Мисирден чыгъыу 31

Бесалел бла Охолиаб устала

(Чыгъ. 35:30–36:1)

1Раббий Муссагъа былай айтханды:

2– Къара, Мен Яхуданы тайпасындан Хурну туудугъу, Урийни жашы Бесалелни сайлагъанма. 3Мен аны, Аллахны Рухундан толтургъанма, анга хунерлик, ангылаулукъ, билим эм хар тюрлю усталыкъ бергенме. 4Алтын, кюмюш, жез затла ишлерге, 5салынырыкъ асыл ташланы жонаргъа, хар тюрлю агъач усталыкъ этерге хунерлик бергенме. 6Дагъыда, ма, анга болушлукъчу этип, Данны тайпасындан Ахисамакны жашы Охолиабны сайлагъанма. Мен битеу усталагъа да хунерлик бергенме. Ала Мен санга буюргъан затланы барысын да этерле. 7Ала Тюбешиу Чатырны да, Шагъатлыкъ Кюбюрню да, аны жапхан Мархамат Жерни да, Чатырны битеу кереклерин да, 8столну да, аны кереклерин да, сырма алтындан ишленнген чырахтанны да, аны битеу кереклерин да, ладан ийис чыгъарылыучу жерни да, 9толусунлай кюйдюрюлген къурман этилиучю жерни да, аны битеу кереклерин да, къол-аякъ жууаргъа суу орунну да, аны тюбюн да, 10ариу согъулгъан кийимле да – дин къуллукъчу Харуннга эм аны уланларына сыйлы кийимле – ала дин къуллукъчулукъ этер ючюн, 11Сыйлы Жерде къуллукъгъа керекли майлау жау да, кюйдюрюлюп ариу ийис чыгъарыучу затла да этерле. Ала барын да, Мен санга буюргъанымча, алай этсинле.

Шабат кюнню тутуу

12Сора Раббий Муссагъа сёлешип, былай айтханды:

13– Исраил улуларына айт:

Шабат кюнлерими тутугъуз. Сизни сыйлы этиучю Раббий Мен болгъанымы сиз билир ючюн, бу тёлюден тёлюге Мени бла сизни арабызда белгиди. 14Шабат кюнню тутугъуз: ол сизге сыйлыды. Аны харам этген адам ёлтюрюлсюн. Шабат кюн иш этген адам ёз халкъындан жокъ этилсин. 15Алты кюн ишлеригизни этигиз, жетинчи кюн а Раббийге берилген сыйлы шабатды – саулай ырахатлыкъ кюндю. Шабат кюн иш этген адам, ким болса да, ёлтюрюлсюн. 16Исраил улулары шабат кюнню тутсунла, тёлюден тёлюге шабат кюнню байрамын этсинле. Бу – ёмюрлюк кесаматды. 17Бу – Мени бла Исраил улуларыны арабызда ёмюрлюк белгиди. Нек дегенде, Раббий кёкню бла жерни алты кюнню ичинде болдургъанды, жетинчи кюн а тынчайып, ырахатланнганды.

18Аллах, Синай тауда Мусса бла сёлешип бошагъанындан сора, анга эки гыйы ташны, Шагъатлыкъ ташланы берген эди. Аланы юслерине Аллахны къолу бла жазылып эди.

Currently Selected:

Мисирден чыгъыу 31: МалкъСК

Highlight

Copy