Jenɛɛsë 43

Jakɔɔbë 'nyiea' Bɛnjamɛɛ 'mä Ejiipëtë mi

1‑Gbëkananie 'paalɩ 'klüa 'doo. 2‑Bleeelɛ 'ü 'baa' Ejiipëtë bɩaa' 'lɩ nɩ, Jakɔɔbë nya ‑gbala 'üün ‑maa: «'Ba 'blöö dɛrɩ 'amä jijri jie ‑su!» 3Judaa ‑nëma: «‑Jäsɩ nyɔɔlɔ ‑gbalaa' amɩ: ‹'Ana ‑wlajʋ ma 'nyɩ 'ana ‑tɔrʋpɩɔa ‑a bä, 'a ‑ka ‑nëmä 'na 'klʋɩ ‑a 'jä.› 4'Ii känyrɩ ‑ama nya amɩ ana ‑wlajʋ ‑nyɩ a nyra 'ɔɔn 'mä 'lɩmlörö nɩ, anya ‑na jijri ‑sua; 5‑maa ‑ama 'nyɩ 'nyie ‑a 'nyie a nëma mi ‑a mi, 'be nyɔɔlɔ ‑gbala amɩ ‑maa: ‹'Ana ‑wlajʋ ma 'nyɩ 'ana ‑tɔrʋpɩɔ ‑a bä, 'a ‑ka ‑nëmä 'na 'klʋɩ ‑a 'jä.› » 6Israɛɛlë ‑nëma: «Dɛplɛɛ kä ‑gʋ 'a nö 'saa ‑bɛ 'a mɩmɩa 'mɩ, ‑bɛ 'a ‑gbala nyɔɔlɔ 'sɩrɩ 'a käa' ‑wlajʋ ‑moloo le?» 7'Ü ‑nëma: «Ana napioa wii nyra ana 'mʋgbɛa wii nyɔɔlɔ 'betre amɩ 'lɩ. 'Ɔ 'bete amɩ ‑maa: ‹'Ana tʋ ‑ka bä 'plä 'wʋ? 'A kä ‑wlajʋ ‑moloo?› Anya 'sa 'ɔɔn ‑gälɩ. Anyɩ 'sa ‑a jre 'sɩrɩ 'ɔmä ɩa' 'daa: ‹'Ba ja 'ana ‑wlajʋ!› »

8Judaa nya ‑gbala 'ɔa tʋ Israɛɛlë: «‑Nyɩ 'mɩ 'ɔɔn kälɩ amä 'wʋsɔ amä mi a ‑pɩ jä, 'palɩ ‑mɩ ‑a ‑paalɩ ana 'jü! 9'Mɔɔ kälä 'ɔa wii ‑gba. Ama 'nyɩ ‑mɩ 'ɔɔn ‑a ja nɩ, 'mɔɔ ‑a ‑beetre 'ɔa wii 'lɩ: ama 'nyɩ ‑mɩ 'ɔɔn ‑a ‑nyɩ, jresaa 'mɔɔ bä 'plɔʋplɔʋ ‑na ‑balʋnyɔɔ. 10Ama 'nyɩ ɩ dɛrɩ ‑a ‑wlɛ ɩ nɩ, anyaa' ɩ mimikʋa ‑gʋ 'sɔɔ ka.»

11'Üa tʋ Israɛɛlë ‑nëma: «'I 'na, ima bäsaa nɩ, 'ama nëmä mi nɩ 'ba 'pa 'ana ‑pöötia 'mlɩ ana 'brea 'cɩcadii 'amä nyɔɔlɔ 'crɛrɛ. 'Ba fa 'nɔnʋpadii jie: 'nɔnʋpafʋfʋʋ, 'nɔnʋpakpɩ, nyra 'miirë#43.11 'nɔnʋpafʋfʋʋ, 'nɔnʋpakpɩ, nyra 'miirë: 'Ia dii täälä nɩ, Ebrööwii 'lɩ bäsaa. 'Nʋnʋpadii bäsaa; Ejiipëtëa 'bre ‑dɔtë në 'imɩ ‑bɛ 'ü ‑futo nyüü, 'ii 'ü 'paa bɩa jäjänyɔɔ ‑gba 'ɔ ‑pɩ ‑fɛ.. 'Ba fa dʋgbakpɩ, ana brea 'drëkalë 'jaju, nyra ‑gbaklatuua 'jaju. 12'Ba fa mölii 'kɔkɔmlɛ; kä 'a fa bɩa 'üa möliili a 'järäa' 'ana ‑bɛjʋ 'lɩ. ‑Beeredɛ ‑trɔtrɔkʋ bäsaa. 13'Ba dɔrɔ 'ana ‑wlajʋ 'wʋ 'a nyra 'ɔɔn 'mä nyɔɔlɔa ‑nyɛɛ dɛrɩ 'blöö! 14Abɩa Ɛlë Sadaii#43.14 Ɛlë Sadaii: «Ɛlë» a ‑gbaa bä: Nyɔsʋa Ebrööwii 'lɩ. «Sadaii» a ‑gbaa bä: 'Wʋsɔɔrɔnyɔɔ. Bakʋɛɛwii 'lɩ 'ii 'mrɛɛ 'i bä 'Nɩmrɛɛ Nyɔsʋa. nʋ 'imɩ nyɔɔlɔ 'mä 'ana nyatɛrɩ 'jä ‑oo; 'kä ɔ 'cɛrɛ 'amɩ ‑wälɩ 'a nyra 'ana ‑wlajʋ ‑mɔlɔ nyra Bɛnjamɛɛ 'mä 'lɩ jrörö ‑oo! 'Aiɛ ima 'daa, 'mɔɔlɔ 'asɩ 'na 'jü 'mä 'mɔmlɔ nɩ, 'asɩ i bä!»

15'Ünya dɔrɔ 'crɛrɛdiili nyra mölii 'kɔkɔmlɛ 'wʋ, nyra bɩa Bɛnjamɛɛ, 'ünya mi kä 'üa nyüfë Josɛɛfë 'klɩ srarakalɩ Ejiipëtëa 'bre. 16Josɛɛfë 'jäa' Bɛnjamɛɛ 'üa ‑tɔrʋpɩɔ nɩ, 'ɔnya ‑gbala 'ɔa ‑gböögälɩglaranyɔɔ ‑maa: «Fa nyüülü ‑gbööli. 'Bla mrɛɛ 'kä pi 'ɛɛn; 'nyraa 'üün 'mä 'wʋ tara ‑sopuwla.» 17Nyɔɔlɔ nya nʋ wiili Josɛɛfë ‑gbala 'ɔɔn, 'ɔnya fala nyüülü Josɛɛfëa ‑gbööli. 18'Ɔ faa' 'üün Josɛɛfëa ‑gbööli nɩ, ŋalɛ 'blaa 'üün. 'Ü ‑nëma: «'A möliili a 'järä käa' ana ‑bɛjʋa 'mlɩ nɩ, 'ia ‑gʋ 'ü ja ‑tɛ amɩ. 'Ɔmä amɩ ‑gbigba nʋ 'a 'ia ‑gʋ 'ɔ ja amɩ 'ɔa ‑gbööli, 'ɔmä amɩ 'kpla; 'ɔmä ana ‑sʋbru 'kpla, amä 'ɔa ‑goou bä!» 19'Ünya jijrö Josɛɛfëa ‑gböölia 'jrʋpafɛnyüüa 'cifi ‑gba; nyukumla 'klɩ 'ünya ‑gbala 'ɔɔn, 20'ü ‑nëma: «Tɛrɩkä ‑o, 'pläkänyɔɔ, anyaa' kä ‑tɛ jijri ‑sroorokalɩ ji. 21'Taɩn 'lɩ a ji käa' ‑bɛ a ‑sua' jijri a 'blööa' dɛrɩ nɩ, a 'tɔa' ‑plɩɩlɩ amäa' prere 'nyʋfɔ 'wʋ nɩ, amä ana ‑bɛjʋ jejekalɩ mi nɩ, ana 'fɩɔ ana ‑bɛjʋa 'mlɩ a 'järä 'lɩ ana möliili a nʋa' ‑bɛ a ‑sua' jijri. 'Ii a ja 'amɩ. 22Anya ja mölii ‑mɩdoo amä jijri ‑su. Nyɔɔlɔ plaa' ana mölii ana ‑bɛjʋa 'mlɩ, 'anyɩ 'ɔɔn jre ‑a jre.»

23Nyɔɔlɔ ‑nëma: «Ŋalɛ 'nyɩ 'bla 'amɩ! 'Ana tʋa Nyɔsʋa, 'ɔɔ ‑nyɩ 'amɩ 'bɩɔ 'ana ‑bɛjʋa 'mlɩ. ‑Maa 'ana ‑kätɩ möliili nɩ, 'n 'jä 'iin.» 'Ɔnya ja 'üün Simeɔɔn.

24Nyɔɔlɔ nya pla 'üün Josɛɛfëa ‑gbööli, 'ɔnya ja 'üün 'nɩ 'ümä 'üa bökli ‑gba su. 'Ɔnya ‑nyɩ 'üa ‑sʋbru jijri. 25'Ünya ‑nyɩgla 'üa 'crɛrɛdii 'kä ‑bɛ 'ü ‑glaa Josɛɛfë 'be 'ɔnya jia ‑sopuwla; 'be 'ü ‑gbala 'üün 'sɩrɩ 'ü nyra 'ɔɔn 'mäa' 'wʋ tara. 26Josɛɛfë 'tɔa' ‑gbööli 'ünya srara 'ɔɔn 'crɛrɛdiili 'ü jaa' 'ɔɔn; 'ünya 'pala 'ɔa 'klʋɩ kotifli. 27'Ɔnya 'bete 'üün 'üa fugba 'lɩ ma 'na. 'Ɔ ‑nëma bɩa «'Ana 'klɩbɩa tʋlɔ bä ‑plɩɩ? 'Ɔa fugba 'na?» 28'Iibäa' 'üün: «‑Na 'jrʋpafɛnyɔɔ ana tʋa fugba 'na ‑o. ‑Yɛɛ 'a ‑plɩɩ 'ɔ bä ‑o.» 'Ünya 'pa 'sɔɔwʋ kotifli, 'ünya torowlifli 'sɔɔwʋ. 29Josɛɛfë dɔrɔa' 'ɔa 'nyü 'wʋ 'ɔnya 'jä 'ɔa ‑wlajʋ Bɛnjamɛɛ, 'ɔa 'yioa nyɩbɛrʋlɔ 'ɔ nyra 'ɔɔn sɔa' 'yio 'lɩ. 'Ɔ ‑nëma: «'Abɩa 'ana ‑wlajʋlɔ kä ‑gä 'a ‑gbala käa' 'mɩ, 'ɔɔ kʋ ‑pɩ?» 'Ɔnya ‑gbala 'jʋlɔ: «'Na 'jʋ, abɩa Nyɔsʋaa ‑gbinanakʋ bä ‑mɩ ‑gälɩ!» 30Josɛɛfëa ‑wlajʋa nyatɛrɩ nya ‑si 'ɔɔn 'klɩ 'ɔ 'bata 'ɔmä 'wu, 'ɔnya pa sɔsɔ 'crʋgba 'dööa 'mlɩ 'ɔnya mi 'wukalɩ. 31'Ɔnya sua' 'ɔa 'klʋɩ 'ɔnya ji. 'Ɔnya 'kpla 'ɔa plɛ 'ɔ ‑nëma: «'Ba ja jijri!» 32'Ünya ja 'ɔɔn jijri: Josɛɛfëa ni bä 'ia ‑pɩɔ 'dɔ, ‑bɛ 'ɔa ‑wlajüa ni bä 'ia ‑pɩɔ 'dɔ. Ejiipëtënyüü bäa' 'ɔa ‑gba, 'üa 'mʋgbɛa ni bä 'ia ‑pɩɔ 'dɔ; 'be Ejiipëtënyüü nyra Ebröönyüü 'nyɩ tara 'wʋ. 'Üa ‑nyɛɛ 'i bä cacɩ 'wʋ. 33'Ünya kɔkɔwälɩ 'ɔa 'klɔɔtrʋ. 'Sɩrɩ 'üa ‑sɩ 'totroa' 'klɩ, 'asɩ 'ü nʋ 'ünya kɔkɔwälɩ; ‑bɛ 'ü tɛtrɛklɩ. 'I 'kala 'üün plɛklɩ. 34Josɛɛfë nya 'daa 'ü ‑päälä jijrili bäa' 'ɔa 'töwlö ‑gälɩ, 'ɔa ‑wlajü 'lɩ. ‑Maa abɩa Bɛnjamɛɛa nɩ ‑si 'ɔa ‑wlajüa ni 'wʋ ‑gböö 'wʋ. 'Ü nyra Josɛɛfë nya 'mla 'nʋ, dɔrʋ nya 'bla 'üün.

Currently Selected:

Jenɛɛsë 43: Bakwé

Highlight

Copy