Rɔmënyüü 5

'MƲFAGOGO 'SREE ANA POLU 'KÄ

5.1–8.39

Nyɔsʋa 'pʋɔ amɩ, a nyra 'ɔɔn 'sɔɔ 'nönröwli

1'I 'na, ‑bɛ Nyɔsʋa 'daaa' ‑maa a bä 'klɩgänyüü ana nyɔsʋaplɛtorokʋa ‑gʋ nɩ, 'i känyrɩ 'wlinönrökʋ bä a nyra Nyɔsʋa kɔsɔa ‑tɔrʋpɩɔ ana 'Pläkänyɔɔ Jesu 'Kriisëa 'nyrɩklɩa ‑gʋ. 2'A 'ɔa plɛtorokʋa ‑gʋ 'ɔ 'sa amɩ 'ɔa ‑gbinanakʋa 'nyʋfɔa tatu 'klɩ, ‑bɛ a kʋ 'lɩ 'mʋfasa ‑mlatɩ. Dɔrʋ 'blaa amɩ 'be anya ‑pɩ Nyɔsʋaa 'bʋalakʋ 'jäa. 3'Pɩrɩgälɩ nɩ, ‑sʋɩ ma blö amɩ ‑gba nɩ, dɔrʋ 'blaa amɩ, 'be a jre 'iin 'sɩrɩ ‑sʋɩ jaa' plɛböblökʋ; 4'kä plɛböblökʋ ‑nyɛɛ amɩ 'klü amä ‑sʋɩ 'wʋsi; 'kä ‑sʋɩa 'wʋsisikʋ ja plɛgälɩpiepiekʋ. 5‑Bɛ plɛgälɩpiepiekʋ 'nyɩ ‑trɔɔrɔ nyɔɔ ‑a, 'be Nyɔsʋa ‑srörö 'Nyüna ‑Susulu 'ɔ ‑nyɩa' amɩ kälɩ 'ɔnya 'fɛrɛ ana polu ‑gälɩ 'ɔa ‑wawakʋ 'kä.

6'Iibä, 'taɩn 'lɩ anyɩ käa' 'klü kä, ‑bɛ 'ɔa 'taɩnlɩ jräa' 'wli nɩ, 'Kriisë nya jä ‑balʋnyüüa ‑gʋ. 7'I klalɩ nyɔɔ 'mä 'klɩgänyɔɔa ‑pi 'lɩ järä; ‑beeredɛ nyɔɔ 'mrɛɛ 'ɔ järä 'cɩca nyɔɔa ‑pi 'lɩ. 8‑Maa ‑jäsɩ Nyɔsʋa srara amɩ 'sɩrɩ 'ɔ ‑waa' amɩ: 'taɩn 'lɩ a ‑ka bäa' ‑balʋnyüü nɩ, 'a 'ia 'taɩn 'lɩ 'Kriisë jä ana ‑gʋ. 9‑Plɩɩ 'i ‑sia' ‑bɛ Nyɔsʋa 'daaa' a bä 'klɩgänyüü 'ɔa ‑torua ‑gʋ nɩ, ‑asɩ 'Kriisë ‑nëmä bɩa amɩ Nyɔsʋaa 'crɛ mlɩ 'ba le? 10A ‑ka jrara Nyɔsʋa 'nyüamlɩ, 'ɔnya ‑srörö 'ɔa 'Jʋa jäjä 'lɩ 'ɔnya 'nönrö amɩ 'wli. ‑Bɛ 'köklesaplɩɩ 'ɔ ‑ka bäa' 'lɩ ‑bɛ a 'nönröa' 'wli nɩ, ‑asɩ 'ɔ ‑nëmä amɩ 'lɩmlɩba le? 11‑Bɛ ‑mää 'ia 'doo ‑a: dɔrʋ 'blaa amɩ Nyɔsʋa 'lɩ, 'ɔ ‑sröröa' ana 'Pläkänyɔɔ Jesu 'Kriisë kälɩ ‑bɛ ɔ nröröa' amɩ 'wli a nyra 'ɔɔn kɔsɔ.

Adaan ‑bɛ 'Kriisë

12'Ii känyrɩ, nyɔɔ 'doo ‑balʋ ‑srörö kälɩ 'unya pa 'pläa 'mlɩ, ‑balʋ nya ja jäjä. Jäjä nya jrä nyüüa 'fɩɔ ‑gälɩ, 'be 'nyüüa 'fɩɔ nʋ ‑balʋ …#5.12 'Pɔɔlëa 'papawii pösö ‑tɛklɩ, 'inyɩ blö ‑a blö. 'Ɔ 'pa 'iin 'sɔɔwʋ waklüü 18 ‑taa ni ‑sia' waklüü 13-17. 13'Be ‑balʋ bä kä 'pläa 'mlɩ 'fɩɔwʋ ‑dɔ nya ji, ‑maa ‑dɔ ma 'nyɩ 'lɩ ‑a bä nɩ, Nyɔsʋaa ‑gbʋʋ ‑nëmä ‑balʋ ‑gba ‑a bä. 14‑Maa sɔrɔ Adaan a 'taɩn 'lɩ ‑a ji Moisëa 'taɩn 'lɩ nɩ, jäjä kälä kä nyüü 'klü ‑gälɩ, 'palɩ nyüülü 'nyɩa' Adaan a 'sa ‑balʋ#5.14 Adaan 'nyɩ 'lɩ wiili Nyɔsʋaa 'mʋgbɛ ‑gbalaa' ‑a nʋ (Jenɛɛsë 2.16-17). nʋ. 15‑Maa wiili Adaan nʋa' nyra Nyɔsʋaa 'flɛɛlɩa wiiwälɩcɛrɛkʋ 'nyɩ dɛɛ 'dee ‑a bä. Nyɔɔ 'dooa ‑balʋa ‑gʋ nyüü 'kɔkɔmlɛ ma jä nɩ, Nyɔsʋaa ‑gbinanakʋ ‑siwʋ ‑gböösa: nyɔɔ 'doo Nyɔsʋa ‑srörö kälɩ, Jesu 'Kriisëa ‑gbinanakʋ kälɩ 'ɔ ‑srörö 'ɔnya ‑gbäträ 'ɔa ‑gbinanakʋ nyüü 'kɔkɔmlɛ 'wʋ kä.

16Dɛɛlɛ Nyɔsʋa ‑nyɩa' nyra wiili jräa' 'lɩ nyɔɔ 'dooa ‑balʋa ‑gʋ 'nyɩ dɛɛ 'dee ‑a bä. Nyɔɔ 'dooa ‑balʋa ‑gʋ Nyɔsʋa nɩnɩa anyɩ ‑gä ‑a kä; 'ia ‑gʋ a bä 'pɔnɩnyüü. ‑Maa ‑balʋ 'kɔkɔmlɛ 'mä nrörökalɩ mi nɩ, Nyɔsʋa ‑nyɩ nyüü 'klɩgägäkʋ 'flɛɛlɩ. 17Jäjä ma kälä nyüü 'klü ‑gälɩ nyɔɔ 'dooa ‑balʋa ‑gʋ nɩ, nyɔɔ 'doo Nyɔsʋa ‑srörö kälɩ 'ɔnya ‑nyɩ nyüü i ‑sia' 'wʋ: nyüülü 'ɔ ‑nyɛɛa' 'ɔa ‑gbinanakʋlʋ 'ɔnyɩ 'mɩsɩa' nyra 'klɩgägäkʋ, 'ünya 'klä 'jäa Jesu 'Kriisëa 'dooa 'nyrɩklɩ 'kä 'ü nyra 'ɔɔn nya 'kama.

18'Ii känyrɩ, 'sɩrɩ ‑balʋ 'doo faa' nyüüa 'fɩɔ 'pɔnɩkʋ 'lɩ nɩ, 'asɩ nyɔɔ 'dooa 'klɩgägäkʋ fa nyüüa 'fɩɔ 'klɩgägäkʋlʋ ‑nyɛɛa' 'kläa 'mlɩ. 19Nyɔɔ 'doo 'nyɩa' Nyɔsʋaa mlɩa wii nyɔɔwʋba nɩ, 'a 'ia ‑gʋ nyüü 'kɔkɔmlɛ nʋ ‑balʋnyüü. 'Asɩ nyɔɔ 'doo 'ba Nyɔsʋaa mlɩa wii nyɔɔwʋ nyüü 'kɔkɔmlɛ nya nʋ 'klɩgänyüü. 20‑Dɔlɔ nɩ, 'u ji bʋbɔgbi 'mä ‑sümlö ‑gböösa. ‑Maa ‑plɩɩlɩ ‑balʋ ‑sümlöa' nɩ, Nyɔsʋaa ‑gbinanakʋ 'papla 'sɔɔwʋ ‑gälɩ. 21‑Kätɩsa ‑balʋ ma kälä nyüü 'klü ‑gälɩ 'u ja jäjä, 'asɩ Nyɔsʋaa ‑gbinanakʋ nëmä nyüü 'klügälɩ kälä 'umä 'üün 'klɩgä, 'ümä ana 'Pläkänyɔɔ Jesu 'Kriisë kälɩ ‑srörö 'ümä 'klälä 'nyɩa' blöröfa kä 'jä.

Currently Selected:

Rɔmënyüü 5: Bakwé

Highlight

Copy