Kitaaba Fakkeennaa 8
8
Waamicha Qarumma'aa
1Qarummaan hin waantuu ree?
Hubantiin qoonqoo ol hin qabattuu ree?
2Isiin kooba karaa biraa gubbaa,
addee qaxxaamura kara'aa dhaabbatti.
3Karra gara qacha'aa seenanu biraa,
addee seensuma qacha'aatii,
qoonqoo ifii ol qabattee iyyaa,
4«Ee namoota, ani isin waama;
qoonqoo tiyya ol qabadhee
ilmaan namaa mara waama.
5Isin worri hin bilchaatin qarummaa qabaadha'a;
isin worri gowwaan hubantii qabaadha'a.
6Ani waan bu'aa qabu dubbataaraa caqasa'a;
waan sirrii te'e dubbatiisaaf
afaan kiyya saaqadha.
7Afaan kiyya dhugaa dubbata;
arrabi kiyya waan hantuu jibba.
8Jechooti afaan kiyyaa marti haqa;
isaan keessaa daddabaan
yookiin micciiramaan hin jiru.
9Worra hubantii qabuuf,
marti isaaniituu ifa;
worra beekkumsa qabuuf dokonkora hin qabu.
10Meetii caalaa gorsa kiyya,
worqii qulqulluu caalaalle beekkumsa filadha'a.
11«Qarummaan dooqa diimaa waan caaltuuf,
wonni ati halchitu marti isii woliin
wol hin qixxoottu.
12«Ani qarummaan,
malaammessummaa woliin jiraadha;
beekkumsii fi qalbeeffatiis kiyya.
13Mootii Waan Maraa sodaatiis
waan hantuu jibbiisa;
ani kooraa fi bondhooriisa,
karaa hama'aa fi dubbii micciirantuu jibba.
14Gorsii fi muraan haqaa tiyya;
ani hubanti'ii fi hunnalle hin qaba.
15Moototi anaan mootii te'an;
bulchitootille anaan seera haqaa baasan.
16Bulchitooti,
qondaaltoti biyya bulchanu martinuu
anaan biyya bulchan.
17Ani worra na jaalatu hin jaaladha;
worri na barbaadatu na hin dhagga.
18Durumma'aa fi ulfinni,
qabeenni hin dabarree fi milkiin na bira jiran.
19Midhaan kiyya
worqii qulqulluu caala;
kennansi kiyya meetii qullittii caala.
20Ani karaa balchumma'aa irra,
daandii haqaa irra ideema.
21Worra na jaalatuuf
qabeenna hin kenna;
gootaraa isaaniille hin guuta.
22«Mootiin Waan Maraa,
hujii ifii ta durii durii san maraan dura,
ana qarummaa dade.
23Jalqaba bara durii durii,
biyyi lafaa adoo hin dadamin ani muudame.
24Yennaa abbaayaan gugurdoon hin jirre,
yennaa maddi bisaaniituu hin jirre ani dhaladhe.
25Gaarotaa fi kooboti adoo hin dadamin dura
ani dhaladhe.
26Waaqi lafa yookiin diida adoo hin dadin dura,
yookiin biyyee biyya lafaa takkaalle adoo hin dadin
ani dhaladhe.
27Yennaa inni abbaaya'aan gubbaa ol-gubbaa diriirse,
ani achi jiraayyu.
28Yennaa inni gubbaa irratti duumensa dade,
yennaa inni madda abbaaya'aa dade,
29bisaan ajaja isaa irra akka hin dabarre,
yennaa inni meessaa abbaayota gugurdo'oo tolche,
yennaa inni meessaa hundee lafaa tolche,
ani achi jiraayyu.
30Ani yennaa san akka ogeessa guddichaa te'ee,
isa woliin achi jiraayyu.
Ani yennaa mara isa duratti gammadaa,
guyyuma guyya'aan
isa gammachiisaa tureeyyu.
31Ani biyya lafaa ta isaa duudi'iin firinxiixaa,
nama maraan gammadaa tureeyyu.
32«Ammalle ilmaan tiyya, na caqasa'a;
worri karaa kiyya eegatu ka gammade.
33Gorsa kiyya caqasa'aatii,
qaroo te'a'a;
gorsa kiyya cadhittanee hin ilaalina'a.
34Nami na caqasu,
ka guyyuma guyya'aan
balbala tiyya duratti dammaqee,
karaa balbala tiyyaa duratti na eegatu
ka gammade.
35Nami na dhaggatu jiruu dhaggata;
Mootii Waan Maraa biralle'etti
fudhatama qabaata.
36Nami na dhabu ifi miidha;
nami na jibbu marti du'a jaalata» jetti.
Currently Selected:
Kitaaba Fakkeennaa 8: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
