Ku̱lu̱gha 18

Yetelo naabungila Musa

1Yetelo, mu̱hongi̱ wʼomu Mi̱di̱yaani̱, nkyame sya Musa, aaghu̱wa byona ebi Luhanga aakoleeye Musa na Banai̱saaleeli̱ kandi ngoku Mukama aahi̱ye Banai̱saaleeli̱ mu nsi ya Mi̱si̱li̱.

2Bwile obu Yetelo, nkyame sya Musa, aatwala Jipola mukali̱ wa Musa, nanga Musa akaba amu̱ti̱ghi̱ye ewaa nkyame siye oghu, 3na batabani̱ be babili. Li̱i̱na lya omui baamughilaghamu Geli̱soomu̱,#18:3 Geli̱soomu̱ likaba lili li̱i̱na lya Kihebbulaayo elyamani̱i̱si̱yagha munamahanga. nanga Musa akaghila ati, “Naabaagha munamahanga mu nsi etali yaatu.” 4Li̱i̱na lya onji baamughilaghamu Eli̱yeeja,#18:4 Eli̱yeeja lyamani̱i̱si̱yagha Luhanga wanje niiye mu̱kooneli̱ wanje. nanga Musa akaghila ati, “Luhanga wa tita niiye akankoonela kandi anjuna kihiyo kya Falaaho.”

5Yetelo, nkyame siye, aasa na mukali̱ wa Musa na batabani̱ baa Musa babili, aamusanga mu elungu, hambali aabaagha aghooneeye haai na mwena ghwa Luhanga. 6Yetelo aatuma muntu kughila Musa ati, “Si̱ye, nkyame syawe Yetelo, niibuwo naasa ewaawe, na mukali̱ waawe na batabani̱ baawe babili.”

7Musa aatuwa kusangaana nkyame siye, aagomba kandi aaghuwa nkyame siye mu ki̱ku̱bha. Baalamukangani̱ya, du̱mbi̱ baataaha mu weema ya Musa. 8Musa aaghambila nkyame siye byona ebi Mukama aakoli̱yʼo Falaaho na Banami̱si̱li̱ haabwa Banai̱saaleeli̱. Aamughambila bijibu byona ebyababaayʼo mu kihanda kandi ngoku Mukama aabaju̱ni̱ye.

9Yetelo aadheedhuwa haabwa bintu bisemeeye byona ebi Mukama aakoleeye Banai̱saaleeli̱, kubajuna ku̱lu̱gha mu mukono ghwa Banami̱si̱li̱. 10Yetelo aaghila ati, “Mukama asi̱i̱mu̱we, oghu aabaju̱ni̱ye ku̱lu̱gha mu mukono ghwa Banami̱si̱li̱ na mukono ghwa Falaaho kandi oghu aacunguuye bantu be ku̱lu̱gha mu mukono ghwa Banami̱si̱li̱. 11Endindi naamani̱ye ngoku Mukama asaai̱ye baaluhanga banji boona, nanga aaju̱ni̱ye bantu be ku̱lu̱gha mu banamyempanko baa Banami̱si̱li̱ abaababona-boni̱yagha.” 12Yetelo nkyame sya Musa, aahongela Luhanga kihonguwa kyona kyokeei̱ye na bihonguwa binji. Alooni̱ na beebembeli̱ baa Banai̱saaleeli̱ baasa kuliya hamui na nkyame sya Musa mu maaso ghaa Luhanga.

Kukoma bacu̱

13Kilo ekyalabhi̱yʼo Musa aasitama ku̱twi̱la bantu misango kandi bantu baamilila bamweli̱ghi̱li̱i̱ye ku̱lu̱gha nkyambisi ku̱hi̱ki̱ya lwagholo. 14Obu nkyame sya Musa aaboone byona ebi Musa akwete kukolela bantu aba, aamughila ati, “Nkiki okwete kukolela bantu aba? Ositami̱ye wenkaha kandi bantu aba boona baamiliiye bakweli̱ghi̱li̱i̱ye ku̱lu̱gha nkyambisi ku̱hi̱ki̱ya lwagholo nangaaki?”

15Musa aaghila nkyame siye ati, “Bantu aba bakwisagha ewanje kumanya ebi Luhanga akubbala ati bakole. 16Bakaakubaagha bali na mpaka syabo, bakwisagha ewanje kubatwi̱lamu kandi kubaghambila ntu̱wamu na bilaghilo bya Luhanga.”

17Nkyame sya Musa aamughila ati, “Eki okwete kukola takisemeeye. 18Uwe na bantu abali naawe mukweluwakaki̱ya kandi mulimo oghu okwete kukola ghukuhingulaane, tookugubha kughukola wenkaha. 19Ontegheeleli̱ye endindi kandi ooghu̱we eki kukuhanuulila, Luhanga akuba naawe. Bantu aba balakabaagha bali na nsonga syabo, uwe osighambilaghe Luhanga. 20Obeegheesi̱yaghe bilaghilo biye na ebi aalaghikiliiye. Oboolekaghe ngoku bali na kwetwalikani̱ya kandi ebi bali na kukola. 21Okwetaaghisibuwa dhee mu bantu aba boona kukomamu basaasa abali na magheji, abahu̱ti̱i̱ye Luhanga, beesighibuwa kandi aboohi̱ye ngu̱ji̱. Bamui mu bantu aba babe beebembeli̱ baa bantu lu̱ku̱mi̱-lu̱ku̱mi̱, banji baa bantu ki̱ku̱mi̱-ki̱ku̱mi̱, banji baa bantu maku̱mi̱ ataano-ataano na banji baa bantu eku̱mi̱-eku̱mi̱. 22Oleke basaasa aba batwi̱laghe bantu misango bwile bwona. Misango yamaani̱ haaliiyo baakuleetelagha, bhaatu misango nkee baghimalaghe bonkaha. Bantu aba bakuleka mulimo oghu ghukudhootele nanga bakuba mbakukoonela kughukola. 23Nuwaakoli̱ye eki, ngoku Luhanga akulaghiiye, okugubha kukola mulimo oghu kandi bantu aba boona balakuukagha mu maka ghaabo na bu̱si̱nge.”

24Musa aaghu̱wa nkyame siye kandi aakola byona ebi aamughambiiye. 25Musa aakoma mu Banai̱saaleeli̱ basaasa abali na magheji, aabafoola beebembeli̱ baa bantu lu̱ku̱mi̱-lu̱ku̱mi̱, banji baa bantu ki̱ku̱mi̱-ki̱ku̱mi̱, banji baa bantu maku̱mi̱ ataano-ataano na banji baa bantu eku̱mi̱-eku̱mi̱. 26Basaasa aba baatandika ku̱twi̱la bantu misango bwile bwona. Misango eghi ebasaaghi̱ye baaghileetelagha Musa, bhaatu misango nkee baaghi̱tu̱waghamu boonini.

27Du̱mbi̱ Musa aalagha nkyame siye kandi nkyame siye oghu aakuuka ewe e ka.

Currently Selected:

Ku̱lu̱gha 18: Lubwisi

Highlight

Copy