Kitaaba Fakkeennaa 5
5
Gaarayyeeffatiisa Irraa Fagaatiisa
1Ilma kiyya, qarummaa tiyyatti xiyyeeffadhu;
gara hubantii tiyyaa gurra keeti deebifadhu.
2Yoo tana goote waan hantu'uu fi
dansaa gargar hin baafatta;
dubbiin teetille beekkumsa hin mudhitti.
3Hidhiin dubartii gaarayyeeffattuu nadhii coccossiti;
dubbiin isi'ii zayitii caalaa lallaatti;
4dhuma irratti ammoo akka hargiisaa hadhootti;
akka shallaagaa qara lamaa
qara qaddi.
5Miilli isi'ii gara du'aa deema;
ijjati isi'ii daandii
gara addee worri du'e jiru geessa.
6Isiin karaa jiru'uu hin yaadattu;
karaan isi'ii daddaba'a;
ammoo isi'itti hin beekkamu.
7Amma ilmaan tiyya,
na caqasa'a;
jecha afaan kiyyaa irraa hin gorina'a.
8Karaa keeti isii irraa fageessi;
qarqara balbala mana isi'iititti hin dhikaatin.
9Yoo tana godhuu dhabaatte,
ulfinna keeti namoota dhibi'iif,
jiruu teetiille
nama marartii hin qannetti hin kennita.
10Karra teetille alagaan hin fudhata;
eloon teetille mana ormaa hin duroonsiti.
11Foon keetii fi nafi keeti yennaa dhumate,
muummee jiruu teetiititti hin aadda;
12ati, «Hayii, ani maaf gorsa jibbe?
Gadhaan kiyya maaf qajeelfama tuffate?
13Ani barsiisota tiyya hin caqanne;
gurra kiyya gara worra na gorsuu hin deebifanne.
14Wolde'a kolba'aa duudii keessatti,
badii guddoo biraan baye» hin jetta.
15Niitii teeti akkuma boolluma bisaanii keetii fi
baleessuma keetii, achuma keessaa uni.
16Maddi keeti diidatti,
bisaan lagaa keeti
karaa keessatti dhangala'uu qabaa ree?
17Isaan si qofaaf te'anuu ti;
alagaa woliin hin qoodamin.
18Maddi keeti ka eebbifame te'uu ti;
niitii teeti ta qeedhumma'aan fuute woliin firinxiixi.
19Isiin jaalatantuu akka gadansaa,
biifa qabeettii
akka jiliba'aa
sii teetuu ti.
Harmi isi'ii yennaa mara
dheebuu si baasuu ti;
jaalala isi'iitiin
yennaa mara machowi.
20Ilma kiyya,
maaf dubartii gaarayyeeffattu'uun machootta?
Maaniif qoma dubartii nama dhibi'ii hanqafatta?
21Hujiin namaa Mootiin Waan Maraa duratti ifa;
inni daandii namaa mara dhagga.
22Nami hamaan hujuma ifiitiin tiyyoo seena;
cubbuma ifiitiin qabama.
23Inni qajeelfama waan dhabeef du'a;
gowwummaa guddoo ifiitiin
karaa irraa miliqa.
Currently Selected:
Kitaaba Fakkeennaa 5: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
