2 Koronti 6
6
1Kaaɗe mun mu cìn ɗak ashak kǝ Naan zak, bǝ mu ɗang pee wun, mbǝkǝ taji wu lap ɗeret kǝ Naan wu le nǝ a mbii ɗebuu kas. 2Wu kǝlǝng mbii ɗe Naan wur kǝ sat nǝnee,
<<Kaaɗe pee mǝ cìn ɗeret nǝ wul,
ɓǝ wen cìn ɗeret nwaa.
Kaaɗe puus ɓam nǝ jì wul,
ɓǝ wen ɓam waa zak.>>
Azeen-nzeen wen sat nwun nǝ, cicinsǝ nǝ a pee mǝ lap ɗeret mǝ Naan! Kǝzak, cicinsǝ nǝ a puus mǝ kat ɓam pee Naan ɗi.
3Baa mu le mee mbii canshii mmee gurum kas, mbǝkǝ taji mo ɓees ɗak fun nǝ ɗi kas. 4Amma koo a nɗǝǝn ar ɗeɗangyi, bǝ muu kám ngurum mo azeen-nzeen nǝ, Mun a kǝrem mǝ Naan mo, kǝ muu kám nǝ, mun a kǝrem kǝ Naan mo shi gung kǝ shwaajeel ɗes, kǝ mwaan nɗǝǝn mbii lejeel mo. 5Muu shwaanas, kǝ mo naa mɓwoot mun, kǝ muu tong mɓut nenyool kǝ ɓǝlep mo, kǝ ɗak mo ɗes, kǝ tong shi gongpee, kǝ tong kǝ neen, kǝ ciin saam zak. 6Muu kám zeen fun shi mǝse ɗeret kǝ man, kǝ gung shi mǝse ɗe mǝ naajeel nɗǝǝn Riin Ɗeɓang, kǝ shi wal mu azeen-zeen zak, 7kǝ shi pwoo ɗe mo azeen-nzeen, kǝ shiɓal kǝ Naan. Mun kǝ zeen nǝ, kaa leelek ɗin ndǝre mo sǝ, nsarse kǝ nsarkul fun mo. 8Gurum mo le mun a ɗeɗes, amma pak moo waa lejeel mmun zak. Pak gurum moo kwoop mun, ɗang pak moo waa ɓees mun zak. Moo le mun a kaa nenɗung mo sǝ, ɗang mun a nensat zeen mo. 9Gurum mo le mun a kaa baa mo man mun kas sǝ, ɗang mun a ɗe mǝ man pee mo. Mu ɗee kaa muu mumurep sǝ, ɗang mun ɗi kǝ seen. Mo nǝrem mun, jir kǝsǝ, bǝ baa mo twe mun kas. 10Mu ɗee kaa mun aa pǝtuup ɗeewat sǝ, ɗangɓe mun a mɓut nretnyit shidaar-shidaar. Mu ɗee kaa nenjeel mo sǝ, ɗang jir kǝsǝ, bǝ mu le kǝ gurum mo ɗes mo kat long. Mu ɗee kaa baa mun kǝ mee mbii kas sǝ, ɗang jir kǝsǝ, bǝ koo mbii ɗeɗangyi bǝ nǝ a munu.
11Wun nen Koronti mo, wu man nǝ, baa mu sok mee mbii nwun kas. Gyet muu satpwoo nwun agaak mbii ɗe mo nɗǝǝn pǝtuup fun jir. 12Baa gyet mu nook sat nwun mbii ɗe mo nɗǝǝn pǝtuup fun kas. Gyet a wun wu nook sat mmun mbii ɗe mo nɗǝǝn pǝtuup fuu mo. 13Wen ɗang pee wun kaa jep fen mo sǝ, mbǝkǝ wu woo mbii dǝ mo nɗǝǝn pǝtuup fuu mo mmun.
Pǝtuup Fuu Mo, a Peeɗe Naan Wur Tong Ɗi
14Taji wu ɓàlsuk ashak kǝ nen ɗe baa mo shinzeen nNaan kas. Mbǝɗe a mii ɓal ɗak ɗeret kǝ ɗak ɗebish yii? Kǝ a mii ɓal peeɓang kǝ peenkwoo yii? 15Baa mee shaar ashak ɗe nnaar Kristi kǝ Gujwan kas. A mii ɓal ngushinzeen, kǝ ngwe ɗe baa wur shinzeen kas yi? 16A mii ɓal Lu Naan ɗeɗes kǝ lu kùm yii? Pǝtuup fun mo a peeɗe Naan wur tong ɗi, Kaaɗe wur kǝ ten sat sǝ nǝnee,
<<wen ntong ashak kǝ mo,
kǝ wen mmwaan nnaar fu zak.
Wen nɗee a Naan fu,
kǝ mon nɗee a
nen fen mo zak.>> 17Mbǝmǝnǝ bǝ wu put aku,
<<mɓut nen ɗe baa mo shinzeen kas,
kǝ wu ɓàkshak kǝ mo zak,
Daa Naan wur sat akǝsǝ.
Taji wu tung mee mbii ɗe nǝ a ɗerap kas,
ɗangɓe wen nlap wun.
18Wen nɗee a puun fuu,
kǝ wun nɗee a jep fen ɗemish mo, kǝ ɗe mat mo.
A Daa ɗeɓal met jir,
wur sat pwoo mǝnǝ.>>
Currently Selected:
2 Koronti 6: SUR-x-MUPUN
Highlight
Share
Copy
Want to have your highlights saved across all your devices? Sign up or sign in
©2024 Initiative for the Translation and Development of African Languages
