Kitaaba Faaru'uu 119
119
Seera Mootii Waan Maraa
1Worri karaan isaanii komii hin qanne,
ka seera Mootii Waan Maraatiin ideemanu
ka gammadane.
2Worri ajaja isaa eegatu,
ka gadhaa tokkochaan isa barbaadu
ka gammade.
3Isaan dokonkora hin hujanu;
karaa isaa ideeman.
4Mootii Waan Maraa,
ajaji keeti guutumatti akka eegamu,
ati ajajjeerta.
5Ani ajaja keeti eegatiisaan,
jabaadhee adoo dhaabbadhee
attam attam halcha!
6Ani ila tiyya ajaja keeti mara irraa
yoo hin buqqifatin,
ani hin qaanowu.
7Muraa haqaa teeti yennaa baradhe,
ani gadhaa qajeela'aan si leellisa.
8Ani ajaja keeti hin eegadha;
ati ijjumaa na hin lakkisin.
Seera Mootii Waan Maraatiif Ajajamuu
9Dargaggooti attamiin karaa ifii
qulqullumma'aan eegatiisa dande'an?
Karaa ifii akka jecha keetiititti eegatiisaan.
10Ani gadhaa tokkochaan si barbaada;
ajaja keeti irraa akka goru na hin lakkisin.
11Akka si hin yakkineef,
jecha keeti gadhaa kiyya keessatti dhoffadheera.
12Ee Mootii Waan Maraa, ati ka leellifante;
seera keeti na barsiisi.
13Ani qajeelfama afaan keetii baye mara,
afaan kiyyaan hin lallaba.
14Akkuma nami durummaa guddo'otti gammadu,
ani qajeelfama keeti hordofiisatti
hin gammada.
15Ani ajaja keeti irra deddeebi'ee itti hin yaada;
karaa keeti irraa ila tiyya hin buqqifadhu.
16Ani seera keetiin hin gammada;
ani jecha keeti hin dedhu.
17Akka ani le'uuf,
jecha keetiifille akka ajajamu,
ana tajaajilaa keetiif waan dansaa godhi.
18Waan maade'ee
ta seera keeti keessaa akka dhaggu,
ila tiyya bani.
19Ani lafa irratti alaga'a;
ajaja keeti na hin dhossin.
20Lubbuun tiyya seera keeti halchiisaan,
yennaa mara akka malee dadhaddi.
21Ati worra koorameeyyii abaarame,
ka ajaja keeti irraa gore,
hin xixxa.
22Ani ajaja keeti waan eegadheef,
ati murgo'oo fi tuffii isaanii
na irraa fageessi.
23Qondaaltoti tee'anee
mala na irratti dhowanulle,
ani tajaajilaan keeti
seera keeti itti deddeebi'ee hin yaada.
24Ajaji keeti marti na gammachiisan;
isaan gorsitoota tiyya.
Seera Waaqaatiif Ajajamiisaaf Murteeffatuu
25Ani du'iisa geyeera;
ati akka jecha keetiititti
lubbuu tiyya natti deebisi.
26Ani waan jiruu tiyya keessatti te'e mara
sitti himadheera;
atille deebii naaf kenniteerta;
seera keeti mara na barsiisi.
27Ajaja keeti na hubachiisi;
anille hujii teeti ta maade'ee
itti deddeebi'ee hin yaada.
28Lubbuun tiyya gaddaan dadhaddeerti;
akka jecha keetiititti na jabeessi.
29Karaa sobaa na irraa fageessi;
badhaadha keetiin seera keeti na barsiisi.
30Ani karaa dhuga'aa filadheera;
seera keeti ifi dura keyadheera.
31Ee Mootii Waan Maraa,
ani jaja keeti jabeessee qabadheera;
na hin qaanessin.
32Ati waan bilisa na baatteef,
ani karaa ajaja keetii rukkisa.
Daadimata Hubantii Dhaggatiisaaf Dhikaate
33Ee Mootii Waan Maraa,
karaa seera keetii na barsiisi;
anille yennaa mara hin hordofa.
34Seera keeti akka ani eegadhu,
gadhaa tokkochalle'een akka ani ajajamu,
hubantii naa kenni.
35Ani waan ittiin gammaduuf,
daandii ajaja keetii irra akka deemu na godhi.
36Bu'aa haqa hin te'in dhaggatiisa irraa,
gadhaa kiyya gara ajaja keetii deebisi.
37Ila tiyya waan bu'aa hin qanne irraa deebisi;
karaa keeti irratti jiruu naa kenni.
38Akka sodaatantuuf,
Waadaa ana tajaajilaa keetiif galte muummessi.
39Seerri keeti dansaa waan te'eef,
qaanii ani sodaadhu na irraa fageessi.
40Kunoo, ani ajaja keeti eegatiisaaf dharra'a;
balchummaa teetiin jiruu naa kenni.
41Ee Mootii Waan Maraa,
jaalalli keeti ka bara baraa
gara kiyya dhufuu ti;
akka waadaa keetiititti
fayyisiis keetille gara kiyya dhufuu ti.
42Achiin duuba ani
jecha keetitti waan addadhuuf,
worra na arrassuuf deebii hin kenna.
43Ani seera keetitti addii waan godhadhuuf,
jecha dhuga'aa keeti dubatiisa
na hin dhooggin.
44Ani yennaa mara,
haga bara baraa seera keeti hin eegadha.
45Ani ajaja keeti muummessiisa
waan barbaaduuf,
bilisaan hin ideema.
46Ani ajaja keeti mootota duratti
hin dubbadha;
hin qaaneffadhu.
47Ani ajaja keeti hin jaaladha;
ittille hin gammada.
48Ani harka kiyya gara ajaja keeti
ka jaaladhuu ol hin kaasa;
seerata keetille itti deddeebi'ee hin yaada.
49Jecha keeti
ka akka ani addi'iin eegadhu goote,
ana tajaajilaa keetiif qaabadhu.
50Waadaan keeti
jiruu waan naa kenneef,
rakkinna kiyya keessatti
jajjabeenni kiyya kana.
51Worri koorameeyyiin
yennaa mara natti murgan;
ani ammoo seera keeti irraa hin deebine.
52Ee Mootii Waan Maraa,
ani seeraa keeti
ka durii durii yennaa qabaadhu,
ittiin hin jajjabaadha.
53Worri hamaaleyyiin
seera keeti waan lakkisaneef,
aariin guddoon na qabatte.
54Addee le'u maratti ajaji keeti faaruu tiyya.
55Ee Mootii Waan Maraa,
halkan keessa maqaa keeti qaabadha;
seera keetille hin eegadha.
56Ani ajaja keeti eegadhe;
tunille hujii tiyya teete.
Seera Waaqaatiif Ajajamuu
57Ee Mootii Waan Maraa,
jiruu tiyya keessatti ati qooda kiyya;
ani jecha keeti eegatiisaaf waadaa galeera.
58Fudhatama dhaggatiisaaf,
gadhaa tokkochaan si daadimadha;
akkuma waadaa keetiititti naa marari.
59Ani yennaa karaa keeti yaadadhu,
miila kiyya gara ajaja keetii deebifadha.
60Ani ajaja keeti muummessiisaaf,
hin ariifadha; hin turu.
61Worri hamaan wodaroo natti marulle,
ani seera keeti hin dedhu.
62Muraa teeti balchitti'iif,
si galateeffatiisaaf,
ani halkan wodhakkaa hin ka'a.
63Ani worra si sodaatu maraaf,
worra ajaja keeti eegatu maraaf jaala.
64Ee Mootii Waan Maraa,
latti jaalala keeti
ka bara baraatiin guutanteerti;
seera keeti na barsiisi.
65Ee Mootii Waan Maraa,
akkuma jecha keetiititti,
ati tajaajilaa keetiif waan dansaa gooteerta.
66Ani ajaja keeti waan addadhuuf,
beekkumsaa fi hubantii dansaa na barsiisi.
67Adoo hin rakkatin dura,
ani karaa keeti irraa goreera;
amma ammoo jecha keeti hin eegadha.
68Ati dansa'a; wonni ati gootulle dansa'a;
seera keeti na barsiisi.
69Worri koorameeyyiin
dharaan maqaa na balleessanulle,
ani ammoo gadhaa tokkochaan
ajaja keeti hin eegadha.
70Isaan mataa jabaatan;
ani ammoo seera keetiin gammada.
71Seera keeti akka baradhu,
rakkatiisi kiyya dansa'a.
72Worqi'ii fi meetii kuma hedduu caalaa,
seera afaan keetii bayu naaf woyya.
Haqa Seera Waaqaa
73Harki keeti na huje;
na mimmiidhasselle'e;
akka ani ajaja keeti baradhu,
qalbeeffata naaf kenni.
74Ani jecha keetitti addii waan godhadheef,
worri si sodaatu yennaa na dhaggu
hin gammada.
75Ee Mootii Waan Maraa,
muraan teeti dhugaa akka teete,
ani hin beeka;
ati addatamumma'aan na adadde.
76Akkuma ana tajaajilaa keetiif waadaa galtetti,
jaalalli keeti ka bara baraa
na jajjabeessuu ti.
77Seerri keeti waan na gammachiisuuf,
akka le'uuf,
marartiin teeti naaf dhuttuu ti.
78Worri koorameeyyiin
dharaan waan na himatanuuf,
qaanowanuu ti.
Ani ammoo ajaja keeti itti deddeebi'ee yaada.
79Worri si sodaatuu,
worri ajaja keeti beeku,
gara kiyya deebi'uu ti.
80Akka ani hin qaanonneef,
gadhaan kiyya seera keetitti
komii hin qabaatin.
81Lubbuun tiyya
fayyisiisa keeti dharra'iisaan gaggaddi;
ani ammoo jecha keetitti addii godhadha.
82Ilti tiyya dubbii teeti eegatiisaan dadhaddi;
ani, «Yoom na jajjabeessita?» jedhee gaafadha.
83Ani akka qalqalluu daadhii woyni'ii
ka aara keessaa shuntuuradhulle,
seera keeti hin dedhu.
84Ani tajaajilaan keeti haga yoomii le'inna laati?
Ati worra na miidhutti yoom murta?
85Worri koorameeyyiin seera keetiif hin ajajanne,
boolla naaf qotane.
86Ajaji keeti martinuu addatama'a;
namooti sababa malee waan na miidhanuuf,
ati na qarqaar.
87Isaan diqquma lafa irraa
na hin balleessin hafane;
ani ammoo ajaja keeti hin lakkinne.
88Akka ani ajaja keeti eegadhu,
jaalala keeti bara baraatiin,
jiruu naa kenni.
89Ee Mootii Waan Maraa,
jechi keeti haga bara baraa,
ol-gubbaa keessatti jabaatee jiraata.
90Addatamummaan teeti
dhalootaa irraa haga dhaloota maraatitti
hin jiraatti;
ati lafa daddeerta;
isiille jabaattee jiraatti.
91Wonni martinuu tajaajiltoota teeti waan teeteef,
ajaja keetiin haga adhaa jabaattee jiraatti.
92Seerri keeti adoo na hin gammachiinne teete,
rakkinna kiyyaan silaa ani badeeraayyu.
93Ati seera keetiin jiruu waan naa kenniteef,
ani ijjumaa seera keeti hin dedhu.
94Ani seera keeti waan barbaaduuf,
ani keeti; na hamburi.
95Worri hamaaleyyiin na ijjeesiisaaf na gaadan;
ani ammoo ajaja keeti itti deddeebi'ee yaada.
96Wonni dhidhinna hin qanne marti
meessaa akka qaddu dhaggeera;
ajaji keeti ammoo meessaa hin qabu.
Seera Waaqaa Jaalatiisa
97Ani attam attam seera keeti jaaladha!
Ani guyyaa guutuu itti deddeebi'ee isa yaada.
98Ajaji keeti yennaa mara na woliin waan jiruuf,
diinota kiyya caalaa qaroo na godha.
99Ani seera keeti itti deddeebi'ee waan yaaduuf,
barsiisota tiyya mara caalaa qarummaa qaba.
100Ani seera keeti waan muummessuuf,
maanguddoota caalaa hubantii qaba.
101Ani jecha keeti eegatiisaaf,
miila kiyya karaa hamaa mara irraa eegadheera.
102Ati waan na barsiitteef,
ani seera keeti irraa hin gorre.
103Jechi keeti arraba kiyyatti attam attam mi'owa!
Afaan kiyya keessatti damma caalaa mi'owa.
104Ani seera keeti irraa hubantii dhaggadheera;
tanaaf karaa dharaa mara hin jibba.
105Jechi keeti miila kiyyaaf issa'a;
daandii tiyyaafille ifa.
106Seera keeti balchicha hordofiisaaf,
kakadheera; ittille hin jabaadha.
107Ani guddoo rakkadheera;
ee Mootii Waan Maraa, akka jecha keetiititti
jiruu naa kenni.
108Ee Mootii Waan Maraa,
leellisa fedhii tiyyaan sii dhikeessu fudhadhu;
seera keetille na barsiisi.
109Lubbuun tiyya yennaa mara balaa bira jirti;
ammoo ani seera keeti hin dedhu.
110Worri hamaan tiyyoo naaf afe;
ani ammoo seera keeti irraa hin gorre.
111Seerri keeti haga bara baraa
dhaala kiyya waan te'eef,
gammadi gadhaa kiyyaa isa.
112Ani haga du'utti,
bara baraan seera keeti
muummessiisaaf murteeffadheera.
113Ani worra yaada lamaa jibbe;
seera keeti ammoo jaaladhe.
114Ati addee ani itti dhokadhu;
wontee tiyyalle'e.
Ani jecha keetitti addii godhadha.
115Akka ani ajaja Waaqa kiyyaa eegadhu,
isin worri waan hantuu hujjanu
na irraa fagaadha'a.
116Akka ani jiru'uun le'u,
akka jecha waadaa keetiititti na jabeessi;
addii tiyyaan ani hin qaanowin.
117Akka ani bayu ati na qabi;
ani yennaa mara seera keetitti xiyyeeffadha.
118Malli soba isaanii bu'aa waan hin qanneef,
ati worra seera keeti irraa goru mara
hin fugussita.
119Worra hamaa lafa irraa mara
ati akka solloqqee sibiilaa hin gatta;
tanaaf, ani seera keeti hin jaaladha.
120Foon kiyya si sodaatee hollate;
ani muraa teeti guddoo sodaadhe.
121Ani waan dhuga'aatii fi haqaa hujeera;
ati worra na cunqursuuf na hin lakkisin.
122Ani tajaajilaan keeti
waan dansaa akka dhaggadhu
wobii naa te'i;
worri koorameeyyiin
akka na cunqursu hin lakkisin.
123Fayyisiisa keetii fi waadaa keeti
balchaa san eegatiisaan,
ilti tiyya dadhadde.
124Akka jaalala keeti ka bara baraatitti,
ana tajaajilaa keeti qabadhu;
seera keetille na barsiisi.
125Ani tajaajilaa keeti;
akka ani seera keeti beeku,
hubantii naaf kenni.
126Ee Mootii Waan Maraa,
kolbaan seera keeti waan cassiteef,
yennaan ati waan tokko hujju amma.
127Ani worqii caalaa, worqii qullittii caalaa,
ajaja keeti jaaladha.
128Tanaaf ajaji keeti martinuu,
dhugaa akka te'e hin fudhadha;
karaa dharaa mara jibba.
Halchaa Seera Mootii Waan Maraatiif Ajajamiisaa
129Seerri keeti maade'e;
tanaaf lubbuun tiyya isaaf ajajanti.
130Hiiki jecha keetii ifa kenna;
worra wollaala'aaf hubantii kenna.
131Ani ajaja keeti waan halcheef,
afaan banee eegadha.
132Akkuma worra maqaa keeti jaalatuuf gootu,
gara kiyya deebi'iitii,
naa marari.
133Akka jecha keetiititti
ideensa kiyya sooressi;
cubbuun akka na mootu hin lakkisin.
134Akka ani ajaja keeti eegadhu,
cunqursaa namaa jalaa na wodi.
135Ana tajaajilaa keetitti fuula ifi;
seera keetille na barsiisi.
136Seerri keeti waan hin eegaminiif,
imimmaan ila tiyya keessaa
akka bisaanii yaati.
137Ee Mootii Waan Maraa,
ati balcha'a;
muraan teetille dhuga'a.
138Ati balchumma'aa fi
addatamummaa guutu'uun,
seera keeti baacheerta.
139Diinoti kiyya jecha keeti waan dedhaneef,
hinaaffaan tiyya na laalessite.
140Jechi keeti guddoo qulqullicha;
ani tajaajilaan keetille isa jaaladha.
141Ani nama diqqaa tuffatama'a;
te'ulle ajaja keeti hin deenne.
142Balchummaan teeti
balchummaa haga bara baraa ti;
seerri keetille dhuga'a.
143Rakkinnii fi farri na dhaqqabeera;
ajaji keeti ammoo na gammachiisa.
144Ajaji keeti haga bara baraa dhuga'a;
akka ani jiru'uun le'u hubantii naaf kenni.
145Ee Mootii Waan Maraa,
ani gadhaa tokkochaan gara keeti iyya.
Ati deebii naaf kenni;
anille seera keeti hin eegadha.
146Ani gara keeti iyya; na baasi;
anille seera keeti hin eegadha.
147Ani adoo boruun hin dayya'in ka'ee,
qarqaarsa dhaggatiisaaf gara keeti iyya;
jecha keetitti addii godhadha.
148Jecha keeti itti deddeebi'ee yaadiisaaf,
ani halkan guutuu ila wolitti hin qabanne.
149Akka marartii teetiititti
qoonqoo tiyya dhage'i;
Ee Mootii Waan Maraa,
akka seera keetiititti
lubbuu tiyya hamburi.
150Worri mala hamaa baafatanee
na miidhanu,
natti dhikaataneeran;
ammoo seera keeti irraa fagaataneeran.
151Ee Mootii Waan Maraa,
ati dhikoo jirta;
ajaji keeti marti dhuga'a.
152Bara baraan akka jiraatuuf,
akka ati seera keeti baache,
yennaa dheertu'uun dura
seera keeti irraa baradheera.
Qarqaarsa Gaafatiisa
153Ani seera keeti waan hin dedhiniif,
ati rakkinna kiyya ilaaliitii na baasi.
154Haajaa kiyya naaf falmiitii, na wodi.
Akka waadaa keetiititti
lubbuu tiyya hamburi.
155Worri hamaan
seera keeti waan hin barbaanneef,
fayyinni isaan irraa fagaateera.
156Ee Mootii Waan Maraa,
marartiin teeti guddo'o;
akka seera keetiititti
lubbuu tiyya hamburi.
157Worri na miidhuu fi
diinoti kiyya heddu'u;
ani ammoo seera keeti irraa hin gorre.
158Worri hin addatanne
jecha keetii waan hin eeganneef,
ani isaan ilaalee diqadhe.
159Ajaja keeti attam akka ani jaaladhu ilaali;
Ee Mootii Waan Maraa,
akka marartii teetiititti,
lubbuu tiyya hamburi.
160Jechi keeti martinuu dhuga'a.
Seerri keeti balchichi martinuu
ka haga bara baraa ti.
Seera Waaqaatiif Ajajamiisa
161Qondaaltoti sababa malee na miidhan;
ani ammoo gadhaa sodaatuun
jecha keeti ulfeessa.
162Akka nama boojuu guddoo dhaggatee,
ani jecha keetitti gammada.
163Ani dhara jibba;
hin diqadhalle'e;
seera keeti ammoo hin jaaladha.
164Seera keeti balchaa saniif,
guyya'atti yennaa torba ani si leellisa.
165Worri seera keeti jaalatu
nageya guddaa qaban;
wonni isaan dande'ee gufachiisulle hin jiru.
166Ee Mootii Waan Maraa,
ani addi'iin fayyisiisa keeti eegadha;
ajaja keetille hin muummessa.
167Lubbuun tiyya seera keeti hin eegatti;
anille guddisee seera san jaaladha.
168Hujiin tiyya martinuu
si duratti ifa waan teeteef,
ani ajaja keetii fi seera keeti hin eegadha.
Daadimata Qarqaarsa Dhaggatiisaaf Dhikaate
169Ee Mootii Waan Maraa,
iyyi tiyya si bira geettuu ti;
akka jecha keetiititti
hubantii naaf kenni.
170Gaaffiin tiyya si bira geettuu ti;
akka waadaa keetiititti na baasi.
171Ati seera keeti waan na barsiittuuf,
afaan kiyya leellisa hin dhangalaasa.
172Seerri keeti marti balchaa waan te'eef,
arrabi kiyya
marroo waadaa keetii faarsuu ti.
173Ani ajaja keeti waan filadheef,
harki keeti na qarqaariisaaf qophowuu ti.
174Ee Mootii Waan Maraa,
ani fayyisiisa keeti halcha;
seerri keetille gammada kiyya.
175Akka si leellisuuf ani lubbuu jiraadhuu ti;
seerri keeti na qarqaaruu ti.
176Ani akka hoolee baddee
karaa irraa goreera;
ani seera keeti waan hin dedhiniif,
ati ana tajaajilaa keeti barbaadi.
Currently Selected:
Kitaaba Faaru'uu 119: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
