Efe 4

Ukwahlukana kwezipho zikaMoya lobunye bokukholwa

1Ngakhoke mina sibotshwa ngenxa yeNkosi ngiyalincenga ukuba lihambe ngokufanele ukubizwa elabizwa ngakho, 2ngokuthobeka konke lobumnene. Bekezelelanani ngothando,#Kol 3:12, 13 3likhuthalele ukuqinisa ngezibopho zokuthula ubunye obuvela kuMoya. 4Munye umzimba, munye uMoya, njengalokhu labizelwa ethembeni linye lokubizwa kwenu; 5yinye iNkosi, kunye ukukholwa, lunye ubhaphathizo; 6munye uNkulunkulu, uYise wabo bonke, ophezu kwabo bonke, okubo bonke, ophakathi kwabo bonke. 7Kodwa yilowo lalowo wethu waphiwa umusa ngokwesilinganiso sesipho sikaKristu. 8Ngakhoke kuthiwa:

Ekwenyukeleni kwakhe phezulu walandelwa ngabathunjiweyo, wanika abantu izipho.#Hubo 68:18

9Lokhuke ukuthi wenyukela phezulu, kakutsho yini ukuthi wake wehlela endaweni ezingaphansi zomhlaba na? 10Yena owehlayo nguye owenyukela futhi ngaphezulu kwamazulu wonke, ukuze agcwalise izinto zonke. 11Wanika izipho zakhe ukuba abanye babe ngabaphostoli, abanye babe ngabaprofethi, abanye babe ngabavangeli, labanye babe ngabelusi bebandla, abanye babe ngabafundisi, 12ukuze abangcwele bapheleliselwe umsebenzi ngokukhonza, ekwakhiweni komzimba kaKristu, 13size sifinyelele sonke ebunyeni bokukholwa lasekwazini iNdodana kaNkulunkulu, lasebuntwini obupheleleyo obulinganiswe ngesimo esigcweleyo sikaKristu. 14Ngakhoke kasingabe sisaba ngabantwana abazuliswa bethwalwa yimimoya yonke yokufundisa, sikhohliswa ngabantu ngobuqili babo obulamacebo aduhisayo. 15Kodwa asikhulume iqiniso ngothando, ukuze sikhule ngakho konke kuKristu. 16Yena uyinhloko okuhlanganiselwa kuyo umzimba wonke, ubambane ngamalunga wonke awo, ukhule umzimba nxa ileso laleso isitho sisebenza kuhle, uzakhe ngothando.#Kol 2:19

Isimo esidala lesimo esitsha

17Ngakhoke ngiyaqinisa, ngifakaza lokhu eNkosini, ngithi lingabe lisahamba ngokuhamba kwabezizwe ebuzeni bengqondo yabo. 18Kumnyama engqondweni yabo, behlukene lokuphila kukaNkulunkulu ngenxa yokungazi kwabo, langenxa yobulukhuni benhliziyo yabo. 19Kabaselasihawu, bazinikela emanyaleni, ukuze benze inhlobo zonke zokungcola. 20Kodwa kalimfundanga ngokunjalo uKristu. 21Ngoba selimzwile lafundiswa ngaye, njengoba iqiniso likuJesu, 22ukuba lilahle isimo esidala esokonakeleyo ngezinkanuko zenkohliso, esingesokuhamba kwenu kokuqala,#Kol 3:9 23lenziwe libe batsha emoyeni wengqondo zenu. 24Lambathe isimo esitsha esifuze uNkulunkulu esibonakala ekulungeni lasebungcweleni beqiniso.#Gen 1:26; Kol 3:10

25Ngakhoke lahlani amanga, likhulume iqiniso ilowo lalowo lomakhelwane wakhe, ngoba siyizitho zomzimba munye.#Zek 8:16 26Thukuthelani lingoni; ilanga kalingatshoni lisathukuthela;#Hubo 4:4 27lingamniki uSathane ithuba. 28Olisela kangabe eseba, kodwa kakhuthale asebenze kuhle ngezandla zakhe, ukuze abe lamandla okunika labo abaswelayo. 29Kakungaphumi emlonyeni wenu lalinye ilizwi elibi, kodwa kakube ngelilungele ukwakha njengokufaneleyo ngalesosikhathi, ukuze libe yisibusiso kulabo abezwayo. 30Lingamdabukisi uMoya oNgcwele kaNkulunkulu elabekwa uphawu ngaye kuze kube lusuku lokuhlengwa. 31Yonke inzondo, lentukuthelo, lolaka, lomsindo, lokunyeya, kanye lakho konke okubi, kakususwe phakathi kwenu. 32Libe mnene omunye komunye, lihawukelane, lithethelelane, njengalokhu uNkulunkulu wasithethelela ngoKristu.#Kol 3:13

Currently Selected:

Efe 4: BE1978

Highlight

Copy

Compare