مَرقُس 3
3
یَتِه مَردی ای شَفا گه وی دَس خِشک بَوِه وِه
1عیسی یَکَش دییَر یَهودینی عبادتگاهی دِلِه بوردِه. اوجِه یَتِه مَردی دَوِه گه وی یَتِه دَس خِشک بَوِه وِه. 2بعضیا عیسی رِه هاپِه داشتِنِه تا هارشِن مِقَدّسِ شَنبِه ای دِلِه هون مَردی رِه شَفا دِنِه یا نا، تا هَینجوری وی تِهمَت بَزوئَنی سِه یَتِه ویهومِه بَنگیرِن. 3عیسی هون مَردی گه وی دَس خِشک بَوِه وِه رِه بُتِه: «هَیجِه بِرِه.» 4اَزما وِشونی جا بَپُرسیِه: «مِقَدّسِ شَنبِه ای دِلِه خِبی هاکِردَن جایزِ یا بَدی هاکِردَن؟ یَنَفری جانِ نِجات هادائَن یا بَکوشتَن؟» ولی وِشون هیچی نُتِنِه. 5عیسی، اونانیگه وی دُور و وَر دَوِنِه رِه عَصبانیتی هَمرا هارشیِه و وِشونی سَنگ دِلی ای جا نارحت بَوِه. اَزما هون مَردی رِه بُتِه: «شی دَسِ دِراز هاکِن.» وی شی دَسِ دِراز هاکِردِه و وی دَس خار بَوِه. 6عِلَمای فِرقِه فَریسی دیرگا بوردِنِه و دَرجا هیرودیسِ پادشاهی هَوادارِنی هَمرا دَسیسِه دَچینِه گه چِتی عیسی رِه بَکوشِن.
یَتِخِیلی جماعَت عیسایی دِمال شونِنِه
7اَزما عیسی شی شاگِردِنی هَمرا دَریایی سَمت بوردِه. یَتِه گَتِ جماعَت هَم جلیلی مَنطقِه و یَهودیه ای مَنطقِه ای جا 8و هَمینجور اورشلیم و اَدومیِه ای مَنطقِه و اُردُن روخِنِه ای اون دَس و صور و صیدونی دور و وَری جا، عیسایی دِمال بوردِنِه. وختی اون گَتِ جَماعت عیسایی دِشتی کارایی خَوَرِ بِشنُسِنِه، وی وَر بیمونِه. 9اون اِزدحامی خاطری گه اوجِه دَوِنِه، عیسی شی شاگِردِنِه بُتِه تا مَردِن وی سَر نَکِتِنِه یَتِه لوتکا ویسِه آمادِه هاکِنِن. 10چون عیسی خِیلیارِه شَفا هادا وِه، هَینِسه دِشتِه مَریضِن وی سَمت هجوم اُردِنِه تا وِرِه دَس هاکِنِن. 11هر وَخت پَلیدِ اَرواح عیسی رِه وینِسِنِه، وی پِش بِنِه کَتِنِه و داد زووِنِه: «تو خدایی ریکائی!» 12و عیسی وِشونِه قَدِغَن کِردِه تا هیچ کَسی وَر نُئِن وی کیِه.
دِوازِه رَسول
13عیسی یَتِه کوهی سَر بوردِه و اونانیگه خوایسِه رِه شی کَفا بَخونِسِه، وِشون هَم وی وَر بیمونِه. 14وی دِوازِه نَفَرِ اِنتِخاب هاکِردِه و وِشونی اِسمِ رَسول بِشتِه، تا وی هَمرا دَوون و وِشونِه بَرِسانِّه تا مَردِنِ تعلیم هادِن، 15و هَین قدرت و اِختیارِ دارِن گه دِویشونِه دیرگا هاکِنِن. 16هون دِوازِه نَفری گه انتخاب هاکِردِه هَینِن وِنِه: شَمعون (گه عیسی وی اِسمِ پِطرُس بِشتِه)؛ 17یعقوب و یوحنا، زِبِدی ای ریک ریکا (گه وِشونی اِسمِ ’بوآنِرجِس‘، یَعنی ’رادی ریک ریکا‘ بِشتِه)؛ 18آندریاس، فیلیپُس، بَرتولْما، مَتّی، توما، یعقوب حَلْفایی ریکا، تَدّای، وَطَن پَرَستِ شَمعون، 19و یَهودا اَسْخَریوطی گه عیسی رِه دِشمَنی تَسلیم هاکِردِه.
20اَزما عیسی خِنِه بوردِه و اَی جَماعَت جَم بَوِنِه، جوریگه حتّی وی و وی شاگِردِن نَتِنِّسِنِه غذا بَخارِن. 21وختی عیسایی فامیلِن هَینِه بِشنُسِنِه، بوردِنِه تا وِرِه شی هَمرا بَوِرِن، چون گِتِنِه: «تور بَوِه.»
روح القُدوسِ کِفر بُتَن
22توراتی مَلِّمِن گه اورشلیمی جا بیمو وِنِه گِتِنِه: «بِعِلزِبول دارنِه،» و «دِویشونِ، دِویشونی رَئیسی کِمَکی هَمرا دیرگا کِنِّه.» 23پس عیسی وِشونِه شی کَفا بَخونِسِه و مَثَلی هَمرا وِشونِه بُتِه: «چِتی شیطان بَتِنِّه شِیطانِ دیرگا هاکِنِه؟ 24اگه یَتِه مملکتی دِلِه دِ دَسِگی دَوو، هون مملکت نَتِنِّه دَووم بیارِه. 25و اگه یَتِه خِنِه ای دِلِه دِ دَسِگی دَوو، هون خِنِه نَتِنِّه دَووم بیارِه. 26و اگه شِیطان هَم شی علِیه پِرِسِه و دِ دَسِه بَوو، نَتِنِّه دَووم بیارِه، بَلگی نابود وونِه. 27هیچکَی نَتِنِّه یَتِه قِدّارِ مَردی ای خِنِه ای دِلِه بورِه و وی مال و اموالِ غارت هاکِنِه، مَگِه هَینگه اَوَّل هون قِدّارِ مَردی رِه دَوِنِّه. اَزما حَیقَتاً بَتِنِّه وی خِنِه رِه غارت هاکِنِه.
28«حَیقَتاً شِمارِ گِمِه آدَمی زادی دِشتی گِناهِن و هر کِفری گه بُئِه بیامرزی وونِه؛ 29ولی هر کی روح القُدُسِ کِفر بُئِه، هیچ وَخت بیامِرزی نَوونِه، بَلگی وی گِناه تا اَبَد وی سَر مونِّه.» 30عیسی هَینِسه هَین گَبِ بَزو گه گِتِنِه: «وی پَلیدِ روح دارنِه.»
عیسایی مار و بِرارِن
31اَزما عیسایی مار و بِرارِن بیمونِه. وِشون دیرگا هِرِسانِه، یَنَفَرِ بَرِسانینِه تا عیسی رِه داد هاکِنِه. 32جَماعَتی گه عیسایی دُور و وَر نیشت وِنِه، وِرِه بُتِنِه: «تی مار و بِرارِن دیرگا دَرِنِه و تی دِمال گِردِنِنِه.» 33عیسی وِشونه بُتِه: «می مار و بِرارِن کینِه؟» 34اَزما اونانیگه وی دُور و وَر نیشت وِنِه رِه هارشیِه و بُتِه: «هَینِن می مار و بِرارِنِنِه! 35چون هر کی گه خِدایی خواسِّه رِه بِجا بیارِه، می بِرار و خاخِرِ و مارِ.»
Currently Selected:
مَرقُس 3: WMB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
مَرقُس 3
3
یَتِه مَردی ای شَفا گه وی دَس خِشک بَوِه وِه
1عیسی یَکَش دییَر یَهودینی عبادتگاهی دِلِه بوردِه. اوجِه یَتِه مَردی دَوِه گه وی یَتِه دَس خِشک بَوِه وِه. 2بعضیا عیسی رِه هاپِه داشتِنِه تا هارشِن مِقَدّسِ شَنبِه ای دِلِه هون مَردی رِه شَفا دِنِه یا نا، تا هَینجوری وی تِهمَت بَزوئَنی سِه یَتِه ویهومِه بَنگیرِن. 3عیسی هون مَردی گه وی دَس خِشک بَوِه وِه رِه بُتِه: «هَیجِه بِرِه.» 4اَزما وِشونی جا بَپُرسیِه: «مِقَدّسِ شَنبِه ای دِلِه خِبی هاکِردَن جایزِ یا بَدی هاکِردَن؟ یَنَفری جانِ نِجات هادائَن یا بَکوشتَن؟» ولی وِشون هیچی نُتِنِه. 5عیسی، اونانیگه وی دُور و وَر دَوِنِه رِه عَصبانیتی هَمرا هارشیِه و وِشونی سَنگ دِلی ای جا نارحت بَوِه. اَزما هون مَردی رِه بُتِه: «شی دَسِ دِراز هاکِن.» وی شی دَسِ دِراز هاکِردِه و وی دَس خار بَوِه. 6عِلَمای فِرقِه فَریسی دیرگا بوردِنِه و دَرجا هیرودیسِ پادشاهی هَوادارِنی هَمرا دَسیسِه دَچینِه گه چِتی عیسی رِه بَکوشِن.
یَتِخِیلی جماعَت عیسایی دِمال شونِنِه
7اَزما عیسی شی شاگِردِنی هَمرا دَریایی سَمت بوردِه. یَتِه گَتِ جماعَت هَم جلیلی مَنطقِه و یَهودیه ای مَنطقِه ای جا 8و هَمینجور اورشلیم و اَدومیِه ای مَنطقِه و اُردُن روخِنِه ای اون دَس و صور و صیدونی دور و وَری جا، عیسایی دِمال بوردِنِه. وختی اون گَتِ جَماعت عیسایی دِشتی کارایی خَوَرِ بِشنُسِنِه، وی وَر بیمونِه. 9اون اِزدحامی خاطری گه اوجِه دَوِنِه، عیسی شی شاگِردِنِه بُتِه تا مَردِن وی سَر نَکِتِنِه یَتِه لوتکا ویسِه آمادِه هاکِنِن. 10چون عیسی خِیلیارِه شَفا هادا وِه، هَینِسه دِشتِه مَریضِن وی سَمت هجوم اُردِنِه تا وِرِه دَس هاکِنِن. 11هر وَخت پَلیدِ اَرواح عیسی رِه وینِسِنِه، وی پِش بِنِه کَتِنِه و داد زووِنِه: «تو خدایی ریکائی!» 12و عیسی وِشونِه قَدِغَن کِردِه تا هیچ کَسی وَر نُئِن وی کیِه.
دِوازِه رَسول
13عیسی یَتِه کوهی سَر بوردِه و اونانیگه خوایسِه رِه شی کَفا بَخونِسِه، وِشون هَم وی وَر بیمونِه. 14وی دِوازِه نَفَرِ اِنتِخاب هاکِردِه و وِشونی اِسمِ رَسول بِشتِه، تا وی هَمرا دَوون و وِشونِه بَرِسانِّه تا مَردِنِ تعلیم هادِن، 15و هَین قدرت و اِختیارِ دارِن گه دِویشونِه دیرگا هاکِنِن. 16هون دِوازِه نَفری گه انتخاب هاکِردِه هَینِن وِنِه: شَمعون (گه عیسی وی اِسمِ پِطرُس بِشتِه)؛ 17یعقوب و یوحنا، زِبِدی ای ریک ریکا (گه وِشونی اِسمِ ’بوآنِرجِس‘، یَعنی ’رادی ریک ریکا‘ بِشتِه)؛ 18آندریاس، فیلیپُس، بَرتولْما، مَتّی، توما، یعقوب حَلْفایی ریکا، تَدّای، وَطَن پَرَستِ شَمعون، 19و یَهودا اَسْخَریوطی گه عیسی رِه دِشمَنی تَسلیم هاکِردِه.
20اَزما عیسی خِنِه بوردِه و اَی جَماعَت جَم بَوِنِه، جوریگه حتّی وی و وی شاگِردِن نَتِنِّسِنِه غذا بَخارِن. 21وختی عیسایی فامیلِن هَینِه بِشنُسِنِه، بوردِنِه تا وِرِه شی هَمرا بَوِرِن، چون گِتِنِه: «تور بَوِه.»
روح القُدوسِ کِفر بُتَن
22توراتی مَلِّمِن گه اورشلیمی جا بیمو وِنِه گِتِنِه: «بِعِلزِبول دارنِه،» و «دِویشونِ، دِویشونی رَئیسی کِمَکی هَمرا دیرگا کِنِّه.» 23پس عیسی وِشونِه شی کَفا بَخونِسِه و مَثَلی هَمرا وِشونِه بُتِه: «چِتی شیطان بَتِنِّه شِیطانِ دیرگا هاکِنِه؟ 24اگه یَتِه مملکتی دِلِه دِ دَسِگی دَوو، هون مملکت نَتِنِّه دَووم بیارِه. 25و اگه یَتِه خِنِه ای دِلِه دِ دَسِگی دَوو، هون خِنِه نَتِنِّه دَووم بیارِه. 26و اگه شِیطان هَم شی علِیه پِرِسِه و دِ دَسِه بَوو، نَتِنِّه دَووم بیارِه، بَلگی نابود وونِه. 27هیچکَی نَتِنِّه یَتِه قِدّارِ مَردی ای خِنِه ای دِلِه بورِه و وی مال و اموالِ غارت هاکِنِه، مَگِه هَینگه اَوَّل هون قِدّارِ مَردی رِه دَوِنِّه. اَزما حَیقَتاً بَتِنِّه وی خِنِه رِه غارت هاکِنِه.
28«حَیقَتاً شِمارِ گِمِه آدَمی زادی دِشتی گِناهِن و هر کِفری گه بُئِه بیامرزی وونِه؛ 29ولی هر کی روح القُدُسِ کِفر بُئِه، هیچ وَخت بیامِرزی نَوونِه، بَلگی وی گِناه تا اَبَد وی سَر مونِّه.» 30عیسی هَینِسه هَین گَبِ بَزو گه گِتِنِه: «وی پَلیدِ روح دارنِه.»
عیسایی مار و بِرارِن
31اَزما عیسایی مار و بِرارِن بیمونِه. وِشون دیرگا هِرِسانِه، یَنَفَرِ بَرِسانینِه تا عیسی رِه داد هاکِنِه. 32جَماعَتی گه عیسایی دُور و وَر نیشت وِنِه، وِرِه بُتِنِه: «تی مار و بِرارِن دیرگا دَرِنِه و تی دِمال گِردِنِنِه.» 33عیسی وِشونه بُتِه: «می مار و بِرارِن کینِه؟» 34اَزما اونانیگه وی دُور و وَر نیشت وِنِه رِه هارشیِه و بُتِه: «هَینِن می مار و بِرارِنِنِه! 35چون هر کی گه خِدایی خواسِّه رِه بِجا بیارِه، می بِرار و خاخِرِ و مارِ.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company