Мисирден чыгъыу 18

Итро Мусса файхамбаргъа келеди

1Раббий Исраилни Мисирден къалай чыгъаргъанын, Аллахны Муссагъа бла ёз халкъы Исраилге битеу этген ишлерин Муссаны къайын атасы мидиянлы дин къуллукъчу Итро эшитгенди. 2Ол заманда Муссаны къайын атасы Итро, Муссаны мындан алгъа къайтарылгъан къатыны Сиппораны, 3аны эки уланын да биргесине алып, жеринден чыкъгъанды. Мусса: «Мен киши жеринде киргинчиме», – деп, уланларындан бирине Гершом#18:3 Гершом атны магъанасы – «Анда киргинчи́». атны берген эди. 4Сора: «Атамы Аллахы болушлукъчумду, мени фыргъауунну къылычындан къутхаргъанды», – деп, экинчисине Элиезер#18:4 Элиезер атны магъанасы – «Аллахым болушлукъчуду». атны берген эди.

5Муссаны къайын атасы Итро, Муссаны уланлары эм къатыны бла бирге Мусса Аллахны таууну къатында ыстауат салып тургъан къуу жерге келгенди. 6Муссагъа:

– Мен, къайын атанг Итро, къатынынг бла эм аны эки уланы бла санга келебиз, – деп билдирген эди.

7Мусса къайын атасыны аллына чыгъып, баш ургъанды, аны уппа этип, саламлашханды. Бир-бирлери бла саламлашхандан сора, ала чатыргъа киргендиле. 8Сора Мусса къайын атасына, Исраил ючюн Раббийни фыргъаууннга бла мисирлилеге битеу этген затларын, ала жолда тюбеген битеу къыйынлыкъланы эмда аланы Раббий къалай къутхаргъанын, айтханды. 9Итро Раббийни Исраилге этген битеу игиликлерине, Исраилни мисирлилени къолундан къутхаргъанына къууаннганды. 10Ол себепден Итро:

– Сизни мисирлилени бла фыргъауунну къолундан къутхаргъан эм бу халкъны мисирлилени зулмулукъларындан азат этген Раббийге шукур болсун! 11Ол исраиллилени къысып тургъанлагъа этген ишлерине кёре, мен энди Раббий битеу тейриледен бийик болгъанына тюшюндюм, – дегенди.

12Сора Муссаны къайын атасы Итро Аллахха толусунлай кюйдюрюлген эм башха къурманла келтиргенди. Харун да, Исраилни битеу тукъум таматалары да Муссаны къайын атасы бла бирге Аллахны аллында аш ашаргъа келгендиле.

Сюдюле сайланадыла

(Эсг. 1:9-18)

13Экинчи кюн Мусса халкъны сюдлюк ишлерине къараргъа олтургъанды, халкъ да эрттенден ингирге дери Муссаны тёгерегинде сюелип тургъанды. 14Къайын атасы Муссаны халкъгъа битеу этгенлерин кёрюп:

– Неди бу халкъгъа этгенинг? Кесинг жангыз олтуруп, битеу халкъ а эрттенден ингирге дери тёгерегингде сюелип нек турады? – деди.

15Мусса да къайын атасына:

– Халкъ манга Аллахдан хукму сорургъа келеди. 16Алада бир тюрлю иш болгъан заманда, ала манга келедиле, мен да экисини арасында хукму этеме, Аллахны бегимлерин бла насийхатларын билдиреме, – деди.

17Муссаны къайын атасы уа анга:

– Сен муну иги этмейсе, – деди. – 18Кесинги да, санга келген халкъны да къыйнарыкъса. Нек дегенде, бу иш санга асыры къыйынды, муну жангыз кесинг эталлыкъ тюйюлсе. 19Энди мени сёзюме тынгыла. Мен санга бир зат айтайым да, Аллах сени биргенге болсун. Сен халкъгъа Аллахны аллында келечи бол эмда аны ишлерин Аллахха айт. 20Алагъа бегимлени бла насийхатланы юйрет, ала барыр жолну эмда ала этер ишлени кёргюзт. 21Сен а битеу халкъдан, Аллахдан къоркъгъан фахмулу адамла, улутха сюймеген, кертичи адамла сайла, сора аланы халкъгъа, мингине, жюзюне, эллисине эм онуна таматала этип сал. 22Ала дайым да халкъны сюдлюк ишлерине къарасынла. Хар уллу магъаналы ишни санга билдирсинле, битеу гитче ишлеге уа кеслери къарасынла. Алай бла, ала да сени бла бирге бу жумушну ауурлугъун кётюрюп, сени ишинг тынчыракъ болур. 23Аллах санга буюруп, сен муну этсенг, чыдаялырса, битеу бу халкъ да ырахатлыкъ бла кеси жерине барыр.

24Мусса къайын атасыны сёзлерине тынгылап, битеу ол айтхан затланы этгенди. 25Ол битеу Исраилден фахмулу адамла сайлагъанды да, аланы мингине, жюзюне, эллисине эм онуна таматала этип, халкъгъа башчылагъа салгъанды. 26Ала не заманда да халкъны сюдлюк ишлерине къарай эдиле. Къыйын ишлени Муссагъа билдире эдиле, битеу гитче ишлеге уа кеслери къарай эдиле.

27Сора Мусса къайын атасын ашыргъанды, ол да ёз къыралына къайтханды.

Currently Selected:

Мисирден чыгъыу 18: МалкъСК

Highlight

Copy