نامَه رومِه کلیسا را 6
6
مَردن گناه واسنه و زندگی خدا را
1پس گه چِه باجام؟ هی گناه بکرم تا فیض پِرتر ببی؟ 2هرگز! آما که گناه واسنه مَردمان، چُنجوره تانام هنی چوه دله زندگی بکرام؟ 3مگم نِزانا آما همَه که مسیح عیسیک غسل تعمیدمان کَته، چَوه مرگ دلکِمان تعمید کَته؟ 4پس مرگه دلِک تعمید کتننه، اَونه دِخَشارده ببمان تا اَجوره زه که مسیح، پییر جلاله نه، مَردان دلَک زنده بِبه، آما نی ایگله تازه زندگی دلَک بِمِجام.
5پس اَگم مرگک که چَوه مرگه شوار، اَونه ای بییِمان، حتماً زنده آبیینک نی چَوه زنده آبیینه شوار، اَونه ای بام. 6چون زانسرام اَ آدمی که قدیم بِمان، اَونه مصلوب ببِه تا گناه بدن از بین بیشی و دَ گناه نوکر مبام. 7چون اَ کسی که مَرده، گناهک آزاد بییه.
8اِسا اگم مسیحنه مردِمان، ایمان دارام که اَونه زندگی نی کَرام. 9آما زانسرام که مسیح مَردان دلَک زنده آبیه، دَ هرگز نمرِه و دَ مرگ چَوه سرک قدرتی نداره. 10چون که اَ اِشتَن مرگ نه، ای را، همیشه را گناه واسنه بِمرد و زندگی ای که اَ اِسا زندگی کره، خدا را زندگی کره.
11پس شاما نی گه اِشتن گناه را مردِه بزانا، و مسیح عیسیک خدا را، زنده بزانا. 12پس مَرزا گناه شاما بدنک که از بین شی حکم بکره، تا چَوه گَوسک اطاعت بِکَراه. 13شاما اعضای بدنه آمدیا گناه دس تا ناراستی وسیله بیبینده، بلکم کسانی شوار که مرگ نه آگردسَنده زندگی، اِشتن آدیا خدا دس تا شاما اعضای بدن خدا دسک راستی وسیله بیبینده. 14چون گناه شاما سر حکم نکره، چون که شریعته جیرک نییِران بلکم فیضه جیرکران.
صالحی نوکران
15پس چِه باجام؟ گناه بکرام چون که شریعته جیرک نییِمان، بلکم فیضه جیرکمان؟ هرگز! 16مگم نِزانسرا که اگم اِشتن، نوکرانی شوار که اطاعت کرنده، آدیا ای نفره دس که اَ آدمه نوکران ببا که اَوک اطاعت کرنده، چه گناه نوکر، که مرگه ختم بی، چه خدا اطاعته نوکر، که صالحی ختم بی؟ 17امّا خدا را شکر، که شاما پرانتر گناه نوکران بران، اِسا صدق دلنه اَ تعلیمک اطاعت کرا که خدا شاما آدییشه. 18و شاما گناک آزاد بییَننِه، صالحی نوکران ببِران.
19از آدمه زواننه شاما نه لاوَه کرم، چون که آدمران و شاما جسم ضعیغه. چون ایزه که پرانتر شاما اعضای بدنه، ایگله نوکر شوار درسماردران بِه، ناپاکی و بی قانونی دس که روج به روج پِرتر آبییَرده، اِسا اَوان دِرسمارا صالحی نوکری دس که قدّوسیته را ختم بی. 20اَ دمی که گناه نوکران بِران، صالحیک آزاد بِران. 21پس اَدمی، اَ کارانی انجام دیینک که اِسا اَوانک شرم دارا، چِه سودی بِبَردرانه؟ چون اَ کاران آخر عاقبت، مرگه! 22امّا اِسا که شاما گناهک آزاد بییِران و خدا نوکران بییِران، چوه ثمر شاما را تقدس بییه اِسه که آخر سر ابدیه زندگی را ختم بی. 23چون که گناه مزد مرگه، امّا خدا هدیه، چاما خداوند مسیح عیسیک زندگی ابدی اِسه.
Currently Selected:
نامَه رومِه کلیسا را 6: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company