اعمال رسولان 18
18
پولُس قُرِنتُسه شهرک
1چِمه پَش، پولُس آتن شهر نه بشه قُرِنتُسه شهره را. 2اَگارک ایگله یهودیه مردکینه آشنا آبه، که چَه نام آکیلا به. آکیلا پونتوسه منطقه مردمک بِه. اَ اِشتن زنرنه پْریسکیلا نه، تازه ایتالیا نه آمییه به، چون کْلودیوس، رومه امپراطور دستورش دیه بِه که همهی یهودیِه، روم نه بیشینده. پولُس بِشه چوان ویندَنه را، 3و چون اَ نی چوان شوار کارش خیمه دوجی به، چَوان وَرک بندرس و مشغول کار ببه. 4پولس هر مقدسه شنبه روجک عبادتگاک یهودیان و یونانیان نه بحثش کَرده و تقلاش کرده اَوان قانع بکره.
5وختی سیلاس و تیموتائوس مقدونیه منطقه نه بامنده، پولُس اِشتن تمام وقتش، خدا کلامه را نییش به، و یهودیان را شهادتش دیرده که مسیحه موعود هَ عیسی اِسه. 6امّا وختی یهودیان پولسه نه مخالفتشان بکه و عیسی شان دِشمان بدا، پولس اَ شهره خاک و خلش اِشتن خلوانک اَرفشاند و اَوان نه باتشه: «شاما خون شاما گردن بیبی! از تقصیر کار نییِم. چِمِه پَش، شیم غیریهودیان ور.»
7چاوش عبادتگانه بشه تیتوس یوستوس کییه که ایگله خداپرست مردکی بِه و چوه کییه عبادتگاه وَرک به. 8کْریسپوس که عبادتگاه رئیس به، اِشتن خانواده نه خداوند شان ایمان بوعرده. ایزه نی خیلی از قُرِنتُس شهره اهالیک وقتی پیغام شان بشنوس، ایمان شان بوعرده، غسله تعمید شان بِکَته.
9ای شو خداوند رؤیاک پولُس نه باتشه: «مترس! لاوَه بِکه و ساکت مَبش! 10چون از تِنه اِسِم و هیچکس نتانه ته حمله بکره تا اِشته سر بلایی بوعره، چون که اِم شهرک پر آدم دارم.» 11پس، پولُس ای سال و نیم اَگارک بندرس و خدا کلامش اَوان تعلیم بدا.
12امّا اَدمی که گالیُو، اَخائیه منطقه حاکم به، یهودیِه هم دس ببِنده، اَربنده پولُسه سر و اَوشان ببره محاکمه. 13اَوان باتشانه: «اِم آدم مردمه قانع کردر که ایگله روشی نه که خلاف شریعت اِسه، خدا پرستش بکرنده.»
14چاوش وختی پولُس رایش به لاوَه بکره، گالیو یهودیانه باتشه: «ای یهودییان اگم جرم و جنایتی در کار به، از دلیلی داشتمه که شاما شکایته گوش آدم. 15ولی چون که مسئله، کلمات و نامان و شاما اِشتن شریعته سردن اِسه، پس شاما اِشتن اَوه حل و فصل بِکَراه. از نِگَمه اِنجوره چییان درباره داوری بکرم.» 16پس اَوانش مَحکمک برکردنده. 17اَوه نی همبلنه سوسْتِنِسه سر اَربنده، که عبادتگاه رئیس به و اَوشان، مَحکمَه پرانک بیزی. امّا گالیو هیچ اِشتن راش ننا.
پولس آگردسن به اَنطاکیه
18پولُس پره روجان نی قُرِنتُسک بمانده، و براران نه وداعش بکه و دریا راه نه بشه سوریه. اِم سفرک، پْریسکیلا و آکیلا نی چَه همراه بِنده. پولس کِنخْریک اِشتن سرش بتاشت، چون ایزش نذر کرده بِه. 19وختی آرسسنده اِفِسُس، اِشتن همسفرش ترک بکردنده و اِشتن بِشه عبادتگاه، یهودیان نه بحثش بکه. 20اَدمی که اَوه پولسک آخاشتشانه مدتی پرتر اَوان نه بِندَره، پولسه قبول نکه 21ولی وقتی اَوان نه خدافظیش کردرده، باتشه: «اگم خدا بگشه هنی آییم شاما ور.» چاوش دِنشت ایگله کشتیک و اِفِسُس نه بشه. 22وقتی قیصریَک کشتیک جیرومه، بشه کلیسا آدمش سر بیزیشه و چاوش بِشه اَنطاکیه را. 23مدتی اَگارک بِندَرِس و هنی بشه سفر، اَ، غَلاطیه و فْریجیه منطقه سر تا سرک یاگا به یاگا گردسه و همهی شاگردش ایمانک تقویت کَردِنده.
آپولس، اِفِسُسه شهرک جراتنه لاوَه کره
24اَ روجانک، ایگله یهودی، که چَه نام آپولُس به و اسکندریه مردمک به، بامه اِفِسُسه شهر. اَ، لاوَه کریک اُستا به و مقدّس نیوشته هانکش پر زانسه؛ 25خداونده راک تعلیمش کته بِه و ذوق نه لاوش کرده و چاک عیسی درباره تعلیمش آدسه، هر چند فقط یحیی تعمیدکش خبر داشته. 26آپولس، یهودیان عبادتگاک جراعتنه لاوش کرده. ولی وختی پْریسکیلا و آکیلا چَه لاوشان بشنوس، اَوشان ببرده گوشه کنار را و خدا راهشان دقیق تر اَوه باموته.
27وختی آپولُس رایش به بیشی اَخائیه منطقه را، براران اَوشان تشویق بکرده و شاگردان را بینیویشتشانه که اَوه گرمینه قبول بکرنده. وختی آپولُس آرَسِس اَگا، کسانی که فیضه واسطه نه ایمانشان آورده به، پر کمک بکردشه. 28چون هَمان چشمان پرانک یهودیان نه بحثش کرده، و چوان عقیدهانش، قوتنه رد کردرده، و مقدّس نیویشته هان نه ثابتش کردرده که مسیحه موعود هَ عیسی اِسه.
Currently Selected:
اعمال رسولان 18: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company