Isaayaasii Raagichaa 62
62
Xiyoon Maqaa Haareya Dhaggatte
1Balchummaan isi'ii akka aduu ganamaa,
fayyinni isi'iille akka xassaa bobe'uu haga issutti,
ani marroo Xiyoonii hin cadhisu;
marroo Yerusaalemii hin sarmu.
2Gosi biyya adda addaa balchummaa teeti,
moototi marti ulfinna keeti hin dhaggan;
maqaa haareya Mootiin Waan Maraa sii kennuun
hin waamanta.
3Ati harka Mootii Waan Maraatitti
akka kallacha ulfinnaa,
harka Waaqa keetiititti
akka kallacha mooti'ii hin teeta.
4Ati haganaa achi,
«Ta lakkifante» hin jedhantu,
yookiin «Lafa duwwaa» hin jedhantu;
Mootiin Waan Maraa waan sitti gammaduuf,
latti teetille abbaa manaa waan qabaattuuf,
ati ammoo, «Gammadi kiyya isi'iin» jedhantee hin waamanta;
latti teetille, «Dubartii abbaa manaa qaddu» jedhantee hin waamanti.
5Akkuma dargaggeessi durra fuudhu,
ilmaan teeti si hin fuuti.
Akkuma waajibichi waajibittii ifiititti gammadu,
Waaqi keetille si'itti hin gammada.
6Ee Yerusaalem,
ani dalleya dhaka'aa keetii irra,
eeddota keyeera;
isaan halkanii fi guyyaa ijjumaa hin cadhisanu.
Isin worri Mootii Waan Maraa waammatanu hin foorfatina'a.
7Haga Mootiin Waan Maraa qachaa Yerusaalemii
deebisee ijaarutti,
kolbaan marti haga isii leellittutti
foora isaaf hin kennina'a.
8Mootiin Waan Maraa harka ifii middicha,
irree ifii jaddu'uun kakatee,
«Ani deebi'ee diinni keeti midhaan keeti akka nyaatu,
daadhii woynii teeti ta ati itti elootte,
ormi akka unu hin godhu.
9Isin worri midhaan galfattanu ammoo,
midhaan san nyaattanee Mootii Waan Maraa hin leellifattan;
isin worri midhaan woyni'ii guurattanu,
badhinna Galma kiyyaa keessatti
daadhii woyni'ii hin untan» jedhe.
10Kolbaa Yerusaalemii, karaa karra qacha'aatiin dabara'a;
kolba'aafille karaa qopheessa'a!
Karaa guddaa baasa'a; dhakaa karaa keessaa kaasa'a;
gosa biyya adda addaatiif baandiraa ol kaasa'a.
11Mootiin Waan Maraa,
«Kolbaa Xiyooniitiin, ‹Kunoo, fayyisaan keessan dhufaara;
gatiin inni isinii kennu,
wonni inni isiniif kaffalu harka isaa jirti› jedha'aan»
jedhee, haga qaccee biyya lafaatitti lasseera.
12Isaan, «Kolbaa Woyyittii,
ta Mootiin Waan Maraa wode» jedhamane hin waamaman.
Yerusaalemille,
«Qachaa barbaadamu,
ka hin lakkifanne»
jedhantee hin waamanti.
Currently Selected:
Isaayaasii Raagichaa 62: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
