ปือบูวัจ 24

โกะ บักซา ยิว อาดู เปาโล

1ลือปัซ ลีมา อารี_ อานานียา_ นู กือปาลา ซามี_ ฌางัน ลูมอฮ อูรัก ตูฮา ซือตืองัฮ_ ฌางัน บูมอยํ บือดะวา ซืออูรัก_ ปือนามา ตือตูลัด_ กูญา ปี กะ นังฆรี ซีซาเรีย. กูญา ปี บือดาปัจ ฌางัน ฮูลู บาลัก นะ ราฌา_ บีดา นะ อาดู เปาโล. 2ตานา บลาโลก เปาโล บรี มาโซะ ดัฮ_ ตือตูลัด ฮึนตะ นะ อาดู เปาโล_ มือเลา จะ_ “โอ ฟีลิก_ เกา นู ฌาดี ซือมียา ซัยํบือซัยํ เออ_ ลามา ดัฮ_ เกา บือเลฮ ปือบือลา กามี บาฌิ_ บรี ดูโดะ ซือนัง โตระ. เกา บลารัก ลาฆู ตะอารัฮ_ ซาเลด บรี ฌาดี ลาฆู นู บาฌิ_ บรี กะ ลูมอฮ บักซา กามี. 3ลาฆู นู บาฌิ กะฆีเตอ_ กามี ซาโงะ ซือลาลู_ ราตา วะตู_ ราตา ตูโปะ. กะฆีเตอ กามี ซือมูฮา บรี ซือลามัจ กะ เกา บาญะ. 4กู ตีเมา มือเลา บาญะ_ นู นะ บรี เกา รือมัย_ ตาปี กู มีตา เดะ เกา_ นะ ตือจีฮัด มือนีงัย กะ ลาฆู ดีกิ ตอจ อีนี เลอ. 5กามี นี เลอ_ ลีฮัจ จะ_ ซือมียา อีนี ฌาดี ซือมียา ฮอย เตด ตือปากัย. ญา บูวัจ ลาฆู ฆาโดฮ_ เดะ ตืองัฮ ลูมอฮ บักซา ยิว_ ราตา ดือนียา. ญา ฌาดี กือปาลา ซืออูรัก_ เดะ ปาโซะ นะ ลูมอฮ นาซาเรด. 6-8ญา กือวาซา นะ บูวัจ บรี รูมัฮ มือญือมัฮ ตูฮัด นะ กามี_ ฌาดี ตะอารัฮ ดัฮ. กะฆีเตอ เลอ_ กามี บือเลฮ รีฆะ ญา.#24.6-8 ซูรัจ ลามา ซือตืองัฮ บือตามัฮ ปือมือเลา กะฆีนี_ “กามี อีงัจ นะ กรัจ ฮูโกบ ญา_ บือกะ ปือมือเลา ฮูโกบ นะ กามี. ตาปี ลีซียา_ กือปาลา ตาฮัน นู บือซัยํ_ ญา มาแรฮ ดัฮ_ บูวัจ กรัซ ตือลาลู_ ราปัซ อาเมด ญา เดะ ตางัน นะ กามี. ลาลู ลีซียา ปือซัด กะ ซือมียา นู อาดู ญา_ บรี กูญา มาแรฮ ซารี เกา.” อาดู เกา ซาซัจ ญา_ อีซี เกา ตะอาซิก นะ ลีฮัจ ลาฆู ซือมูฮา_ นู กามี อาดู ญา กะฆีนี.”

9โกะ ลูมอฮ บักซา ยิว_ กูญา ปาคัจ อาดู ญา_ ซาโงะ จะ_ ลาฆู กะฆีเตอ_ ฌาดี ซูโงฮ เลอ.

เปาโล ตีกัฮ โกะ บักซา ยิว

10ฮูลู บาลัก ฟีลิก ญา ลามัย เปาโล_ บรี ตีกัฮ กะ กูญา. กะฆีเตอ เปาโล มือเลา จะ_ “กู ตาฮู จะ_ เกา ฌาดี ซือมียา กรัจ ฮูโกบ บักซา อีนี_ บาญะ ตาโฮด ดัฮ. กะฆีเตอ_ กู ซูกา ฮาตี_ นะ ตีกัฮ ปาซัน นู อาดู อีนี. 11เกา บือเลฮ ตาฮู ดัฮ จะ_ เตด รอจ กะ ดูวา บือลัซ อารี_ นู กู ปี กะ นังฆรี เยรูซาเลม ดัฮ_ บีดา นะ มือญือมัฮ กะ ตูฮัด. 12โกะ บักซา ยิว เตด บือเลฮ ดาปัจ กู บือตือฆัฮ ฌางัน ซาปา_ เดะ รูมัฮ มือญือมัฮ ตูฮัด. กูญา เตด บือเลฮ ดาปัจ กู_ ตืองัฮ อาโจบ ลูมอฮ ซือมียา บรี กือลาจุ_ เตด จะ เดะ ดาลับ รูมัฮ บือมุน นู ดีฮา_ เดะ นังฆรี เยรูซาเลม โปด_ ฮอย. 13นู กูญา อาดู กู เดะ ปาซัน อีนี_ กูญา ฮอย ลาฆู ปือมือเลา นู นะ ฌาดี ซะซรี นามา โปด. 14ตาปี กู ยอม ซาโงะ ฌางัน เกา จะ_ กู มือญือมัฮ กะ ตูฮัด เดะ อาตัซ_ ตูฮัด นะ โกะ บีลาแก นะ กามี_ ตูโรจ กะ ลาฆู ฌาลัด อีตู_ นู กูญา จะ_ ซือซัจ ดัฮ. ตาปี กู ปือจายา ลาฆู ซือมูฮา นู ฆาแรฮ ดัฮ_ เดะ ซูรัจ ปือมือเลา ฮูโกบ นะ มูซา_ เดะ ซูรัจ นะ โกะ ซือมียา ตูโดฮ ลาฆู นะ ตูฮัด ซือมูฮา. 15ซือรูปา บือกะ นู กูญา ปือจายา_ กู โปด_ อาดา ฮาระ กะ ตูฮัด ฌูฆา จะ_ ลูมอฮ ซือมียา มาตี ซือมูฮา_ นะ ฮีโดะ ปาเระ เดะ มาตี_ ฌางัน ซือมียา นู บาฌิ_ ฌางัน ซือมียา นู ฌาฮัจ ฌูฆา. 16กะฆีเตอ_ กู ราเฌด นะ ตูโรจ ลาฆู_ นู กู อีงัจ เดะ ฮาตี_ เตด ซาลัฮ ฌางัน ตูฮัด_ เตด ซาลัฮ ฌางัน ซือมียา ฌูฆา.

17“ลือปัซ กู ดูโดะ เดะ นังฆรี อาซิก บาญะ ตาโฮด ดัฮ_ กู บือเลฮ มาแรฮ กะ บักซา นะ กู ปูลัก_ บีดา อาเมด ดูเวะ_ มาแรฮ ฮาฆิ กะ อูรัก ฮาฌะ ซือตืองัฮ_ บีดา อาเมด โกะ ซือบารัก มาแรฮ มือนืองะ มือญือมัฮ กะ ตูฮัด ฌูฆา. 18ตืองัฮ กู บูวัจ กะฆีเตอ_ กูญา ดาปัจ กู เดะ รูมัฮ มือญือมัฮ ตูฮัด_ บารู บูวัจ ลาฆู บาโซฮ ญาวา ดัฮ. วะตู อีตู_ ฮอย ซือมียา บาญะ บือซามา ฌางัน กู_ ฮอย ลาฆู กือลาจุ นามา โปด. 19ตาปี อาดา ลูมอฮ ยิว ซือตืองัฮ_ นู มาแรฮ ดาตัก เดะ นังฆรี เอเซีย. ดัฮ กูญา อาดา ปาซัน นามา นะ อาดู กู_ อีซี กูญา โปด_ ฆาโดฮ นะ มาแรฮ อาดู_ โซะ ฮือลด เกา. 20ตาปี บรี ลูมอฮ ซือมียา อีนี_ มือญาเระ บรี ตาฮู จะ_ วะตู กู บือดีรี โซะ ฮือลด ลูมอฮ บือมุน บือกีรา_ กูญา ดาปัจ ลาฆู ซาลัฮ นามา เดะ กู_ 21ลือเบฮ ซา ลาฆู อีนี_ นู กู บือซูระ เดะ ตืองัฮ ลูมอฮ กูญา จะ_ ‘อารี อีนี_ กาเญา นะ กรัจ ฮูโกบ กู_ ปาซัน ลาฆู นู กู ปือจายา จะ_ ซือมียา ซือมูฮา นะ ฮีโดะ ปาเระ เดะ มาตี.’ ” เปาโล ญา จะ.

22ฟีลิก ญา ตาฮู ปาซัน ฌาลัด นะ เยซู_ บาฌิ ดัฮ. กะฆีเตอ_ ซูดัฮ ญา ดืองัยํ เปาโล ฮาบิฮ ดัฮ_ ญา อูบัฮ บรี ดืองัยํ ลาฆู อีตู_ เดะ อารี อาซิก ปูลัก. ญา มือเลา จะ_ “ตานา ลีซียา_ นู กือปาลา ตาฮัน บือซัยํ_ นะ มาแรฮ_ กู นะ บรี ลาฆู นะ เกา ซือลือซัย ดัฮ.”

23ญา ปือซัด กือปาลา ตาฮัน ซืออูรัก_ บรี ฌาฆา เปาโล_ ตาปี ฌางัน บอฮ ราตัย_ ฌางัน บลารัก ซาปา เดะ ลูมอฮ ฆูๆ นะ ญา_ นู นะ มาแรฮ ฌือเงาะ ลีฮัจ_ มาแรฮ ปือบือลา ญา.

เปาโล ดาปัจ ฟีลิก ฌางัน ดรูซีลา

24ลือปัซ บาญะ อารี ดัฮ_ ฟีลิก มาแรฮ ฌางัน ดรูซีลา_ บีนี นะ ญา_ นู ฌาดี นีบีนี บักซา ยิว ซืออูรัก. ญา ซูโรฮ บาวา เปาโล มาแรฮ_ บีดา นะ ดืองัยํ ปือมือเลา นะ ญา_ ปาซัน ลาฆู ปือจายา กะ เยซู คริด. 25ตาปี ซูดัฮ เปาโล มือญาเระ_ ปาซัน ลาฆู นู บาฌิ ตือปัจ_ ลาฆู ฮูโกบ ฮาตี ตะอาซิก_ ปาซัน อารี กรัจ ฮูโกบ นู นะ มาแรฮ รอจ_ ฟีลิก ญา ตาโกจ ตือกือฌุจ_ มือเลา จะ_ “กาลา อีนี_ บรี เกา ปี ดูลู. วะตู กู อาดา จือลัฮ_ กู นะ บลาโลก เกา ปูลัก.”

26ซูโงฮ เลอ_ ฟีลิก จาดัก เดะ ฮาตี_ นู เปาโล นะ ซูวะ ดูเวะ กะ ญา. กะฆีเตอ_ ญา บลาโลก เปาโล มาแรฮ ซัจๆ_ มือเลา ฌางัน ญา. 27ลือปัซ ดูวา ตาโฮด_ ปอซียัด เฟซะตัด มาแรฮ ฌาดี ฮูลู บาลัก นะ ราฌา_ ฆาตี ฟีลิก. ฟีลิก อีงัจ นะ บรี ลูมอฮ บักซา ยิว ซูกา ฮาตี_ กะฆีเตอ ญา บรี เปาโล ดูโดะ เดะ ปือฌารา ลาฆี.

Currently Selected:

ปือบูวัจ 24: ULBIBLE

Highlight

Copy

Compare