Sealm 140
140
Sealm 139
1Genere me wið niþe on naman þinum
fram yfelum menn, ece Drihten,
and fram þam were, þe wom fremme.
2Þa ealne dæg inwit and facen
hycgeað on heortan þurh hearme geþoht,
hi þæt to gefeohte georne gefremed habbað.
3And heora tungan torncwidum
neode serwað, swa oft nædran doð,
and him aspidas, ætrene wyrmas,
under welerum is gewunad fæste.
4Geheald þu me, Drihten, wið heteniðas
and wið firenfulles folmum swylce,
and fram þam mannum þe man fremmen,
alys þu me lungre, lifes ealdur.
5Þa on hyge þohtan, þæt hi ahyltan me
and minne gang georne swylce,
forhyddan oferhygde me inwitgyrene,
wraðan wealsadan wundnum rapum;
woldan mine fotas gefæstnian,
settan me swyce, þær ic siþade.
6Ic þa to Drihtne cwæð: “þu me eart dyre god;
gehyr min gebed, halig Drihten,
nu ic stefne to þe styrme hlude.”
7Drihten, Drihten, þu eart gedefe mægen
hælo minre, and þu min heafod scealt
on gefeohtdæge feondum awergean.
8Ne alyf þu me æfre ofer lust minne
on fyrenfulra fæcne geðancas,
þa wiðerwearde me wraðe hycgeað;
ne forlæt þu me on lifdagum,
þy læs hi ahafene ofer me hwile weorðen.
9Him ymb heafod hefegast gewinna,
þæt hi mid welerum geworht habbað,
him þæt ilce sceal on gesittan.
10Eac hi feallað on fyres glede,
and þu hi mid fyre facnes gehnegest,
þæt hi þam yrmðum a ne wiðstanden.
11Se getynga wer on teosuspræce,
ne bið se ofer eorþan gereaht ahwær;
unsoðfæstne wer yfel gecnysseð,
oþþe he on eorðan eall forweorðeð.
12Ic þæt gearuwe ongeat, þæt gode deð
Drihten domas, þe on dagum þyssum
wædlum weorðað, wreceð þearfendra.
13Soð is hwæðere, soðfæste nu
þinne naman willað þuruh neod herigean;
scylan eard niman on þinre ansyne,
þa mid ræde her rihte lifigeað.
Currently Selected:
Sealm 140: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
