Sealm 53
53
Sealm LII (53)
1On his heortan cwæð unhydig sum,
ungleawlice, þætte God nære;
heo onsceoniendlice syndon gewordene
and heora willan wraðe besmitene.
Næs þa gōddoend se þe gōd wiste,
ne an furðum ealra wære.
2Þa of heofenum beseah halig Drihten
ofer manna bearn, hwæðer his mihta ða
andgyt ænig ealra hæfde,
oððe God wolde georne secan.
3Ealle heo on ane idelnesse
symle besegan; þa wæs soð nan mann
þe gōd wolde georne wyrcan;
ne an furþum ealra wære.
4Ac ge þæs ealle ne magon andgyt habban
þe unrihtes elne wyrceað
and min folc fretað swa fælne hlaf,
ne hio God wyllað georne ciegan;
5þær hio forhtigað, frecnes egesan
æniges ne þurfon.
For þam manna ban mihtig Drihten
liste tosceadeð, þa him liciað;
beoð þa gehyrwede þe forhycggeað God.
6Hwylc Israela ece hælu
syleð of Sione nymðe sylfa God,
þonne he his folc fægere alyseð
of hæftnyde, halig Drihten?
Þonne Iacob byð on glædum sælum
and Israelas ealle bliðe.
Currently Selected:
Sealm 53: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
