Мисирден чыгъыу 14
14
Исраиллиле тенгизни ортасындан ётедиле
1Раббий Муссагъа:
2– Исраил улуларына айт, ала ызларына айланып Пи-Хахиротну аллында, Мигдолну бла тенгизни арасында, Баал-Сефонну аллында ыстауат салып тохтасынла. Ыстауатны аны туурасында, тенгизни къатында салыгъыз стауатны. 3Фыргъауун Исраил улуларыны юсюнден: «Ала бу къыралда ажашып къалгъандыла, аланы къуу жер беклеп къойгъанды», – деп айтыр. 4Мен а фыргъауунну терсакъыл этерме да, ол сизни ызыгъыздан къууар, сора Мен фыргъауунну бла аны битеу аскерин хорлап, къудуретими кёргюзтюрме. Мисирлиле Раббий Мен болгъанымы билирле, – дегенди.
Исраиллиле алай этгендиле. 5Мисирни патчахына, халкъ къачып кетгенди деп, билдиргендиле. Сора фыргъауун бла аны къуллукъчулары, сокъуранып:
– Биз алай нек этдик? Исраиллилени кесибизге къул этип турмай, жиберип нек къойдукъ? – дедиле.
6Фыргъауун мажарын#14:6 Мажар – орус. колесница. жекдирип, халкъын да биргесине алды. 7600 айырма мажар да, Мисирни битеу мажарларын да, аланы барына таматала да алды. 8Алай бла Раббий Мисирни патчахы фыргъауунну терсакъыл этгенди да, ол Исраил улуларыны ызларындан къуугъанды. Исраил улулары уа таукел кетип бара эдиле. 9Мисирлиле, фыргъауунну мажарлары бла битеу атлары да, атлылары да, аны битеу аскери да, аланы ызларындан къуууп баргъандыла, сора ала тенгиз боюнунда, Пи-Хахиротну къатында Баал-Сефонну аллында тохтап тургъанлай, аланы ызларындан къысха жетгендиле.
10Фыргъауун жууукълашханда, Исраил улулары ызларына бурулуп къарасала, ма, мисирлиле аланы жетип келедиле. Исраил улулары уа, бек къоркъуп, Раббийге къычырыкъ этдиле. 11Ала Муссагъа:
– Мисирде къабырла жокъму эдиле да, сен бизни къуу жерде ёлюрге келтирмесенг а? Бизни Мисирден чыгъарып, бизге былай нек этдинг? 12Мисирде санга: «Къой бизни, мисирлилеге ишлеп турайыкъ», – деп, муну айтмагъанмы эдик? Биз къуу жерде ёлгенден эсе, мисирлилеге къул болгъаныбыз иги эди, – дедиле.
13Мусса уа халкъгъа:
– Къоркъмагъыз. Тепмей туругъуз. Бюгюн Раббий сизге этерик къутхарыуну кёрюрсюз, бюгюн сиз кёрген мисирлилени энди ёмюрге да кёрмезсиз. 14Раббий сизни ючюн къазауат этерикди, сиз а ырахат болугъуз, – деди.
15Сора Раббий Муссагъа:
– Сен Манга нек къычырыкъ этесе? Исраил улуларына айт, ала барсынла. 16Сен а аса таягъынгы кётюрюп, къолунгу тенгизге узатып, аны арасын бёл, сора Исраил улулары тенгизни арасындан къургъакъ жер бла ётерле. 17Мен а мисирлилени терсакъыл этерме да, ала сизни ызыгъыздан барырла. Сора Мен фыргъауунну эм аны битеу аскерин, аны мажарларын эм атлыларын хорлап, къудуретими кёргюзтюрме. 18Мен фыргъауунну, аны мажарларын эм атлыларын хорлап, къудуретими кёргюзтген заманымда, мисирлиле Мен Раббий болгъанымы билирле, – деди.
19Исраил аскерни аллында баргъан Аллахны Мёлеги тебиреп, аланы ызларындан атланнганды. Булут чигинжи да аланы туураларындан тебиреп, аланы артларында туруп, 20мисирлилени аскерини бла исраиллилени аскерини арасына киргенди. Араларында къарангы булут бар эди, кече уа ол жарыкъ бергенди. Алай бла кечени узунуна ала бир-бирлерине жууукълашмагъандыла.
21Мусса къолун тенгизге узатханды, сора Раббий тенгизни кечени узунуна кюн чыкъгъан жанындан уруучу кючлю жел бла сюрюп, тенгизни къургъакъ жер этип къойгъанды. Суу эки жанына бёлюннгенди. 22Сора Исраил улулары тенгизни ортасында къургъакъ жер бла баргъандыла, суу да алагъа онг эм сол жанларында къабыргъа болуп тургъанды. 23Мисирлиле къуугъандыла, фыргъауунну битеу атлары, аны мажарлары эм атлылары аланы ызларындан тенгизни ортасына киргендиле. 24Сора танг аласында Раббий, мисирлилени аскерлерине от чигинжиден бла булут чигинжиден къарап, мисирлилени ыстауатларын абызыратханды. 25Аланы мажарларыны чархларын алгъанды, алай бла ала мажарларын кючден сюйреп баргъандыла.
Мисирлиле:
– Исраиллиледен къачайыкъ, ала ючюн Раббий бизге къажау къазауат этеди, – дедиле.
26Сора Раббий Муссагъа:
– Къолунгу тенгизге узат, суу мисирлилени, аланы мажарларыны эм атлыларыны юсюне айлансын, – деди.
27Алай бла Мусса къолун тенгизге узатханды, сора эрттенликге суу жерине къайтханды. Мисирлиле уа сууну аллына чабып баргъандыла. Раббий мисирлилени тенгиз ортасында алай батдыргъанды. 28Сора суу ызына айланып, исраиллилени ызларындан тенгизге кирген фыргъауунну битеу аскерини мажарларын бла атлыларын басханды. Аладан бири да сау къалмагъанды.
29Исраил улулары уа тенгизни ортасындан къургъакъ жер бла ётгендиле. Суу алагъа онг эм сол жанларында къабыргъа болуп тургъанды. 30Ол кюн Раббий исраиллилени мисирлилени къолларындан къутхаргъанды. Исраиллиле мисирлилени тенгиз жагъада ёлюп тургъанларын кёргендиле. 31Раббий уллу кючю бла мисирлилеге этген ишни исраиллиле кёрген заманларында, халкъ Раббийден къоркъгъанды эмда Раббийге бла Аны къулу Муссагъа ийнанып къалгъанды.
Currently Selected:
Мисирден чыгъыу 14: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
