Kitaaba Faaru'uu 35
35
Diinota Jalaa Bayiisaaf Daadimata Dhikaate
Faaruu Daawitii.
1Ee Mootii Waan Maraa,
worra natti ka'u irratti ka'i;
worra na lolu loli.
2Wontee teetii fi meya lolaa keeti fudhadhuu
na qarqaariisaaf koy.
3Worra na ari'utti ebo'oo fi urdee teeti fudhadhuutii,
lubbuu tiyyaan, «Ani fayyisaa keeti» jedhi.
4Worri na ijjeesiisaaf barbaadu
fokkifatee qaanowuu ti.
Worri mala natti dhowu
gara duubaa deebi'ee salphatuu ti.
5Ergamaan Waaqaa isaan ari'uun,
akka huura qilleensi afuufuu te'anuu ti.
6Ergamaan Mootii Waan Maraa isaan ari'uun
karaan isaanii dukkanaa fi mucucoo te'uu ti.
7Isaan sababa tokko malee
tiyyoo dhossa'aan naaf afanee,
na qabiisaaf boolla qotaneeran.
8Adoo hin beekin
badiin isaan irratti dhuttuu ti.
Tiyyoon isaan dhossane
isaanuma qadduu ti;
Boolla qotane keessa bu'anee badanuu ti.
9Lubbuun tiyya
Mootii Waan Maraatiin hin gammaddi;
fayyisiisa isaatiin gammaddee firinxiixxi.
10Gadhaa kiyya tokkochaan,
«Ee Mootii Waan Maraa,
dadhaboolee
worra guddoo jajjabaa harkaa,
dadhaboole'ee fi hiyyeeyyiille
saantota harkaa ka baasu
ka akka keetii eennu?» jedha.
11Dhugaa baatoti dharaa natti ka'ane;
marroo waan ani hin beennee na gaafatane.
12Qofi-galeessa na godhanee
waan dansaa ani godheef,
hantuu naaf deebisane.
13Ani ammoo yennaa isaan dhibamane,
woyaa gaddaa uffadhe;
laamiisaan ifi rakkise;
daadimati kiyyalle deebii dhabee,
14akka waan jaalaaf
yookiin obboleessaaf gadduutitti gadde;
akka nama haadha ifiitiif bowuu,
mataa gad qabadhee bowe.
15Yennaa ani gufadhe ammoo,
isaan gammadane;
dedhuma dhufanee
sababa malee arrabaan na kukkutane.
16Akkuma worri Waaqa malee le'u godhu,
natti murgane;
ilkaan natti ciniinnatane.
17Ee Gootta'a,
haga yoomii cadhittee na ilaalta?
Worra na miidhu,
ka akka neenqaa kana jalaa na baasi.
18Achiin duuba ani kolbaa teeti keessatti
si hin galateeffadha;
kolbaa bacaa keessatti si hin leellifadha.
19Worri akkasumaan diina natti te'u,
natti hin gammadin;
worri akkasumaan na jibbu
na irratti ilaan wolitti hin qiphifatin.
20Isaan dubbii nageyaa hin dubbatanu;
worra biyya keessa nageyaan le'u irratti
dubbii dharaa yaadanee qopheessan.
21Isaan, «Baga waan ati hujje dhaggine!» jedhaa,
afaan natti banan.
22Ee Mootii Waan Maraa, ati tana dhaggiteerta,
hin cadhisin!
Ee Gootta'a, na irraa hin fagaatin!
23Ee Gootta'a, Waaqa kiyya dammaqi!
Na irraa dhooggiisaaf ka'i!
Haajaa kiyyaaf loli.
24Ee Mootii Waan Maraa, Waaqa kiyya,
balchummaa teetiin naaf muri;
diinoti kiyya natti hin gammadin.
25Isaan, «Halchaa gadhaa keennaa
baga dhagganne!
Nuuti ijjumaa isa balleessineerra» hin jedhin.
26Worri rakkinna kiyyatti gammadu marti
fokkifatanee qaanowanuu ti;
worri na irratti ifi saadu marti
fokko'oo fi salphinna uffatuu ti.
27Worri muraa haqaa
dhaggatiisa kiyyatti gammadu marti
gammadaan ilillisanuu ti;
isaan «Mootiin Waan Maraa gudda'a!
Inni yennaa tajaajilaan nageya dhaggatu
hin gammada!» jedhanuu ti.
28Arrabi kiyya balchummaa teetii dubbataa,
guyyaa guutuu si hin leellisa.
Currently Selected:
Kitaaba Faaru'uu 35: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
