къыстарма. 3Алайды да, сют бла бал баргъан жерге барыгъыз. Сиз терсбоюн халкъсыз да, сизни жолда жоюп къоймаз ючюн, Кесим сизни арагъызда бармам, – деп айтханды.

4Халкъ, бу къаты сёзню эшитгенде, сыйыт этип башлагъанды эм биреу да жасаныучу затларын#33:4 Жасаныучу затла – алтын-кюмюш эм башха омакъ затла. такъмагъанды. 5Нек дегенде, Раббий Муссагъа:

– Исраил улулагъа айт: «Сиз терсбоюн халкъсыз. Мен сизни бла бир такъыйкъа окъуна барсам, сизни жокъ этип къоярыкъ эдим. Алай бла юсюгюзден жасаныучу затларыгъызны тешигиз, сизге не этеригими билеме», – деген эди.

6Ол себепден Хореб тауну къатында Исраил улулары жасаныучу затларын тешген эдиле.

Тюбешиу Чатыр

7Мусса къонушдан тышында, узакъда бир Чатыр къуруп салыучу эди. Анга «Тюбешиу Чатыр» дей эди. Раббийни оноуун излеген хар адам, къонушдан тышында тургъан Тюбешиу Чатыргъа келе эди. 8Мусса ол Чатыргъа барыргъа чыкъгъан заманда, битеу халкъ къоба эди эмда хар ким кеси чатырыны эшик аллында сюелип, Мусса чатыргъа киргинчи, аны ызындан къарап тура эди. 9Мусса чатыргъа кирген заманда уа, булут чигинжи энип, чатырны эшик аллында сюелип тура эди, эмда Раббий Мусса бла сёлеше эди. 10Чатырны эшик аллында тургъан булут чигинжини кёргенлеринде, халкъ битеу къоба эди эмда хар бири кеси чатырыны эшик аллында сежда эте эди. 11Раббий Мусса бла, адам шуёху бла сёлешгени кибик, бетден бетге сёлеше эди. Мусса къонушха къайтхан заманында, аны жаш жумушчусу Нунну жашы Ешуа чатырдан кетмей эди.

Мусса Раббийни аламатлыгъын кёреди

12Мусса Раббийге:

– Ма, Сен манга: «Бу халкъны жюрют», – дейсе. Алай болгъанлыкъгъа, Мени бла бирге кимни иеригинги билдирмединг. Сен манга: «Атынгы айтып чакъырама, сен Мени кёз аллымда ыразылыкъ тапханса», – деп айтхан эдинг. 13Тилейме Сенден, кёз аллынгда ыразылыкъ тапхан эсем, мен Сени билир ючюн эм мындан ары да кёз аллынгда ыразылыкъ табып турур ючюн, манга жолунгу билдир. Бу миллет да Сени халкъынг болгъанын эсингде тут, – деп айтханды.

14– Сени бла бирге Кесим барлыкъма эмда сени ырахатлыкъгъа тюбетирикме, – деди Раббий Муссагъа.

15– Биргебизге Кесинг бармасанг, бизни былайдан чыгъаргъан да этме, – деди Мусса. – 16Мен да, бу халкъынг да Сени кёз аллынгда ыразылыкъ тапханыбыз, Сен бизни биргебизге баргъанынг бла билинмесе, не бла билинир? Алай болса мен да, бу халкъынг да жер башында хар халкъдан да айырма халкъ болурбуз.

17– Бу айтханынгы да этерме, – деди Раббий Муссагъа. – Сен Мени кёз аллымда ыразылыкъ тапханса, Мен сени атынгы айтып чакъырама.

18– Тилейме, аламатлыгъынгы манга кёргюзт! – деди Мусса.

19– Мен битеу аламатлыгъымы сени аллынг бла ётдюрюрме эмда аллынгда «Раббий» атымы ачыкъларма, – деди Раббий. – Мархамат этерге сюйгениме мархамат этерме, жазыкъсынырыгъа сюйгениме жазыкъсынырма.

20Дагъыда:

– Санга Мени бетими кёрюрге жарарыкъ тюйюлдю. Инсан Мени кёрсе, сау къалыр амалы жокъду, – деди.

21Сора Раббий былай айтды:

– Ма, Манга жууукъ бир жер барды. Алайда, къая башында тур. 22Мени аламатлыгъым ётюп баргъан заманда, Мен сени къая жарылгъан жерге салырма да, Мен озуп кетгинчи, сени къолум бла жабарма. 23Сора къолуму юсюнгден алырма да, Мени сыртымдан эслерсе, бетим а кёрюнюрюк тюйюлдю.

Currently Selected:

Мисирден чыгъыу 33: МалкъСК

Highlight

Copy