Sealm 66
66
Sealm 65
1Ealle eorðbuend ecne Drihten
wordum wislicum wide herian,
2and his naman secgeað neode mid sealmum
and him wuldres lof wide syllað.
3And gode secgeað, hu his þa goodan weorc
syndon wundorlice wide geond eorðan,
and eac on menigeo mægenes þines
þine feondas þe fæcne leogað.
4Geweorðie wuldres ealdor
eall ðeos eorþe, ecne Drihten;
and þe singe eac, secge geneahhie,
þæt þin nama is ofer eall niða bearn
se hehsta hæleþa cynnes.
5Cumað nu and geseoð, hu cyme weorc
Drihten worhte; synt his domas eac
swiþe egeslice ofer eall ylda bearn.
6He mæg onwendan wætera ðryðe,
þæt þas deopan sæ drige weorðað,
and þa strangan mæg streamas swylce
gefeterian, þæt þu mid fote miht
on treddian eorðan gelice.
7His mægen wealdeð ofer eall manna cyn
on ecnesse awa to feore,
and he ofer ealle þeode eagum wliteð;
þa hine on yrre æghwær gebringað,
ne beoð þa on him sylfum syððan ahafene.
8Bletsigen þeoda bliðe mode
ealle eorðbuend ecne Drihten
and mid stefne lof strang asecgean.
9He mine sawle sette to life,
ne læteð mine fet laðe hreran.
10Ure costade god clæne fyre
soðe dome, swa man seolfor deð,
þonne man hit aseoðeð swyðe mid fyre.
11Þu us on grame swylce gryne gelæddest,
and us bealuwa fela on bæce standeð;
12settest us mænige eac men ofer heafod.
We þuruh fyr farað and þuruh floda þrym,
and ðu us on colnesse clæne gelæddest.
13Ic on þin hus halig gange
and þær tidum þe tifer onsecge;
þær ic min gehat mid hyge gylde,
14þæt mine weleras ær wise gedældan.
Þas ic mid muðe aspræc mine æt þearfe,
þær me costunge cnyssedan geneahhe,
15þæt ic ðe on tifrum teala forgulde
ealle þa gehat, þe ic æfre her
mid minum welerum wis todælde.
16Gehyrað me and her cumað;
ic eow mid soþe secgean wylle,
gif ge godes egesan georne habbað,
hu mycel he dyde minre sawle.
17Þuruh his mihte ic muðe cleopige
oþþe mine tungan tidum blissade.
18Gif ic me unrihtes oncneow awiht on heortan,
ne wite me þæt, wealdend Drihten.
19Forðon me gehyrde hælend Drihten,
and minre stefne beheold strange bene.
20Drihten si gebletsad, þe he ne dyde æfre
nymðe he mine bene bealde gehyrde,
ne his milde mod me dyde fremde.
Currently Selected:
Sealm 66: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
