2 Korɛɛntënyüü 12

Wiili Nyɔsʋa jaa' 'Pɔɔlë 'nyü ‑gälɩ

1'Mä ‑tɔklʋ bɔtɔ ‑ale? 'Fʋflɛdii. ‑Maa wiili 'Pläkänyɔɔ jaa' 'mɩ 'nyügälɩ 'taɩn 'lɩ 'ɔ sraraa' 'mɩ 'ɔa nyufa nɩ, 'ii 'nëmä 'lɩsa. 2'N jre nyɔɔ 'doo bäa' 'Kriisë 'lɩ, 'ia ‑sɩ ‑pʋ ‑sɩ mlɔɔ Nyɔsʋa 'jrara 'ɔɔn 'jraraa ‑nyɛɛ cɛɩɩa 'fɩɔa 'wli 'klɩ#12.2 cɛɩɩa 'fɩɔa 'wli 'klɩ: Grɛɛkëwii nö «tääa nɛ cɛ»., ‑bɛ 'sɩrɩ 'ɔ bäa' nyɔɔ 'asɩ 'ɔ bä, 'aiɛ 'ɔa ‑susu 'uu 'jrara, 'nyɩ 'iin jre ‑a jre, Nyɔsʋa 'ɔ jre 'iin. 3‑Yɛɛ, 'n jresaa nyɔɔlɔ nɩ, ‑bɛ 'sɩrɩ 'ɔ bäa' nyɔɔ, 'asɩ 'ɔ bä, 'aiɛ 'ɔa ‑susu 'uu 'jrara, 'nyɩ 'iin jre ‑a jre, Nyɔsʋa 'ɔ jre 'iin. 4Nyɔsʋa fa 'ɔɔn fa Paradiia#12.4 Paradii: Paradii nyra waklöölä bäa' «cɛɩɩa 'fɩɔa 'wli 'klɩ», 'ia 'fɩɔlʋ nɩ, ‑pɩɔ 'doo 'wʋ bäsaa. 'mlɩ, 'papawiili 'ɔ 'nröröa' 'lɩ 'ɔnyɩ 'lɩ ‑a bɩa ɔ 'sa 'iin 'lɩ, 'ia papakʋa ‑gʋ; nyɔɔ 'nyɩ 'lɩ ‑a bɩa 'ɔmä 'iin 'lɩsa. 5'Ia 'sama nyɔɔlɔ nɩ, 'nyaa ‑tɔklʋ bɔtɔa 'ɔa ‑gʋ. ‑Maa ima 'daa 'na në ‑gʋ nɩ, 'nyaa ‑tɔklʋ bɔtɔa 'na 'fʋmakʋa ‑gʋ.

6‑Bɛ ama 'bata ɩ 'na 'mʋgbɛa ‑gäpapakʋ nɩ, 'nëmä mlüü ‑a pa, 'cɩcasaa 'doo 'mä 'lɩsa. ‑Maa 'n blara 'iin 'lɩ, nyɔɔ ‑pɩ 'mɩ 'jrara 'ɔ ‑pɩ diili 'n nöa' nyra wiili 'n 'saalɩ 'wʋsi. 7Wiili Nyɔsʋa sraraa' 'mɩ ibäa' plɛklɩkalawii nɩ, 'ɔ ‑tʋ 'mɩ ‑sʋɩ 'doo ‑gälɩ ‑beere 'büti 'järä 'na fugba ‑sʋɩ 'lɩ 'nyɩ ‑pɩ ‑gʋ 'lɩgba. Sataan kälɩ 'ɛ sɔ; 'ɔɔ Nyɔsʋa ‑tʋ 'lɩ 'ɔmä 'mɩ ‑sʋɩ 'lɩ tʋ 'nyɩ ‑pɩ 'lɩgba. 8'N ka tää 'nyaa bibie 'Pläkänyɔɔ ɔ tʋŋlɔ 'mɩ 'lɩ 'ia ‑sʋɛlɛ dɛrɩ. 9'Ɔnya ‑gbala 'mɩ: «'Na ‑gbinanakʋlʋ 'n sraraa' ‑mɩ nɩ, 'u 'kpa ‑mɩ 'kä, 'a 'fʋmlakʋ 'lɩ 'na 'klü crɛrɛ 'wʋ ‑gböösa.» 'Ia ‑gʋ 'nyaa 'lɩgbaa 'na 'fʋmlakʋ 'lɩ, 'Kriisëa 'klü 'mä 'mɩ 'lɩ kʋ. 10'A 'ia ‑gʋ 'fʋmakʋ, jejrekʋ, 'dadaakʋ, ‑gbigbanʋnʋkʋ nyra ‑sʋɩ, 'ia 'fɩɔ ma jrä 'mɩ ‑gälɩ 'Kriisëa ‑gʋ ‑bɛ dɔrʋ 'blaa 'mɩ. 'Be 'a 'taɩn 'lɩ 'n 'fʋmaa', 'a ‑plɩɩ 'n ‑sɔɔrɔwʋ.

Dɛɛlɛ bäa' 'Pɔɔlëa ‑sʋɩ Korɛɛntënyüüa ‑gʋ

11'N bɔtɔa' 'na ‑tɔklʋ nɩ, mlüünyɔɔa 'sa 'n 'pawii, ‑maa 'amɔ 'tuto 'mɩ. 'Amɔ nëmä ɩ 'na ‑gä 'pa, ‑bakää 'nyɩ dɛɛ bä nɩ, nyüülü 'daraa' 'üa nyüfë apotrë kpakü nɩ, 'nyɩ 'jä dɛɛlɛ kä 'mlɩ 'ü ‑sia' 'mɩ 'wʋ ‑a. 12‑Jää wiili sraraa' nyüü 'sɩrɩ 'n bäa' 'tasɩrɩa apotrë 'ii nrörö 'ana ‑nyɛɛ: plɛblösa ‑sʋɛa 'mlɩ, ‑saragbia tie, plɛklɩkalawii, 'nyaa srara Nyɔsʋaa 'klü dii ‑mɩdooa 'mlɩ. 13Dɛplɛɛ 'n nʋ ‑plɩɩ 'cɛcɩnyüü ‑mölööa ‑nyɛɛ 'i 'na ‑bɛ 'nyɩ 'ana ‑nyɛɛ nrörö le? ‑Gblɛa 'doo 'nyɩ bä 'ana në ‑gʋ. 'Ii känyrɩ, 'ii ma bʋbɔ nɩ, 'ba cere 'mɩ 'iin!

14'Ana ‑nyɛɛ 'mä 'sɔɔwʋ ji tää fa 'wʋ, 'nëmä 'sɔɔwʋ ‑gblɛ ‑a bä 'ana në ‑gʋ, ‑mää 'ana 'bɩɔ 'nyɩ 'bata, ‑maa 'ana 'mʋgbɛ ‑tɛɛ 'n 'bata. 'Be ‑mää 'jü ‑nëmä 'üa ‑gugunyüüa ‑gä 'pa. 'Üa ‑gugunyüü, 'üü kä 'ümä 'üa ‑gä 'pa. 15'Ii känyrɩ 'mɔɔlɔ nɩ, 'inya 'mɩ dɔrʋ 'wʋ käa 'mä diia 'fɩɔ 'sa, 'palɩ 'na 'mʋgbɛa 'fɩɔ 'ana ‑gʋ. 'Asɩ 'n ‑waaa 'amɩ nɩ, 'na ‑wawakʋ 'bölöklɩ 'ana plɛklɩ?

16'Sɩmɩ 'inyɩ bä, 'nyɩ ‑gblɛ ‑a bä 'ana në ‑gʋ. ‑Maa ‑mölöö nö yrʋ 'n kä, 'uu 'n nʋ 'nyaa 'kʋɛɛ 'amɩ! 17Nyüülü 'n jaa' 'amɩ nɩ, 'n blɔ nyɔɔ ɔ ji 'amɩ dɛɛ ‑sɛ? 18'N 'jrara Titëa 'klü ɔ ji 'ana ‑nyɛɛ, 'ɔɔ ‑bɛ ‑wlajʋlɔ 'a jrea'. Titë ‑sɛ 'amɩ dɛɛ? 'Nyʋfɔ 'doolʋ 'nyraa 'ɔɔn faa' ‑mää 'ua nʋnʋgbi 'doo anyɩ 'klaa?

19'Ana plɛ nɩnɩa sököö ana 'wlilia wii a ji 'pa? Nyɔsʋaa 'klʋɩ a 'pala wii, 'Kriisëa 'nyrɩ 'lɩ. 'Na ‑wawanyüü 'amɩ, 'ana nyɔsʋaplɛ 'mä 'wʋsɔɔrɔ 'ia ‑gʋ a nö 'ia 'fɩɔlʋ. 20Ŋalɛ 'bla 'mɩ 'nyɩ ‑pɩ 'ana ‑nyɛɛ jikalɩ mi ‑bɛ 'nyɩ ‑pɩ 'amɩ 'klälä 'nyɩ 'bataa' a 'mlɩ jrä; 'ana 'mʋgbɛ ‑pɩ 'mɩ 'jä ‑pasasa 'sɩrɩ 'anyɩa' bobo. Ŋalɛ 'blaa 'mɩ 'nyɩ ‑pɩ 'ana ‑nyɛɛ ‑taa wiili kʋa' ‑pɩ jrä: ‑topokʋ, wasä, 'crɛ, ‑gbakɛklɛkʋ, ‑jejrekʋ, ‑gbagblɛ, bʋbɔwiia 'papakʋ nyra 'lɩcaklakʋ. 21Ŋalɛ 'blaa 'mɩ 'nyɩ ‑pɩ 'tɔ ‑bɛ Nyɔsʋa ‑pɩ 'mɩ 'nyüsü 'blara 'ana 'klʋɩ, 'nyɩ ‑pɩ 'wu nyüülü nʋa' ‑balʋ ‑bɛ ünyɩa' 'üa bʋbɔgbia ‑gʋ fio, 'üa ‑sagbili Nyɔsʋa 'nyɩ 'bataa', ‑bɛ 'ü käa' nʋnʋgbili plaa' ‑fre 'lɩ, 'üa ‑gʋ.

Currently Selected:

2 Korɛɛntënyüü 12: Bakwé

Highlight

Copy