Jenɛɛsë 50

Jakɔɔbëa 'dugu

1Josɛɛfë nya blö 'ɔa tʋa 'klʋɩ, 'ɔnya kpla 'ɔɔn 'ɔnya 'wu. 2'Ɔnya ‑gbala 'ɔa ‑dɔtë 'ü ‑nyɩgla 'ɔa tʋa jäjäa nɔ#50.2 Nyüülü käa' mölii Ejiipëtëa 'bre, 'üü mama 'üa jäjänyüü 'napɛ nyra ‑wöseri ‑gbakä 'ü ‑pɩ ‑fɛ sɔsɔ. 'Kä 'ü ‑fifra jäjänyɔɔlɔ 'fʋmadɔʋ, 'fɩɔwʋ 'kä 'ü 'pie 'ɔɔn 'cɩtɛ 'dokloee 'lɩ. ‑Bɛ Josɛɛfë bäa' nyɔɔ kpakö nɩ, 'asɩ 'ɔ nʋ 'ɔa tʋ. kä. 'Ünya ‑nyɩgla Israɛɛlëa jäjäa nɔ 'kä. 3'Asɩ 'ü nö jäjänyɔɔ jrüüa ‑glʋɩsɔɔ. 'Ɔa ‑gʋ Ejiipëtënyüü nya kʋ 'dugu 'lɩ jrüüa ‑glʋɩtää ‑bɛ ‑pʋ.

4'Ɔa 'dugu 'wlaraa' nɩ, Josɛɛfë nya ‑gbala Faraɔɔn a ‑gböölia nyüü ‑maa: «'N bibie 'amɩ, ‑na ‑gbinanakʋ ma bä 'amɩ ‑gälɩ, 'ba fa Faraɔɔn wii ‑maa: 5‹'Na tʋ ‑gbala kä 'mɩ ‑a 'sɔrɩ, 'ɔ ‑nëma: ‟'Na jäjä ‑srɩ jö, ‑träärä 'mɩ 'dasulu 'n 'kotoa' 'na ‑gʋ Kanaan a 'blɩ ‑gälɩ, 'ua 'mlɩ.”› 'Ia ‑gʋ, 'n bibie Faraɔɔn ɔ 'nyie 'mä 'lɩ mi 'mä 'lɩ 'na tʋ ‑träärä ‑bɛ 'mä ji.» 6Faraɔɔn nya ja wii, 'ɔ ‑nëma: «Mi ‑mä ‑na tʋ ‑tʋ 'sɩrɩ 'ɔ ‑gbala käa' ‑mɩ, ‑bɛ ‑sɔɔrɩ käa'.»

7Josɛɛfë nya mi 'ɔmä 'ɔa tʋ ‑tʋ, 'ɔɔ ‑bɛ Faraɔɔn a 'jrʋpafɛnyüüa 'fɩɔ, nyra Faraɔɔn a ‑gböölia tagbü, nyra Ejiipëtëa 'blɩ ‑gälɩa tagbüa 'fɩɔ. 8Josɛɛfë nya fa 'ɔa ‑gböölinyüüa 'fɩɔ, 'ɔa ‑wlajü, nyra 'ɔa tʋa nyüü. ‑Maa 'üa 'jüjie, nyra 'üa mlaa, 'üa bruu 'ü tɩ 'üün Gosɛnë. 9Nyüülü nyra diili jaraa' 'ɔɔn 'üü bä jakasɩa 'mlɩ, nyra nyüülü 'tierea' ‑sɩ. Nyüülü bä käa' 'lɩ 'üa ‑srɩ 'nyɩ ‑pɛ ‑a ‑pɛ. 10'Ü 'tɔa' ‑bleee bɔtrɔfalä 'ü 'daraa' Atadë, Jurëdɛɛn a 'kɔtʋ ‑moloo ‑gälɩ nɩ, 'a ‑plɩɩ 'ü nrörö 'dugu. Josɛɛfë nya kʋ 'ɔa tʋa 'dugu 'lɩ jrüü ‑uunsɔɔ. 11'Taɩn 'lɩ Kanaanyüülü kʋa' ‑nyɛɛ 'jäa' 'dugulu ‑sröröa' Atadëa Bɔtrɔfa 'wʋ nɩ, 'ü ‑nëma: «Ejiipëtëa 'dugu kpaku kʋ pɩ!» 'A 'ia ‑gʋ 'ü 'dara bɔtrɔfalä kʋa' Jurëdɛɛn a 'kɔtʋ ‑moloo ‑gälɩ, Abɛlë Misraimë#50.11 Abɛlë Misraimë: 'Ia ‑gbaa bä: Ejiipëtëa 'dugu.. 12'Asɩ Jakɔɔbëa 'jü nʋ kä wiili 'üa tʋ ‑gbala käa' 'üün. 13'Ɔa nyɩbejü nya fa 'ɔɔn Kanaan a 'blɩ ‑gälɩ, 'ünya ‑träärä 'ɔɔn 'täkä 'dasulu bäa' Makpelaa ‑tʋtʋ ‑gälɩ, 'äa 'mlɩ. 'A ‑putulu Abraamë ‑sroro käa' Itinyɔɔ Eflɔɔn kälɩ, ‑bɛ 'ɔ nröröa 'ɔa 'dasu 'lɩ; Mamirebätäa 'klɔɔtrʋ. 14'Ɔ bɩaa' 'ɔa tʋ ‑tʋtʋkʋ nɩ, Josɛɛfë nya 'blöö Ejiipëtë dɛrɩ, 'ɔɔ ‑bɛ 'ɔa ‑wlajü nyra nyüülü kä 'fɩɔ jaraa' 'ɔɔn 'ɔa tʋa 'digböli.

Josɛɛfë 'paa' 'ɔa ‑wlajü plɛmlɩ

15Josɛɛfëa ‑wlajü 'jäa' 'sɩrɩ 'üa tʋ jä nɩ, 'ü ‑nëma: «‑Beeredɛ ana 'crɛ 'blaa Josɛɛfë. Bʋbɔgbili kä 'fɩɔ a nʋ 'ɔɔn ‑gba. 'Ɔ 'mrɛɛ ɔ 'sara amɩ 'ɔa 'kpa ‑gälɩ!» 16'Ia ‑gʋ 'ünya fa Josɛɛfë wii ‑maa: «‑Na tʋ ‑gbala amɩ 'fɩɔwʋ 'ɔnya 'mä jä: 17‹‑Jäsɩ 'a nëmä Josɛɛfë ‑gbala: 'N bibie ‑mɩ 'paʋn, cere ‑na ‑wlajüa ‑balʋ nyra 'üa bʋbɔgbi, 'kasa 'ü nʋ ‑mɩ bʋbɔgbi ‑gba, 'n bibie ‑mɩ cere ‑na tʋa Nyɔsʋaa 'jrʋpafɛnyüüa ‑balʋ!› » Josɛɛfë 'nua' 'iin 'wli nɩ, 'ɔnya 'wu. 18'Ɔa ‑wlajüa 'mʋgbɛ nya ji, 'ünya 'pala 'ɔa 'klʋɩ kotifli; 'ü ‑nëma: «‑Jää amɔ, ‑na ‑goou a bä!» 19'Iibäa' Josɛɛfë nɩ: «Ŋalɛ 'nyɩ 'bla 'amɩ, ‑mää 'mɔɔ 'nyɩ Nyɔsʋa bä. 20'Amɔlɔ nɩ, 'a ‑jra kä 'iin 'amä 'mɩ ‑balʋ ‑gba nʋ, ‑maa Nyɔsʋa nya ‑jra 'iin 'ɔmä 'mɩ 'cɩca a ‑gbi ‑gba nʋ 'sɩrɩ a 'jäa' 'iin 'wʋ 'saarɩ: nyüü 'kɔkɔmlɛ nya 'lɩmlɩwʋa. 21'Ii kä 'nyrɩ ŋalɛ 'nyɩ 'bla 'amɩ. 'Nyaa 'amɩ 'klɩfinia, 'amɔ ‑bɛ 'ana 'jü.» 'Asɩ 'ɔ nʋ 'ɔnya 'pa 'üün plɛmlɩ.

22Josɛɛfë kʋ kä Ejiipëtë, 'ɔ nyra 'ɔa tʋa ‑gböölia nyüü. 'Ɔa ‑sɩa ‑glʋɩgböö ‑sɩ ‑pʋ (110). 23Josɛɛfë 'jä Efraimëa 'jüa 'jüa 'jü. 'Ɔnya dɔrɔ Manasɛa 'jʋ Makirëa 'jü 'wʋ ‑beere 'ɔa 'sɔrɔjü#50.23 Ebrööwii nö: Manasɛa 'jʋ Makirëa 'jülü nɩ Josɛɛfëa bei 'wʋ 'ü ‑glooro.. 24Josɛɛfë nya ‑gbala 'ɔa ‑wlajü, 'ɔ ‑nëma: «'Na jäjäsrɩ jö. ‑Maa Nyɔsʋa nya 'amɩ 'lɩmlɩbaa, 'kä 'ɔnya 'amɩ ‑taa ‑tʋtʋlʋa ‑gälɩ 'ciea. ‑Tʋtʋlʋ 'ɔ 'daa käa' 'ɔmäa' Abraamë, Isaakë nyra Jakɔɔbë ‑nyɩ nɩ, 'ɔnya 'amɩ 'uun ‑nyɩa.» 25Josɛɛfë nya ‑gbala Israɛɛlëa 'jü ü 'sɔrɩ, 'ɔ ‑nëma: «Nyɔsʋa ma ji 'amɩ 'lɩmlɩba nɩ, 'a kä 'amä 'na 'koi fa.»

26Josɛɛfë kä ‑sɩa ‑glʋɩgböö ‑sɩ ‑pʋ (110) 'ɔnya jä. 'Ünya ‑nyɩgla 'ɔa jäjäa nɔ 'kä 'ünya 'pa 'ɔɔn 'dokloee 'lɩ Ejiipëtëa 'bre.

Currently Selected:

Jenɛɛsë 50: Bakwé

Highlight

Copy