Jenɛɛsë 35

Jakɔɔbë sɔa' Sikɛmë, 'ɔ 'blööa' Bɛtɛlë dɛrɩ

1Nyɔsʋa nya ‑gbala Jakɔɔbë: «Sɔwʋ, mi ‑a kʋ Bɛtɛlë. ‑Plɩɩlɩ Nyɔsʋa 'tɔrɔ käa' ‑mɩ 'klɩ, 'taɩn 'lɩ fɔlɔ käa' ‑na ‑wlajʋ Esau 'klɩ.#35.1 Jenɛɛsë 28.11-17.» 'A ‑nyɛɛ ‑a ‑paala 'ɔa ‑gbɔsatöwlö. 2Jakɔɔbë nya ‑gbala 'ɔa ‑gböölia nyüüa 'fɩɔ, nyra nyüülü ‑mülü kä 'fɩɔ nyra 'ɔɔn 'nyɛɛa', 'ɔ ‑nëma: «'Ba 'babalɩ ‑wäsɩalü bäa' 'ana ‑tɔrʋpɩɔ, 'ba ‑futo, 'ba 'cici 'ana 'sosroodii 'amä ‑fre 'lɩ sɔ! 3'Ba sɔwʋ amä Bɛtɛlë mi, 'mä Nyɔsʋaa ‑gbɔsatöwlö 'pie. 'Ɔɔ ji 'mɩ ‑gba 'taɩn 'lɩ 'n bä käa' ‑sʋɩ 'lɩ. ‑Plɩɩlɩ kä 'fɩɔ 'n ‑sröröa' 'ɔɔ bä kä 'na ‑gba.» 4'Ünya ‑nyɛnyɛ 'üa ‑wäsɩa nyra ‑yrɔgbɩlɩ bäa' 'üa 'nyakli 'lɩ, 'iia 'fɩɔ Jakɔɔbë. 'Ɔnya ‑goolo 'bütügba terebitëtuulu#35.4 terebitëtuulu: Tuu kpakö bäsaa. Tɛ Jenɛɛsë 12.6. bäa' Sikɛmëbätäa ‑gbaa ‑wälɩ, 'ünya bere 'lɩ diilia 'fɩɔ 'mlɩ 'ünya kpa 'ään 'klɩ. 5'Ünya dɔrɔ 'üa dii 'wʋ 'ünya mi. Nyɔsʋaa ŋalɛ nya ‑gbaala bätë ‑mülü traraa' 'üün 'klɩa ‑gälɩ, 'ia ‑gʋ 'ü ‑kanyɩ Jakɔɔbëa 'jü dɛrɩ ‑a prɛ.

6Jakɔɔbë nyra nyüülü kä 'fɩɔ nyra 'ɔɔn ‑nyɛɛa' nya 'tɔ Lusëbätä, Kanaan a 'blɩ ‑gälɩ. 'Ää 'ü 'dara bɩa Bɛtɛlë. 7Jakɔɔbë nya 'pala ‑plɩɩ ‑gbɔsatöwlö, 'ɔnya 'dara ‑plɩɩlɩ «Ɛlë Bɛtɛlë#35.7 Ɛlë Bɛtɛlë: 'Ia ‑gbaa bä: Bɛtɛlëa Nyɔsʋa.», 'be 'a ‑plɩɩlɩ Nyɔsʋa 'tɔrɔ kä 'ɔɔn 'klɩ, 'taɩn 'lɩ 'ɔ fɔlɔ käa' 'ɔa ‑wlajʋ 'klɩ. 8'A ‑plɩɩ Rebekaa 'jrʋpafɛŋlʋʋ Debora 'mɔlɔ. 'Ünya ‑träärä 'ɔɔn Bɛtɛlëa ‑gba, Terebitëtuu ‑wälɩ. 'Ia ‑gʋ 'ü ‑nyɩ tuulu 'Dugutuu#35.8 'Dugutuu: Ebrööwii 'lɩ 'iibä: Alɔɔn Bakutë. 'nyrɩ.

9Jakɔɔbë 'ciea' Padan Aramë nɩ, Nyɔsʋa nya 'tɔrɔ 'ɔɔn 'klɩ 'klaa 'sɔɔwʋ, 'ɔnya 'pa 'ɔɔn 'nɩ. 10Nyɔsʋa nya ‑gbala 'ɔɔn: «‑Na 'nyrɩ bä Jakɔɔbë, ‑maa ‑na 'nyrɩ ‑ka ‑nëmä Jakɔɔbë ‑a bä, ‑na 'nyrɩ bä ‑mlatɩ Israɛɛlë#35.10 Israɛɛlë: 'Ia ‑gbaa bä: 'Ɔ nyra Nyɔsʋa 'sɔ trii..» 'Ɔnya ‑nyɩ 'ɔmɩ Israɛɛlë 'nyrɩ 'lɩ. 11Nyɔsʋa nya ‑gbala 'ɔɔn:

«'Mɔɔ bä Ɛlë Sadaii#35.11 Ɛlë Sadaii: «Ɛlë» a ‑gbaa bä: Nyɔsʋa Ebrööwii 'lɩ. «Sadaii» a ‑gbaa bä: 'Wʋsɔrɔnyɔɔ. Bakwʋɛwii 'lɩ 'ii 'mrɛɛ 'i bä 'Nɩmrɛɛ Nyɔsʋa..

‑Gu! 'Paplagälɩ!

'Nyaa ‑na 'jüa 'jü 'plä nyra 'pläɩɩ 'lɩnröröa

'kä ‑nya 'kɩɩɩ ‑gua.

12'Blɩlɩ 'n ‑nyɩ käa' Abraamë nyra Isaakë,

'nyaa ‑mɩ 'iin ‑nyɩa;

‑Na 'jüa 'jülü nëmäa' ‑mɩ 'klɩtroro nɩ,

'nyaa 'üün 'blɩlɩ ‑nyɩa.»

13‑Plɩɩlɩ Nyɔsʋa 'palaa käa' Jakɔɔbë wii ‑gba nɩ, 'a ‑plɩɩ Nyɔsʋa tɩ kä 'ɔɔn 'ɔnya 'jra. 14‑Plɩɩlɩ Nyɔsʋa 'pala käa' 'ɔɔn wii ‑gba nɩ, 'a ‑plɩɩ Jakɔɔbë 'sri plɛpatäkä 'kä, 'ɔnya ‑tapa, 'ɔnya ‑gblɔɔ 'ään 'kpɩ 'wʋ 'kä. 15‑Plɩɩlɩ Nyɔsʋa 'pala käa' Jakɔɔbë wii ‑gba nɩ, 'a ‑plɩɩlɩ 'ɔ 'dara Bɛtɛlë#35.15 Bɛtɛlë: 'Ia ‑gbaa bä: Nyɔsʋaa nyuku..

Rasɛɛlë 'mɔlɔa'

16'Ünya sɔ Bɛtɛlë. Ɛfratabätä 'ü nëmä ɩ 'tɔ ‑bɛ Rasɛɛlëa ‑glooro 'nyʋfɔ 'wʋ. 'Ɔa ‑gugukʋ ‑tʋ 'ɔɔn ‑gbɛɛ ‑gälɩ. 17'Ɔ 'jää ‑gälɩsɔsrɔkʋa mɩmɩakʋ, ‑dɔtaŋlʋʋ nya ‑gbala 'ɔɔn: «Ŋalɛ 'nyɩ 'bla ‑mɩ, nyɩbɛjʋ ‑nëmä ‑gu 'sɔɔwʋ!» 18‑Maa 'ɔ jäa' ‑bɛ 'ɔ möa' nɩ, 'ɔnya 'dara 'jʋlɔ Bɛnë Oni#35.18 Bɛnë Oni: 'Ia ‑gbaa bä: 'Na ‑sʋɛa 'jʋ.. ‑Maa 'ɔa tʋ nya ‑nyɩ 'ɔɔn Bɛnjamɛɛ#35.18 Bɛnjamɛɛ: 'Ia ‑gbaa bä: 'Dupa 'darʋa 'jʋ 'aiɛ 'Na ‑jɔrʋ 'jʋ. 'nyrɩ. 19Rasɛɛlë nya jä. 'Ünya ‑träärä 'ɔɔn Ɛfrataa 'nyʋfɔ ‑gba. 'A bätälä 'ü 'dara 'saarɩ Bɛtëlɛɛmë. 20Jakɔɔbë nya 'sri 'ɔa 'dasu ‑gälɩ 'täkä 'kä. 'Dasutäkälä ‑ka bä 'saarɩ ‑plɩɩ.

21Israɛɛlë#35.21 Israɛɛlë: 'A Jakɔɔbëa 'nyrɩ dëdrä. Jenɛɛsë 35.10. nya mi, 'ɔnya 'pa 'ɔa ‑tete Migidalë Edee bätä dɛrɩ. 22'A 'blɩlɩa ‑gälɩ 'ü ma kʋ, Rubɛɛnë nya jre 'ɔa tʋ Israɛɛlëa ‑geeiŋlʋʋlɔ 'ü 'daraa' Bilia. 'Inya blö Israɛɛlëa 'nyakli 'lɩ.

Jakɔɔbëa nyɩbɛjü bä ‑pʋ ‑bɛ 'sɔɔ: 23Leaa nüa 'nyrɩ bä: Rubɛɛn, 'ɔa bä Jakɔɔbëa ‑kätɩ 'jʋ, Simeɔɔn, Levii, Judaa, Isakarë, nyra Sebulɔɔn. 24Rasɛɛlëa nüa 'nyrɩ bä: Josɛɛfë nyra Bɛnjamɛɛ. 25Rasɛɛlëa 'jrʋpafɛŋlʋʋ Biliaa nyɩbɛjüa 'nyrɩ bä: Daanë nyra Nafëtalii. 26Leaa 'jrʋpafɛŋlʋʋ Silipaa nyɩbɛjüa 'nyrɩ bä: Gaadë nyra Asɛɛrë. 'A Jakɔɔbëa nyɩbɛjülü ‑glooroa' Padan Aramë.

Isaakëa jäjäkʋ

27Jakɔɔbë nya 'blöö 'ɔa tʋ Isaakëa ‑nyɛɛ dɛrɩ, ‑tɛ Mamirebätälä 'ü 'daraa' bɩa Kiria Aba. Eblɔɔn bätä bäsaa. 'A ‑plɩɩ Abraamë nyra Isaakë ma kʋ ‑beere nyɔtugbanyüü. 28Isaakë kä ‑sɩa ‑glʋɩuunmlɔɔ (180). 29Isaakëa 'wli 'pɔlɔ ‑gböösa 'ɔnya ‑gblɔɔ ‑fʋflʋ 'kä 'ɔnya jä, 'ɔnya jrä ‑nyɛɛ 'ɔa tʋɩɩ. 'Ɔa nyɩbɛjü Esau nyra Jakɔɔbë nya ‑tʋ 'ɔɔn.

Currently Selected:

Jenɛɛsë 35: Bakwé

Highlight

Copy