Ɛfɛsënyüü 1

'Trɔrʋ

1'Mɔɔ 'Pɔɔlë bäa' Jesu 'Kriisëa apotrë 'sɩrɩ Nyɔsʋa 'bataa', 'mɔɔ ‑jɩjraa' 'amɩ 'wʋ, 'amɔ 'nyünanyüülü kʋa' Ɛfɛsëbätä, 'amɔ toroa' Jesu 'Kriisë plɛ. 2Abɩa Nyɔsʋalɔ bäa' ana Tʋ nyra ana 'Pläkänyɔɔ Jesu 'Kriisëa ‑gbinanakʋ nyra plɛgälɩflɛrɛkʋ bä 'amɩ ‑gälɩ.

'KRIISË 'PA AMƖ 'NYÜNA ‑SUSU 'WLI

1.3–3.21

Nyɔsʋa 'pa amɩ 'nɩ Jesu 'Kriisëa 'nyrɩklɩ

3Abɩa Nyɔsʋa 'bʋala, 'ɔɔ bä ana 'Pläkänyɔɔ Jesu 'Kriisëa Tʋ. 'Ɔ 'pa amɩ 'nɩ 'Kriisë 'lɩ, 'ɔɔ kälɩ 'ɔ ‑srörö 'ɔnya ‑nyɩ amɩ 'ɔa 'nɩpapakʋlʋa 'fɩɔ bäa' cɛa 'mlɩ. 4'Plä ‑kaaŋlʋ nrörö Nyɔsʋa nya 'balɩ amɩ 'Kriisë 'lɩ amä 'nyünanyüü nyra nyüülü 'nyɩa' bʋbɔdɛɛ ‑gba kä 'ɔa 'klʋɩ ‑gälɩ, 'ɔa ‑wawakʋ 'lɩ. 5'Ɔ 'a kä 'lɩ amɩ 'ba amä 'ɔa 'sɔrɔjü bä Jesu 'Kriisëa 'nyrɩklɩ; 'asɩ 'i käa' 'ɔmɩ 'tʋ, 'asɩ 'ɔ nʋ 'iin. 6'Ɔ nʋ 'imɩ amä 'ɔɔn 'lɩbrɛrɛ 'ɔa ‑gbinanakʋa 'wlibʋabʋakʋa ‑gʋ, u 'ɔ ‑sröröa' 'ɔa ‑wawajʋ kälɩ ‑bɛ 'ɔ ‑nyɩa' amɩ.

7'Kriisëa ‑toru Nyɔsʋa ‑srörö kälɩ 'ɔnya 'balɩ amɩ mlɩ, 'ɔɔ 'lɩ Nyɔsʋa cere amɩ ana ‑balʋ, 'ɔa ‑gbinanakʋlʋ ‑siea' 'wli, 'ia ‑gʋ. 8‑Bɛ wiijejrekʋ nyra 'lɩgaglakʋ 'sia' 'ɔɔn 'lɩ nɩ, 'ia ‑gʋ 'ɔ ‑gblɔɔ amɩ 'ia ‑gbinanakʋlʋ 'wʋ 'kä ‑gböösa. 9'Ɔ srara amɩ dɛɛlɛ ‑sisie ɩa' ɛ 'ɔmä ɩa' nʋ; dɛɛlɛ nɩ, 'ɔ 'a kä 'nyie 'ɔa ‑gbinanakʋ 'lɩ 'ɔmä 'ɛɛn nʋ 'Kriisë 'lɩ. 10'Taɩnlɩ 'ɔ ‑tʋa' 'lɩ jräa' 'lɩ nɩ, 'ɔnya 'papla diia 'fɩɔ ‑gba cɛɩɩa 'mlɩ nyra ‑tʋtʋa 'fɩɔa ‑gälɩ, 'ɔnya ‑tʋ 'ia 'wliklɩ 'kamanyɔɔ 'doo, 'ɔɔ bä 'Kriisë.

11A nyra 'ɔɔn bäa' nyüü 'doo nɩ, 'ia ‑gʋ a bä ‑jaajinyüü, 'be Nyɔsʋa 'a kä 'lɩ amɩ 'ba, 'sɩrɩ 'ɔ boboa'; 'sɩrɩ 'ɔ 'daaa' ‑bɛ 'ɔ 'bataa' 'asɩ 'ɔ nʋ diia 'fɩɔ, 12'kä Nyɔsʋa 'mä 'bʋala ana ‑gʋ, amɔlɔ ‑kätɩ toroa' 'Kriisë plɛ.

13'Ana 'mʋgbɛ 'a toro 'Kriisë plɛ. 'A 'nua' 'cɩcasalä bäa' 'Mʋfagogolä 'baaa' 'lɩ 'amɩ mlɩ nɩ, 'a toro 'Kriisë plɛ, Nyɔsʋa nya ‑tʋ 'amɩ tie nyüü 'mä 'saa jre 'sɩrɩ 'a bäa' 'ɔa nü. Tielɛ nɩ, 'ɛɛ bä 'Nyüna ‑Susulu 'ɔ 'daa käa' 'ɔmäa' amɩ ‑nyɩ. 14'Uu ‑kätɩ bä ana në ‑jaaa 'pɛlɛ Nyɔsʋa 'mäa' amɩ ‑nyɩ, ‑bɛ ama 'wʋlɩmlɩ nɩ, amä 'äa 'fɩɔ 'jä. 'Ɔ nʋ 'imɩ amä 'ɔɔn 'lɩbrɛrɛ 'ɔa 'wlibʋabʋakʋa ‑gʋ.

'Pɔɔlë bibie Nyɔsʋa

15'A 'ia ‑gʋ 'na 'mʋgbɛ 'nua' 'sɩrɩ 'a toroa' 'Pläkänyɔɔ Jesu plɛ, ‑bɛ 'a ‑waa' 'nyünanyüüa 'fɩɔ nɩ, 16'n ‑kaapɩɔ Nyɔsʋaa 'tɛtrɛɛkʋa ‑gʋ fio 'ana ‑gʋ. 'Asɩ 'n bibiea' Nyɔsʋa nɩ, 'n 'paa 'ana ‑gä plɛ. 17'N ‑gbala ana 'Pläkänyɔɔ Jesu 'Kriisëa Nyɔsʋa, Tʋlɔ 'sia' 'wliklɩbʋabʋakʋ 'klɩ nɩ, ɔ ‑nyɩ 'amɩ ‑susulu 'sia' wiijejrekʋ 'klɩ, 'kä 'ɔ ‑jie 'ana 'nyü 'amä 'ɔɔn jre 'cɩcasa, 18ɔ ‑jie 'ana bobowli 'klɩ, 'amä diili 'a 'piea' plɛ ‑gälɩ jre ‑bɛ 'amä wiili 'lɩ 'ɔ werea' 'amɩ jre. 'Amä 'nanabɩɔlʋ 'ɔ ‑tʋʋäa' ‑wälɩ 'nyünanyüüa ‑gʋ nɩ, 'amä 'uun jre. 19‑Bɛ 'amä 'ɔa 'klü kpakülü ‑fɛɛɛrɛa' amɔlɔ toroa' 'ɔɔn plɛa 'kläa 'mlɩa 'jrʋpa jre. 'Ia 'klülü nɩ, 'klü 'kɔkɔmlɛ Nyɔsʋa nʋ 'ɔnya srara 'üün. 20‑Jäsɩ 'ɔ sraraa' 'üün nɩ, 'a 'taɩn 'lɩ 'ɔ 'baa' 'Kriisë 'kuaabre ‑bɛ 'ɔ 'sria' 'ɔɔn 'ɔa 'dupa 'pɛlɩ#1.20 'Lɩbrɛrɛpɔɔkʋ 110.1. 'kä cɛɩɩa 'mlɩ. 21'Kriisë bä 'kamanyüüa 'fɩɔa 'wliklɩ, 'ɔ bä 'klüa 'fɩɔa 'wliklɩ, 'ɔ bä 'kɩɩɩ nyra 'cifua#1.21 'Nyrɩlɩ blɛrɛa' ‑tɛ nɩ, 'i bä nyüü, ‑bɛ 'i bä bɩa 'aanjë nyra domüü. Tɛ Ɛfɛsënyüü 3.10; Kolɔɔsënyüü 1.16; 2.15. 'fɩɔa 'wliklɩ: 'ɔ bä 'nyrɩa 'fɩɔa 'wliklɩ, ‑mää ‑tɛ ‑tʋtʋlʋ kʋa' ‑pɩa 'dooa ‑gälɩ ‑a, ‑maa ‑sraakäpɩa 'pläa 'mlɩ bɩa. 22Nyɔsʋa ‑tʋ diia 'fɩɔ 'ɔa böklöli#1.22 'Lɩbrɛrɛpɔɔkʋ 8.7., ‑bɛ 'ɔɔlɔ bäa' diia 'fɩɔa 'wliklɩ nɩ, Nyɔsʋa nya ‑tʋ 'ɔɔn 'cɛcɩa 'wliklɩ. 23'Ɛɛ bä 'ɔa fugba. 'Ɔnya bä 'ɛɛn 'lɩ, 'ɔnya 'sie 'ɛɛn, 'ɔɔlɔ 'siea' diia 'fɩɔ.

Currently Selected:

Ɛfɛsënyüü 1: Bakwé

Highlight

Copy