2 Korɛɛntënyüü 9

Diia 'klɩbabakʋa ‑tɔɔ ‑moloo

1Dɛɛlɛ bäa' möliili 'bablaa' 'klɩ Nyɔsʋaa 'nyünanyüüa ‑gbajijikʋa ‑gʋ nɩ, 'n ‑kanyɩ kä ‑a kä 'mä 'amɩ 'wʋjɩjra, 2'be 'n jre 'imɩ, wiili a 'daa 'ii 'a nö. 'A kä 'mɩ dɔrʋ 'wʋ, 'n ‑gbala 'nɩmɩ Masedoanëa 'cɛcɩnyüü ‑maa: «Akaiia 'cɛcɩnyüü, 'bala ‑sʋlʋ ‑sia', 'ü ‑ëlere 'ümä 'üa ni 'sa.» 'Ana fumökʋ 'jrara 'üa ‑tɔrʋpɩɔa nyüü 'kɔkɔmlɛa 'klü. 3‑Maa ana ‑wlajülü kʋa' ‑pɩ 'n blɔa' 'ana ‑nyɛɛ nɩ, 'ba srara 'üün 'kasa 'sɩrɩ 'a ‑ëlerea', 'kä 'sɩrɩ 'n ‑gbalaa' 'üün ‑taa wiilia ‑gʋ ‑pɩ 'flɛɛwʋ tɩɔ. 4'Ima 'nyɩ 'saa ‑a bä, ‑bɛ Masedoanëa nyüü ma jara 'mɩ 'ana ‑nyɛɛ, ‑bɛ 'ama ‑kaaŋlʋ ‑ëlere nɩ, plɛrɛ a toroa' 'amɩ nya ana 'nyüsü bäa ‑bɛ 'inya bɩa 'ana 'nyüsü bä. 5'N boboa' 'imɩ nɩ, 'a 'ia ‑gʋ 'n bibie ana ‑wlajülü, ü ‑ta amɩ 'nyʋfɔ 'klɔɔtrʋ, ü ji 'amɩ 'wlinönrö diili 'a 'daa käa' amäa' 'klɩbaba 'ia ‑gʋ. 'Ia 'taɩn 'lɩ, ama mi 'tɔ 'imä ‑plɩɩ bä, 'ii 'mä nyüü srara 'sɩrɩ 'a ‑nyɛɛa' dɔrʋsa ‑maa ‑mää 'klɩkʋsa ‑a.

6'Ba 'pa waklöölä kʋa' ‑pɩ plɛ: nyɔɔ ma pla diijie nɩ, diijie 'ɔ 'baalɩ; nyɔɔ ma pla 'kɔkɔmlɛ nɩ, 'kɔkɔmlɛ 'ɔ 'baalɩ. 7‑Moloo ma bälɩ dɛɛlɛ 'ɔa plɛ 'daa 'ɛɛ ɔ ‑nyɩ, 'inyɩ bä 'kpɔkpɔɔkʋ nyra 'klü 'lɩ; 'be nyɔɔlɔ ‑nyɛɛa' dɔrʋsa 'ɔɔ Nyɔsʋa ‑wa. 8Nyɔsʋa kä 'klü 'ɔ 'mrɛɛ ɔ 'sie amɩ ‑gbinanakʋ 'klɩ 'kä 'amä 'taɩn a 'fɩɔ 'lɩ diili 'a 'bataa' 'jä, amä wiili kä 'fɩɔ 'naa' nʋ, 9'sɩrɩ 'i ‑jɩjraa':

'Ɔ ‑pä 'ɔa 'cɩcagbi, 'ɔ ‑nyɩ 'pʋablanyüü,

'ɔa 'klɩgägäkʋ bä ‑plɩɩ 'taɩn a 'fɩɔ 'lɩ # 9.9 'Lɩbrɛrɛpɔɔkʋ 112.9 ..

10Nyɔsʋalɔ ‑nyɛɛa' papladii paplanyɔɔ ‑bɛ 'ɔ ‑nyɛɛa' 'ɔɔn 'klɩfini jijrɛ nɩ, 'ɔnya 'amɩ papladii ‑nyɩa 'kä 'ɔnya 'ia tʋtʋdii ‑sümlö, ‑bɛ 'ɔmä 'ana plɛnanakʋ ‑gälɩ 'papla. 11'Ia 'taɩn 'lɩ nɩ, 'anya diia 'fɩɔa 'bɩɔ jia ‑bɛ 'amä ‑nyɩ 'taɩn a 'fɩɔ 'lɩ, ‑bɛ nyüü 'kɔkɔmlɛ 'mä Nyɔsʋa 'trɛɛ diili 'a 'saa, i a faa' 'üün 'ia ‑gʋ. 12Diili 'a ‑nyɛɛa' nɩ, Nyɔsʋaa 'nyünanyüü 'a jö ‑gba. 'A nöa' 'imɩ nɩ, dɛɛlɛ 'ünyɩa' 'klaa, 'ɛɛ 'a ‑nyɛɛ 'üün, ‑bɛ 'a 'jrara nyüü 'kɔkɔmlɛa 'klü ümä Nyɔsʋa 'trɛɛ. 13‑Bɛ i 'amäa' nʋ nɩ, 'ii ‑gbala nyüü 'sɩrɩ 'a ‑trääräa' 'lɩ Nyɔsʋa 'Kriisëa 'Mʋfagogo 'lɩ 'kä 'kɔkɔmlɛ nya Nyɔsʋa 'bʋala 'ia ‑gʋ, 'kä 'a nyra 'üün, nyra nyüüa 'fɩɔ ‑pääa' 'ana 'bɩɔ, 'ia ‑gʋ. 14'Ünya 'amɩ ‑waa ‑gböösa ‑bɛ 'ünya 'ana 'wlili bibie, 'be Nyɔsʋa ‑nyɩ 'amɩ 'ɔa ‑gbinanakʋlʋ kä ‑srɩ 'nyɩa' ‑pɛ. 15Abɩa Nyɔsʋa 'bʋala 'ɔa ‑nyɩnyɩdɛɛlɛ 'nyɩa' 'klɩpaplaa nɛ kä, 'ɛa ‑gʋ!

Currently Selected:

2 Korɛɛntënyüü 9: Bakwé

Highlight

Copy