2 Korɛɛntënyüü 2

1‑Maa 'na 'mlɔɔ 'mɔɔ 'daa 'nëmä 'ana ‑nyɛɛ dɛrɩ ‑a 'blöö, 'a ‑pɩ 'kpɔɔ. 2'Be ama nʋ 'iin ‑bɛ 'ama 'kpɔɔ nɩ, nyɔɔ 'plɛɛ ‑ka nya 'mɩ dɔrʋ ‑nyɩ le, ima 'nyɩ 'amɔlɔ 'na 'mʋgbɛ ‑tʋa' 'kpɔkpɔɔkʋ 'lɩ ‑a bä. 3'A 'ia ‑gʋ 'n ‑jɩjra 'amɩ 'wʋ, 'be 'nyɩ 'bata ɩ 'ana ‑nyɛɛa jijikʋ ‑a, 'mä ji ‑bɛ nyüülü nëmä ɩa' 'na dɔrʋ bä nɩ, ümä 'mɩ sɩɔ pala. 'Tasɩrɩa 'cɩcasa 'n ‑gbala 'amɩ 'nya 'suru 'iin, ama bä dɔrʋ 'lɩ, 'ana 'fɩɔ bä bɩa dɔrʋ 'lɩ. 4'N ‑jɩjraa' 'amɩ 'wʋ nɩ, 'n 'kpɔɔ ‑gböösa, 'na plɛ bäkälɩ ‑bɛ 'mɩɔ 'kɔkɔmlɛ 'cie 'na 'nyüa 'mlɩ. 'Nyɩ 'iin nʋ ‑a nʋ 'mä 'amɩ sɩɔ pala, ‑maa 'n ‑jɩjra 'amɩ 'wʋ 'kä 'amä 'saa jre 'sɩrɩ 'n ‑waa' 'amɩ ‑gböösa.

Nyɔɔ ma nʋ bʋbɔgbi cere 'ɔmɩ 'iin

5'Ana ‑tɔrʋpɩɔa nyɔɔ ma nʋ 'iin ‑bɛ 'ama 'kpɔɔ nɩ, ‑mää 'mɔɔ 'ɔnyɩ 'kpɔkpɔɔkʋ ‑gba ja, ‑maa 'ana 'fɩɔ bäsaa; 'aiɛ 'ana ‑tɔrʋpɩɔa ‑mölöö bäsaa, 'nyɩ ‑pɩ 'lɩkäpɔ. 6'Ia nyɔɔlɔ nɩ, 'be 'kɔkɔmlɛ nya 'ɔɔn 'daa nɩ, 'i 'a 'na 'saa. 7'Ba cere 'ɔmɩ 'iin 'kä 'a 'jrara 'ɔa 'klü, 'ɔa 'kpɔkpɔɔkʋ ‑pɩ 'wlisie ‑gböösa ‑bɛ 'ɔa kpati ‑pɩ 'lɩ jä. 8'Ii känyrɩ, 'ba srara 'ɔɔn 'sɩrɩ 'a ‑waa' 'ɔɔn. 9‑Jää dɛɛlɛ kä ‑gʋ 'n ‑jɩjra käa' 'amɩ 'wʋ: 'mä ɩ 'amɩ 'jä 'ama ‑ëlere 'na 'papawiia 'fɩɔa 'lɩträäräkʋa ‑gʋ. 10Nyɔɔlɔ 'a cerea' wii nɩ, 'n cere bɩa 'ɔmɩ 'iin. ‑Bɛ 'mɔɔlɔ nɩ, ama cere wii o wii nɩ, 'ana ‑gʋ 'n nö 'iin, 'Kriisëa 'klʋɩ. 11Sataan ‑pɩ amɩ ‑trɔɔrɔ, 'ia ‑gʋ 'n nö 'imɩ; 'be a jre 'tasɩrɩ dɛɛlɛ 'ɔ 'bataa'.

'Pɔɔlëa plɛ ‑taaralɩ Troasëbätä

12'N mia' Troasë 'Kriisëa 'Mʋfagogo 'sara nɩ, 'Pläkänyɔɔ 'sa 'nyʋfɔ 'mä 'jrʋpa ‑fɛ. 13‑Maa 'na bobowli 'nyɩ 'kä ‑a trara 'be 'nyɩ 'lɩ 'na ‑wlajʋ Titë ‑a 'järä. 'A 'ia ‑gʋ 'nyaa cɛrɛ 'cɛcɩnyüü 'nyaa mi Masedoanëa ‑tʋtʋ ‑gälɩ.

'Kriisë ‑nyɛɛ 'wʋsisikʋ

14A 'trɛɛ Nyɔsʋa! Ɔ ‑sröröa' 'Kriisë kälɩ ɔ falaa' amɩ 'wʋsisikʋa ‑glɩsɩglɩsɩ 'lɩ 'plɔʋplɔʋ, ‑bɛ 'ɔ ‑sröröa' amɩ kälɩ ‑bɛ 'ɔ srara 'Kriisë ‑pɩɔa 'fɩɔ, 'sɩrɩ ‑daŋlʋɩnɩa 'nɔnʋ ‑gbaalaa' ‑pɩɔa' 'fɩɔ 'kä. 15Nyɔsʋa 'jää amɩ ‑beere 'sɩrɩ 'Kriisëa ‑daŋlʋɩnɩ bäa' nyüülü bäa' 'lɩmlɩwʋwʋkʋa 'nyʋfɔ mlɩ, nyra nyüülü bäa' 'mɔlɔnyʋfɔ mlɩa ‑tɔrʋpɩɔ. 16‑Mülü 'mɔlɔa' nɩ, jäjäa ‑yrulu ‑nyɛɛa' jäjä 'uu bäsaa. ‑Mülü nɩ, 'kläa ‑yrulu ‑nyɛɛa' 'klä nɩ, 'uu bäsaa. ‑Maa nyɔɔ 'plɛɛ 'mrɛɛ ɔ nʋ 'ia 'sama 'jrʋpalä le? 17Amɔlɔ nɩ, ‑mää nyüü 'kɔkɔmlɛlü nöa' nyɔsʋaawii ü 'paaa' 'peru, ‑mää 'üün anyɩ bä. Amɔlɔ nɩ, ana plɛa 'fɩɔ 'pɔlɔ ‑bɛ a 'paa 'ɔa ‑gä, ‑bɛ 'ɔ 'jää amɩ 'Kriisëa 'jrʋpafɛnyüüa 'sa, 'be 'ɔɔ bäa' Nyɔsʋa 'ɔɔ ja amɩ.

Currently Selected:

2 Korɛɛntënyüü 2: Bakwé

Highlight

Copy