نامَه رومِه کلیسا را 15
15
1آما که قوییمان، گه کسانی که ضعیفنده تحمل بکرام و چاما خوشحال بیینه پَشه مَبام. 2هر کامین آماک گه هر چاک چیی که اِشتن قونشوک وینه، چَوه درباره اَوه خوشحال بکره، تا چوه ایمانه تقویت بکره. 3چون که مسیح نی اِشتن خوشحال آکردنه پَشه نِبه، بلکم اَجورکه داووده مزمورک نویشته بیه: «کسانی سرزان که ته سرزان کرنده، چِمن سر گِنه.» 4چون اَ چی ای که گذشتک نویشته بییه، چاما تعلیمه را بییه تا مقاومتنه و اَ دلگرمی نه که مقدّس نیویشته آدیه، امید بدارام.
5بیبی خدایی که مقاومت و دلگرمی دیه، شاما عطا بکره اَجوره که مسیحْ عیسی گوسه نه جور اِسه هندیگرنه مدارا بکرا، 6تا هندیگرنه ای دل و ای زُوان، چاما خداوند عیسی مسیح پییَر، یانی خدا پرستش بِکَراه.
7پس اَجوره زه که مسیح شاماش گرمینه قبول بکه، شاما نی هندیگره گرمینه قبول بکرا تا خدا شکوه و جلال بیگیره. 8چون شاما نه واجم که مسیح، ختنه بییه هان خدمتکار ببه، تا خدا راستی آمانه، تا اَ وعدههانی که چاما اجداده آدیشه، تایید بکره، 9و تا غیریهودیه، خدا چوه رحمته واسنه شکوه و جلال بدنده. اَجوره که مقدسه نویشته هانک نیویشته بییه که:
«پس از، ته غیر یهودیان دلک ستایش کرم،
و اِشته نامه آوازه خوانم.»
10هَنی واجه:
«ای غیر یهودیه، چِمن قوم نه شادی بکرا.»
11و هَنی مزموره کتابک واجه:
«ای همهی غیر یهودیه، خداونده ستایش بکرا!
بیبی که همه ملته، اَوه شکوه و جلال بدینده.»
12و هنی اِشعیای پیغمبر نی واجه:
«یسا بِن و بِنجق آیه،
کسی که هِشته تا غیر یهودیان حکمرانی بکره؛
غیر یهودیان اَوه امید دارنده.»
13بیبی، خدایی که امید دیه، شاما شادی و صلح و سلامتی کاملی نه که ایمانک اِسه، فت بِکَره، جوری که روح القدسه قدرتنه، امیدک کوکولی فت بِبا.
پولُسه خدمت غیریهودیان را
14ای براران، از اِشتن شاماک خاطر جمعم که شاما اِشتن چاکیک کوکولی فِتران، و داناییک کامل فتران و تانا هندیگره تعلیم بدیا. 15ولی چند گله جریانه درباره پر جسارتم بکه، شاما را بینویشتمه، تا اَوان شاما ویر بوعَرم، چون خدا اِم فیضش من آدیه، 16که غیر یهودیان را مسیحْ عیسی نوکر بیبیم و خدا انجیله خدمت کردنه را کاهنتی بکرم، تا غیریهودیان خدا پرانک قابل هدیه بیبینده که روح القدسه واسطه نه تقدیس بییَه.
17پس از مسیح عیسیک، اِم خِدمَته را که خدا را کرم دلیلی دارم که افتخار بکَرم. 18چون جُرئت نکرم که چی ای کی لاوَه بکرم، اَ چییانی غیراز که مسیح چِمن واسطنه انجامش دیه، تا غیریهودیان ایمانه مطیع بکرم، چِمن لاوانه و چِمن کاران واسطنه. 19اَ اِمش علامت و معجزاته قدرتنه، یانی خدا روحه قدرتنه انجامش دییَه، اَجوره که اورشلیم نه بیشم تا ایلیریکوم، مسیح انجیله خدمتم کامل، انجام دیه. 20چِمن آرزو همیشه اِم به که یاگایی کی انجیله موعظه بکرم که مسیح نامشان اَشنوسه مبی، تا مبادا از جدا نفره پاکار سرک بنا رچ آکرم، 21اَجورکه اِشعیا پیغمبره کتابک نویشته بییَه که:
«کسانی که اَوک بیخبر بِنده، ویننده
و کسانی که اَشنوسشان نِبه، فهمنده.»
22چِمه واسنه، چند را رایم به باییم شاما وَر ولی نبه.
23امّا اِسا چون که اِم منطقه هانک، دَ کاری مانده نیه که از انجام بدیم، و چون که پِره سال اِسه که پر گمه بایم شاما وَر، 24امید دارم چِمن را سرک اسپانیا را، بایم شاما ویندنه را تا کملی ای بعد که شامام بیندران، من کمک بکرا بیشیم اَگا سفره را. 25ولی اِسا رایمه بیشیم اورشلیم تا اگارک مقدسان کمک مالی بکرم. 26چون مقدونیه و اَخائیه کلیساهان رایشان به که اورشلیمه فقیره مقدسان را کمک مالی بیدا آکرنده. 27اَوان اِشتن رایشان به اِم کاره بکرنده؛ و راس راسی اَوان اورشلیمه ایمان داران مدیون بِنده، چون اگم غیریهودیان، یهودیان روحانیه برکاتک یهودیاننه شریک ببنده، یهودیه نی گه مالیه برکتاتک اَوان خِدمَت بکرنده. 28پس، وقتی اِم کارم اُوجرده و اَ چی که بیدا آبیه آرسانم چوان دس شاما راهنه شیم اسپانیا. 29از زانم که وختی بایِم شاما وَر، مسیح برکت نه که پِره آییم.
30ای براران، چاما خداوند عیسی مسیح واسنه و محبتی که روح القدسک اِسه، شاماک خواهش کرم که اُوزون چِمن را خدا درگاه دعا بِکَرا، و اِم کارنه چِمن خدمتک شریک ببا. 31تا یهودیه بی ایمانان دَسِک، جان سالم به در ببرم و چِمن خدمت اورشلیمه واسنه، مقدّسان را قبول بیبی. 32چاوش، اگم خدا بگشه تانم شادی نه بایم شاما وَر و شاما نه تازه جانی بیگیرم. 33صلح و سلامتیه خدا شاما همان همراه بیبی. آمین.
Currently Selected:
نامَه رومِه کلیسا را 15: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company