نامَه رومِه کلیسا را 5
5
خدا نه صلح کردن ایمانه راه نه
1پس چون ایمان راه نه صالح حساب بییِه مان، چاما خداوند عیسی مسیح واسطنه، خدا نه صلح دارام. 2آما چَوه واسطه نه، و ایمانه راه نه، اَ فیضی که اِسا اَوک پابرجایمان به دسمان آورده، و خدا جلاله امیدک خوشحالی کرام. 3نه فقط اِم، بلکم سختیانک نی خوشحالی کَرام، چون زانسرام که سختیه صبر بار آورنده 4و صبر، شخصیت بار آوره، و شخصیت امید بار آوره؛ 5و اِم امید چاما تور اَگسنه باعث نیبی، چون خدا محبت، روح القدوسه واسطه نه آما آدییه بییه، چاما دلان دلَک اَرَبیَیه.
6چون اَدمی که حَلا آما ضعیف بمان، مسیح مناسبه وقتک، بی خدایان واسِنَه جانش بدا. 7چون کم پیش آیه که ای نفر اِشتن جانه صالحه آدمی واسِنه بنیه، هر چند شاید ای نفر اِم جرائته بداره که اِشتن جانه چاکه آدمه واسنه آدَیه. 8ولی خدا اِشتن محبتش ایزه آما آمانس، اَدمی که حَلا آما گناهکار بِمان، مسیح چاما واسنه بِمرده. 9پس چِمه واسنه که اِسا چَوه خُونه خاطر آما صالح حساب بییمان، چنده پرتر چَوه واسطه نه خدا غضبک نجات وینام. 10چون اگم اَدمی که خدانه دشمن بمان، و چَوه زا مرگه خاطر خدا نَه آشتی آدیه ببمان، چنده پِرتر اِسا که اَونه آشتیک اِسِمان، چوه زندگی واسطه نه آما نجات وینام. 11نه فقط اِم، بلکم آما چاما خداوند عیسی مسیح واسطنه، خدا آشتی چاما نصیب ببه، خدا دلَک نی خوشحالی کرام.
مرگ آدمِه واسطه نه، زندگی مسیحه واسطه نه
12پس، اَجوره زَه که گناه ایگله آدمه واسطنه بامه اِم دنیا دلَه، و گناه واسطِنَه، مرگ بامه، و اِنجوره مرگ همهی آدمان دامنش بکته، چون که همه گناهشان کرده- 13چون راس راسینه پیش از اَ که شریعت آدییه بیبی، گناه دنیا دلَک وجود داشته، امّا یاگایی که شریعت مَبی، گناه بِه حِساب نایه. 14با اِم حال، آدم نه تا موسی پیغمبر، مرگ هَمه مردمان سَرک حاکم بِه، حتی کسانی سر که چوان گناه آدمه نافرمانی شوار نِبه. آدم، کسی نمونه بِه که گَسه بایه.
15امّا هدیه، گناه شوار نییه. چون اگم ایگله آدمه گناه واسنه خیلی کَسه بِمَردنده، چنده پِرتر خدا فیض و هدیه ای که ایگله آدمه فیض واسطه نه، یانی عیسی مسیح فراهم بییَه، فِت و فِراوانینه، خیلیان نَصیب بیَه. 16و اَ هدیه، اَ آدمی گناه نتیجه شوار نییِه. چون که اَ گناه پَشه داوری بامه و محکومیتش بوعرده؛ امّا پِر گناهان پَشه هدیه بامه و صالح حساب بیینش اِشتن همراه بوعرده. 17چون اگم ایگله آدمه گناه واسنه، مرگ اَ آدمه واسطه نه حکومتش بکرده، چنده پِرتر کسانی که خدا بی حد و اندازه فیض و صالح بیینه هدیشان اَرکته، اَدرین آدمه واسطنه، یانی عیسی مسیح، زندگیک حکومت کرنده.
18پس اَجوره زه که ایگله گناه باعث ببه همهی آدمان محکوم بیبینده، ایگله صالحانه کار نی باعث بی همه ی آدمان زندگی بدارنده و صالح حساب باینده. 19چون اَجوره زَه که ایگله آدمه گناهنه، پر کسه گناهکار بِبِنده، ایگله آدمه اطاعته نه نی پِر کسه صالح بیینده.
20اِسا، شریعت بامه تا گناه پِر بیبی؛ امّا یاگایی که گناه پر بِبه، فیض نی بی حد و اندازه پر ببه. 21تا اَجوره زَه که گناه مرگِک حکومتش بکه، فیض نی صالحی واسطه نه حکومت بِکره که چاما خداوند عیسی مسیح واسطه نه، زندگی ابدی آرسه.
Currently Selected:
نامَه رومِه کلیسا را 5: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company