Мисирден чыгъыу 13

Тюнгючле Раббийге бериледиле

1Сора Раббий Муссагъа:

2– Исраил улуларыны арасында битеу адамладан эм хайыуанладан жаш орун ачхан биринчи туугъанланы хар бирин да энчи этип, Манга бер: ала Меникиледиле, – деди.

Ачымагъан Ётмекле байрамы

3Мусса халкъгъа:

– Сиз Мисирден, жесирлик жерден чыкъгъан бу кюнню эсигизде тутугъуз. Раббий сизни андан кючлю къолу бла чыгъаргъанды. Бир ачыгъан зат да ашамагъыз. 4Сиз бюгюн Абиб айда#13:4 Абиб ай – сабанла баш къусхан ай (март-апрель). мындан чыгъасыз. 5Раббий кенанлыланы, хитлилени, аморлуланы, хивлилени эм эбуслуланы жерлерин, сют бла бал баргъан жерни, санга берирме деп, сени ата-бабаларынга ант этгенди. Ол сени ары кийирген заманда, бу айда быллай адет тутарса: 6Жети кюн ачымагъан ётмек ашарса, жетинчи кюн а Раббийге байрам этерсе. 7Жети кюн ачымагъан ётмек ашаргъа керекди; сизде ачыгъан ётмек, не ачытхы болмасын. 8Ол кюн уланынга: «Муну, Мисирден чыкъгъан заманымда Раббий манга этген ишни эсгертир ючюн этеме», – деп билдирирсе. 9Бу санга къолунгда белги, мангылайынгда эсгертиучю болсун, алай бла Раббийни насийхатлары ауузунгда болсун, нек дегенде, Раббий сени Мисирден кючлю къолу бла чыгъаргъанды. 10Жылдан жылгъа бу жорукъну буюрулгъан заманында толтуруп турурса, – деди.

Тюнгючле юсюнден жорукъла

11Раббий санга да, ата-бабаларынга да ант этгенича, сени кенанлыланы жерине кийирип, аны санга бергенден сора, 12жаш орун ачхан биринчи туугъан сабийлени эм сенде боллукъ малдан биринчи туугъанланы барын да Раббийге айыр. Эркекле Раббийникиледиле. 13Биринчи туугъан гылыуну, къозу берип, жулу#13:13 Жулургъа – орус. заглаживать, искупать (вину); выкупать (напр., крепостного).. Сюймесенг а, гылыуну боюнун сындыр. Биринчи туугъан уланларынгы барын да жулугъан эт.

14Артда уланынг санга: «Муну магъанасы неди?» – деп соргъанда, анга: «Мисирден, жесирлик жерден Раббий бизни кючлю къолу бла чыгъаргъанды. 15Фыргъауун бизни жиберирге унамай тохтагъан заманда, Раббий Мисирни жеринде биринчи туугъанланы барын да – адамны биринчи туугъанын да, малны биринчи туугъанын да – ёлтюрюп къойгъанды. Ол себепден мен, жаш орун ачхан эркек малны барын да Раббийге къурманнга береме, биринчи туугъан уланларымы уа къурман бла жулама, деп айтырса. 16Бу къолунгда белги, мангылайынгда эсгертиучю байлау болсун, нек дегенде, Раббий бизни Мисирден кючлю къолу бла чыгъаргъанды», – деп айт.

Аллах халкъны биргесине барады

17Фыргъауун Исраилни халкъын жиберген заманда уа, Филист жери жууукъ болса да, Аллах аланы ол жол бла элтмегенди. Къазауатны кёргенде, халкъ сокъуранып, Мисирге къайтыргъа болур, деп ойлагъанды.

18Аллах халкъны къуу жерни жолу бла тёгерек айландырып, Къамиш тенгизге элтгенди. Исраил улулары Мисирни жеринден сауутланып чыкъгъандыла. 19Мусса Юсюпню сюеклерин кесини биргесине алгъанды, нек дегенде, Юсюп Исраил улуларына:

– Аллах сизге болушуругъу ишексизди, сора сюеклерими мындан чыгъарып биргегизге элтирсиз, – деп, ант этдирген эди.

20Исраил улулары Суккотдан атланып, къуу жерни къыйырында, Этамда ыстауат салып тохтагъандыла. 21Кече да, кюн да барсынла деп, Раббий аланы алларында кюндюз булут чигинжиде алагъа жол кёргюзтюп, кечегиде уа от чигинжиде алагъа жарытып баргъанды. 22Кюндюз булут чигинжи, кече да от чигинжи халкъны туурасындан таймай эди.

Currently Selected:

Мисирден чыгъыу 13: МалкъСК

Highlight

Copy