Мисирден чыгъыу 29

Харун бла аны жашлары дин къуллукъгъа салынадыла

(Леб. 8:1-36)

1– Аланы Манга дин къуллукъчулукъ этер ючюн, сен аланы былай сыйлы эт: тууарладан бир бугъа эмда эки къыяусуз къочхар ал. 2Ачымагъан ётмекле да, зейтун жау бла басылгъан ачымагъан гюттюле да, зейтун жау жагъылгъан ачымагъан халыула да ал. Аланы бидиш#29:2 Бидиш – будайны бек сайламасы, бек иги сорту. будай ундан этдир. 3Аланы бир четеннге салып, ол четенни да, бугъа бла эки къочхарны да келтир.

4Харунну бла аны уланларын а Тюбешиу Чатырны эшик аллына келтирип, суу бла жууундур. 5Кийимлени ал да, Харуннга узун кёлекни, къапталны, аны юсюне эфодну эм ёшюнлюкню кийдир, эфодну уста эшилген белибауун къыс. 6Аны башына сарыхны сал эмда сарыхны юсюне сыйлы тажны сал. 7Сора майлау жауну ал да, башына къуюп, аны майла. 8Аны кибик Харунну уланларын келтир да, алагъа да узун кёлекле кийдир, 9Харуннга да, аны уланларына да белибаула къыс эмда башлыкъла байла. Сора, жорукъгъа кёре, дин къуллукъчулукъ ёмюрге да аланы болур. Алай бла Харунну да, аны уланларын да къуллукъларына тохташдыр.

10Бугъа тананы Тюбешиу Чатырны аллына келтир, Харун да, аны уланлары да къолларын бугъаны башына салсынла. 11Сора бугъаны Раббийни аллында, Тюбешиу Чатырны эшик аллында боюнун кесерсе. 12Бугъа тананы къанындан ал да, бармагъынг бла къурман этилиучю жерни мюйюзлерини юслюне сюрт, къалгъан къанны уа къурман этилиучю жерни тюбюне тёк. 13Сора ичин жапхан битеу жауун да, къара чегилерини юсюндеги жауун да, эки бюйрегин да, аланы юсюндеги жауну да алып, къурман этилиучю жерни юсюнде кюйдюр. 14Бугъа тананы этин, терисин эм чегилерин а къонушдан тышында отда кюйдюр. Бу – гюнях ючюн къурманды.

15Бир къочхарны да ал, Харун бла аны уланлары къолларын къочхарны башына салсынла. 16Сора къочхарны боюнун кес, аны къанын алып, къурман этилиучю жерни хар жанына да бюрк. 17Къочхарны этин сан-сан эт, аны ичин бла бутларын жуу, аланы сан-сан этилген юлюшлери бла эм башы бла бирге сал. 18Сора къочхарны къурман этиучю жерни юсюнде толусунлай кюйдюр. Бу – Раббийни ыразы этген жагъымлы ийис берген, Раббийни сыйына толусунлай отда кюйдюрюлген къурманды.

19Бирси къочхарны ал да, Харун бла аны уланлары къолларын къочхарны башына салсынла. 20Сора къочхарны боюнун кес, аны къанындан алып, Харунну онг къулагъыны къыйырына эмда аны уланларыны онг къулакъларыны къыйырына бла онг къолларыны баш бармакъларына эмда онг аякъларыны баш бармакъларына жакъ. Къалгъан къанны алып, къурман этилиучю жерни хар жанына да бюрк. 21Къурман этилиучю жерни юсюндеги къандан эмда майлаучу жаудан алып, Харунну юсюне эм аны кийимлерине, аны уланларыны юслерине эм кийимлерине да бюрк. Сора ол да, аны кийимлери да, уланлары да, аланы кийимлери да сыйлы болурла.

22Сора къочхарны жауун, къуйругъуну жауун, ичин жапхан жауун, къара чегилерини юсюндеги жауун, эки бюйрегин да, аланы юсюндеги жауун эм онг жапхагъын ал. Бу – дин къуллукъчуну къуллугъуна салыр ючюн кесилген къурманды. 23Раббийни аллында болгъан ачымагъан ётмек четенден бир тёгерек ётмек, зейтун жау бла басылгъан бир гюттю эм бир халыу да ал. 24Быланы барысын да Харунну бла аны уланларыны къолларына берип, Раббийни аллында кётюрюп келтир. 25Сора быланы аланы къолларындан ал да, Раббийни аллында жагъымлы ийис берген, толусунлай кюйдюрюлген къурман бла бирге, къурман этилиучю жерде кюйдюр. Бу – Раббийге отда кюйдюрюлген къурманды. 26Сора Харунну къуллугъуна салыр ючюн кесилген къочхарны тёшюн ал да, Раббийни аллында кётюрюп келтир. Бу сени юлюшюнг болур.

27Харунну бла аны уланларын къуллукъларына салыр ючюн кесилген къурман къочхарны кётюрюлюп келтирилген тёшюн да, саугъагъа берилген жапхагъын да айырып сыйлы эт. 28Бу, Харуннга эм аны уланларына Исраил улуладан ёмюрлюк юлюш болур. Нек дегенде, бу саугъа – Исраил улуланы Раббийге келтирген саламатлыкъ къурманларындан бириди.

29Харунну сыйлы кийимлери уа, Харун ёлгенден сора, аланы киерик эмда майланып дин къуллукъчу боллукъ, аны уланларына кёчерикди. 30Харунну уланларындан аны орунуна дин къуллукъчу болгъан адам сыйлы жерде къуллукъ этер ючюн, Тюбешиу Чатыргъа кирген заманында аланы жети кюн киерге керекди.

31Харунну бла аны уланларын къуллукъгъа салыр ючюн кесилген къочхарны алып, аны этин сыйлы жерде сууда бишир. 32Сора Харун да, уланлары да, къочхарны этин эм четендеги ётмекни алып, Тюбешиу Чатырны эшик аллында ашасынла. 33Ала дин къуллукъчула болуп, Аллахха багъышланыр ючюн, гюняхларын кечдирген бу затланы жангыз ала ашаргъа тийишлидиле. Аладан башха адам ашаргъа жарарыкъ тюйюлдю: бу затла сыйлыдыла. 34Аланы къуллукъларына салыр ючюн кесилген къурман этден бла ётмекден эрттенликге къалса уа, къалгъанын отда кюйдюр, ашаргъа жарарыкъ тюйюлдю: ол сыйлыды.

35Харуннга да, аны уланларына да битеу санга буюргъанларымча этерсе. Аланы къуллукъларына салыр ючюн, бу адетлени жети кюн этип турургъа керекди. 36Тазалау этер ючюн, хар кюнден гюнях ючюн къурманнга бугъа келтирирсе. Къурман этилиучю жерни тазаларгъа, гюнях ючюн къурман эт эмда, сыйлы этер ючюн, аны майла. 37Къурман жерни жети кюн тазалап, сыйлы этерсе, сора къурман жер бек сыйлы болур. Анга тийген хар зат да сыйлы болур#29:37 Бу жерде «сыйлы» деген сёз гюняхсызлыкъны юсюнден айтмайды. Бир затны энчи, айырма болгъанын белгилейди. Аны башха затланы кибик хайырланыргъа жарамагъанын кёргюзтеди..

Харкюнлюк къурманла

(Сан. 28:1-8)

38Къурман жерде дайым, хар кюн сайын, къурманнга эки къозу келтир: 39эрттенликде бир къозуну, ингирде да бир къозуну. 40Биринчи къозу бла бирге быланы келтир: бидиш будай ундан эфаны ондан бирин#29:40 Эфаны ондан бири – 2 литрге жууукъ., анга зейтун жаудан хинни тёртден бирин#29:40 Хинни тёртден бири – 1 литрге жууукъ. къошуп, эм дагъыда юсюне къуюлгъан саугъагъа чагъырдан хинни тёртден бирин. 41Бирси къозуну ингирде къурман этерсе. Эрттенликде этгенча, ун саугъа да, къуюлгъан саугъагъа чагъыр да келтирирсе. Бу жагъымлы ийис берген, Раббийни сыйына отда кюйдюрюлген къурманды.

42Бу толусунлай кюйдюрюлген къурман Тюбешиу Чатырны эшик аллына, Раббийни аллына, келлик тёлюлеригизде дайым келтирилип турсун. Анда сизни бла тюбешип, Мен сени бла сёлеширикме. 43Анда Мен Исраил улулары бла тюбеширикме. Мени аламатлыгъым бу жерни сыйлы этер.

44Тюбешиу Чатырны да, къурман этилиучю жерни да сыйлы этерме. Харунну да, аны уланларын да, ала Манга дин къуллукъчулукъ этер ючюн, сыйлы этерме. 45Исраил улуланы арасында турурма эмда аланы Аллахы болурма. 46Сора Мен, аланы араларында турур ючюн, аланы Мисирни жеринден чыгъаргъан Раббий Аллахы болгъанымы билирле. Мен – аланы Раббий Аллахыма.

Currently Selected:

Мисирден чыгъыу 29: МалкъСК

Highlight

Copy