Мисирден чыгъыу 17
17
Къаядан чыкъгъан суу
(Сан. 20:1-13)
1Исраил улуларыны битеу жамауаты, Раббийни буйругъу бла, Син атлы къуу жерден жолларына атланып, Рефидимде ыстауат салып тохтагъандыла. Анда уа халкъгъа ичерге суу жокъ эди. 2Халкъ Муссагъа:
– Бизге ичерге суу беригиз! – деп тырман этгенди.
– Сиз манга тырман нек этесиз? Раббийни нек сынайсыз? – деди алагъа Мусса.
3Халкъ а анда суу ичерге термилип, Муссагъа тырман этип:
– Бизни да, сабийлерибизни да, малларыбызны да суусапдан ёлтюрюрге сен бизни Мисирден нек чыгъардынг? – деди.
4Мусса Раббийге къаты тилек этип:
– Бу халкъгъа мен не этейим? Энтта бираздан, мени ташла бла тюйюп, ёлтюрлюкдюле, – деди.
5Сора Раббий Муссагъа:
– Халкъны аллына чыкъ. Исраилни тукъум таматаларындан да бир къауумун биргенге алып, сен Нил сууну ургъан аса таягъынгы да къолунга алып, бар. 6Ма, Мен сени аллынгда анда Хореб тауда къая башында турурма. Сен къаяны урурса, сора аны ичинден халкъгъа ичер суу чыгъып башлар, – деди.
Мусса, Исраилни тукъум таматалары да кёре тургъанлай, алай этгенди. 7Ол жерге ол Масса эм Мериба#17:7 Масса атны магъанасы – «сынау», Мериба атны магъанасы – «тырман этиу». деп атагъанды, нек дегенде, Исраил улулары анда тырман этген эдиле эмда: «Раббий арабыздамыды, огъесе тюйюлмюдю?» – деп, Раббийни сынагъан эдиле.
Исраиллиле амалеклилени хорлайдыла
8Сора амалеклиле келип, Рефидимде исраиллиле бла къазауат этгендиле. 9Мусса Ешуагъа:
– Бизге адамла сайла да, барып, амалеклиле бла къазауат эт. Тамбла мен дуппурну башында турурма, Аллахны аса таягъы да къолумда болур, – дегенди.
10Сора Ешуа, Мусса анга айтханча этип, амалеклиле бла къазауат этерге кетгенди. Мусса, Харун эм Хур а дуппурну башына чыкъгъандыла. 11Мусса къолларын ёрге кётюрюп тургъан заманда, Исраил хорлай эди. Ол къолларын энишге ийген заманда уа, Амалек хорлай эди. 12Муссаны къоллары уа талгъан эдиле. Сора бир таш алып, аны тюбюне салгъандыла, ол да аны юсюне олтургъанды. Харун бла Хур а аны къолларын, экиси эки жанындан кётюрюп тургъандыла. Аны бла аны къоллары кюн батхынчынга дери ёрге кётюрюлгенлей тургъандыла. 13Алай бла Ешуа, къылыч уруш этип, Амалекни халкъын ууатханды.
14Сора Раббий Муссагъа:
– Муну эсде тутар ючюн, китапха жаз эмда Ешуаны жюрегине сал, Мен амалеклилени атларын эсгериуню кёкню тюбюнден жокъ этип къоярыкъма, – дегенди.
15Мусса Раббийге къурман жер къурап, анга Яхве-Нисси#17:15 Яхве-Нисси дегенни магъанасы – «Раббий мени байрагъымды». деп атагъанды 16Эмда:
– Раббийни тахтасына къол кётюрюлгени себепли, Раббийни Амалекге къажау урушу тёлюден тёлюге бардырыллыкъды, – дегенди.
Currently Selected:
Мисирден чыгъыу 17: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
