ปือบูวัจ 14

โกะ ปือญูโรฮ ดูวา อูรัก ปี กะ นังฆรี อิโกนียุม

1เดะ นังฆรี อิโกนียุม ฌาดี กะฆีเตอ ฌูฆา. เปาโล ฌางัน บานาบัด_ ปี มาโซะ กะ รูมัฮ บือมุน นะ บักซา ยิว. กูญา ดูวา อูรัก มือเลา กือมัซๆ_ บูวัจ บรี ซือมียา บาญะ ปือจายา กะ เยซู. อาดา นู บักซา ยิว_ ฌางัน บักซา กรีก ฌูฆา. 2ตาปี โกะ บักซา ยิว นู ตีเมา ปือจายา_ กูญา อาโจบ ซือมียา บักซา อาซิก_ บรี อีงัจ ฌาฮัจ กะ ลูมอฮ ดีบราดี นู ปือจายา.

3กูญา ดูวา อูรัก ดูโดะ ปัจ อีตู ลามา_ ฮาตี บรานี มือญาเระ_ ลาฆู นะ ตูฮัด_ ปาซัน นู ตูฮัด ญา ฮาลัย บรี ซือลามัจ กะ อูมัจ ซือมียา. ตูฮัด_ ญา บรี กูญา ดูวา อูรัก_ บูวัจ ปือนานา ซีดี นู ปือและ ซูโงฮ. กะฆีเตอ ญา บรี ลีฮัจ จะ_ ปือมือเลา นะ กูญา_ ฌาดี ลาฆู ซูโงฮ. 4ตาปี ลูมอฮ ซือมียา เดะ นังฆรี อีตู_ บือปือจัฮ ฌาดี ดูวา บือลัฮ. ซือตืองัฮ อาดา โซะ โกะ บักซา ยิว_ ซือตืองัฮ อาดา โซะ โกะ ปือญูโรฮ ดูวา อูรัก. 5อาดา ซือมียา บักซา อาซิก_ ฌางัน ซือมียา บักซา ยิว_ ฌางัน โกะ กือปาลา นะ กูญา เตอ_ กูญา ปาคัจ บรีงัจ บือซามา_ นะ บูวัจ ฌาฮัจ กะ เปาโล ฌางัน บานาบัด_ นะ อาเมด บาตู มาแรฮ ลีปัยํ_ บรี บูนอฮ กูญา. 6กาลา กูญา ดูวา อูรัก ตาฮู ลาฆู อีนี_ กูญา ลารี ปี กะ โซะ ตูโปะ ลิดซือตรา_ ตูโปะ ดือบี_ โซะ ซือบือลัฮ นังฆรี ลีกาโอเนีย_ ฌางัน โกะ ตูโปะ อาซิกๆ โซะ อีตู. 7ปัจ อีตู_ กูญา ดูวา อูรัก มือญาเระ บรีตา นู บาฌิ นะ เยซู.

เปาโล ฌางัน บานาบัด เดะ ตูโปะ ลิดซือตรา ตูโปะ ดือบี

8เดะ นังฆรี ลิดซือตรา_ อาดา ซือมียา ซืออูรัก นู ฌาลัด เตด บือเลฮ. ตะเดะ ดูโดะ เดะ อาปี_ ญา จาเปะ_ เตด ดือละ บือฌาลัด ลาลู. 9ญา ดูโดะ ปัจ อีตู_ มือนีงัย ปือมือเลา นะ เปาโล. เปาโล ตีญุง กะ ญา_ ลีฮัจ ญา อาดา ฮาตี ปือจายา_ บีดา นะ บือเลฮ ปือบือลา บรี ซือนัง. 10กะฆีเตอ_ เปาโล มือเลา ซือวารา บือซัยํ_ จะ_ “บีกัซ เลอ. บือดีรี ฌางัน กากี นะ เกา.”

ซือมียา อีตู มือลูปัจ_ บือฌาลัด. 11ตานา โกะ ซือมียา บาญะ กูญา ลีฮัจ บือฆารี ปือบูวัจ นะ เปาโล_ กูญา ฮึนตะ บือซูระ เดะ บาซา นะ กูญา_ จะ_ “ลูมอฮ ดาโตะ นะ กีตา_ ตูโรด มาแรฮ ดัฮ_ อีซี ญาวา ซือรูปา ซือมียา เลอ.”

12กูญา บลาโลก บานาบัด ปือนามา จะ_ พระซุด. กูญา ลีฮัจ จะ_ เปาโล ฌาดี ซือมียา ปานัย มือเลา_ กะฆีเตอ กูญา บลาโลก จะ_ พระฮือเมด.#14.12 โกะ ลูมอฮ กรีก กูญา ตูเฮะ กะ พระซุด_ นู กูญา บลาโลก จะ_ กือปาลา ลูมอฮ ดาโตะ นะ กูญา. โซะ พระฮือเมด_ ฌาดี ปือญูโรฮ นะ ลูมอฮ ดาโตะ. 13อาดา บาลัย มือญือมัฮ กะ พระซุด_ โซะ ฮือลด ปีตู ตูโปะ. กะฆีเตอ_ ซามี นะ พระซุด_ ญา ตูโตด โกะ ลือมู บาปา มาแรฮ ซือตืองัฮ_ ฌางัน บูงา ซีปัย_ ญา ปี กะ ปีตู ตูโปะ_ ฌางัน ลูมอฮ ซือมียา บาญะ_ บีดา นะ บูนอฮ ลือมู_ มือญือมัฮ กะ โกะ ปือญูโรฮ.

14ตาปี กาลา โกะ ปือญูโรฮ ดูวา อูรัก_ ตาฮู ลาฆู อีตู_ กูญา จูลัด โกะ กาเยด บาฌู นะ กูญา_ บรี จีแจะ.#14.14 นู กูญา จูลัด โกะ กาเยด บาฌู นะ กูญา_ ฌาดี ปือนานา บรี ลีฮัจ จะ_ กูญา ฆาโดฮ ฮาตี โตระ. กูญา บลารี ปี กะ ตืองัฮ ซือมียา บาญะ_ บือซูระ จะ_ 15“กาเญา ซือมูฮา เออ_ บูวัจ นามา ปะ บูวัจ กะฆีนี? กามี ฌูฆา_ ฌาดี ซือมียา เลอ_ ซือรูปา บือกะ กาเญา. กามี มาแรฮ ดัฮ_ บีดา นะ มือญาเระ บรีตา นู บาฌิ กะ กาเญา_ นู จะ_ บรี กาเญา อาเลฮ มาแรฮ เดะ ลาฆู เตด บือฆูนา กะฆีนี_ บรี ซารี ตูฮัด นู ฮีโดะ ซูโงฮ เลอ. ญา เตอ_ บือฌาดี ลาแงะ_ ฌางัน ดือนียา_ ฌางัน ลาโวจ_ ฌางัน โกะ ซือบารัก เดะ โซะ อีตู ซือมูฮา. 16เดะ ฮาดัจ ดูลู_ ตูฮัด ญา บรี ลูมอฮ ซือมียา ซือมูฮา_ ตูโรจ กะ ฌาลัด นะ กูญา ซิกมาซิก. 17ตาปี ญา ซือมาตา บูวัจ บือนา บาฌิ_ บรี ลีฮัจ จะ_ นู ญา เตอ_ ฌาดี ตูฮัด เลอ. ญา บรี กาเญา อาดา ฮูฌัด ตูโตฮ เดะ โซะ ลาแงะ_ อาดา มูเซด นู อาดา บูวัฮ บาญะ_ บรี กาเญา มากัด กือญัง ดัฮ_ บรี ซูกา ฮาตี เลอ.” กูญา จะ.

18มีเซ จะ มือเลา กะฆีนี ดัฮ_ ตาปี ปายัฮ นะ บลารัก ลูมอฮ ซือมียา_ ตีเมา บรี บูนอฮ บือนาตัก_ มือนืองะ มือญือมัฮ กะ กูญา ดูวา อูรัก.

19ตาปี อาดา ซือมียา บักซา ยิว ซือตืองัฮ_ มาแรฮ เดะ นังฆรี อันตีโยก_ ฌางัน นังฆรี อิโกนียุม. กูญา อาโจบ ลูมอฮ ซือมียา_ บรี อาเมด บาตู มาแรฮ ลีปัยํ_ นะ บูนอฮ เปาโล. ลีปัยํ ดัฮ_ กูญา อีเระ ญา_ บือตรือเบะ ปี โซะ ลูวัยํ ตูโปะ_ อาคา จะ_ ญา มาตี ดัฮ. 20ตาปี ตานา โกะ มูเระ มาแรฮ บือดีรี โซะ กือลีลิก เปาโล_ ญา บีกัซ ดัฮ_ มาโซะ กะ ตูโปะ. ฆีปาฆี ญา บือฌาลัด บาลิ ปี ฌางัน บานาบัด_ กะ ตูโปะ ดือบี.

โกะ ปือญูโรฮ ดูวา อูรัก บาลิ ปี ฌือเงาะ ลีฮัจ ลูมอฮ ปือจายา

21เดะ ตูโปะ ดือบี_ กูญา ดูวา อูรัก มือญาเระ บรีตา นู บาฌิ นะ เยซู_ บูวัจ บรี อาดา ซือมียา ฌาดี มูเระ_ บาญะ อูรัก. ลือปัซ อีตู_ กูญา ดูวา อูรัก บาลิ ปี กะ ตูโปะ ลิดซือตรา_ นังฆรี อิโกนียุม_ นังฆรี อันตีโยก ปูลัก. 22ปัจ อีตู กูญา บูวัจ บรี ลูมอฮ มูเระ ตือตู ฮาตี_ ปรีงัจ กะ กูญา_ บรี ตูโรจ กะ เยซู_ ฮาตี รือมัก. กูญา มือเลา จะ_ ดัฮ กีตา นะ อาดา บาฮาเฆด_ เดะ ดือนียา บารู นะ ตูฮัด เตอ_ กีตา ฆาโดฮ นะ ตาฮัด ลาฆู ซูซัฮ บาญะ. 23เดะ โกะ ลูมอฮ นะ ตูฮัด ราตา ตือปัจ_ กูญา ดูวา อูรัก ตืองะ ซือมียา ซือตืองัฮ_ ฌาดี โกะ ซือมียา ปือบือลา กูญา. กูญา บือเลฮ บือซาโวจ_ ตูโรจ ลาฆู บือตาฮัด ซือบารัก มากัด เตอ_ ซรัฮ กูญา อีตู_ บรี ดูโดะ เดะ ตางัน นะ ตูฮัด_ นู กูญา ปือจายา ดัฮ.

24เดะ บลากัก_ กูญา ดูวา อูรัก บือฌาลัด ลาลู นังฆรี ปิซีเดีย_ รอจ กะ นังฆรี ปัมฟีเลีย. 25ตานา กูญา มือญาเระ ปือมือเลา นะ ตูฮัด_ เดะ นังฆรี ปรือกา ดัฮ_ กูญา ปี กะ ตือเปด อะตาเลีย. 26ปัจ อีตู_ กูญา ญาแญะ กาปัน บลายัยํ ปี กะ นังฆรี อันตีโยก. ฌาดี ลูมอฮ นะ ตูฮัด เดะ นังฆรี อันตีโยก อีตู_ นู ซรัฮ กูญา ดูวา อูรัก_ บรี กะ ตูฮัด นะ ฮาลัย บรี ซือลามัจ กะ กูญา_ เดะ ลาฆู บือกรือฌา อีตู_ นู กูญา บารู บูวัจ บรี ซุจ ฮาบิฮ ดัฮ. 27ตานา รอจ นังฆรี อันตีโยก ดัฮ_ กูญา ซูโรฮ ลูมอฮ นะ ตูฮัด_ มาแรฮ บือมุน บือซามา. กูญา ดูวา อูรัก มือญาเระ กะ กูญา_ ลาฆู ซือมูฮา นู ตูฮัด ตูโลก บรี กูญา บูวัจ_ นู ตูฮัด บูกา ปีตู ดัฮ_ บรี กะ ลูมอฮ บักซา อาซิก มาโซะ ปือจายา ดัฮ. 28กูญา ดูโดะ บือซามา ฌางัน ลูมอฮ มูเระ_ ลามา ดัฮ.

Currently Selected:

ปือบูวัจ 14: ULBIBLE

Highlight

Copy

Compare