प्रकासितवाक्य 11
11
दुई गभा
1फिर मोकै एक छड़ी दई गई, जो नापन की छड़ी के तराहनी दिखत रहै, और कोई कही, “जा और परमेस्वर के मंदिर और बेदी नाप ले, और बे लोगन की गिनती कर जो मंदिर मैं आराधना करथैं। 2लेकिन मंदिर के बाहर के आँगन कै मत नाप, काहैकि बौ गैर यहूदिन कै दौ गौ है, और बे पवित्र सहर कै बयालिस महेना ले रौंदंगे। 3मैं टाट ओढ़े भै अपने दुई गभा कै भेजंगो, और बे एक हजार दुई सौ साठ दिन ले परमेस्वर के संदेस की भविस्यवाँड़ी करंगे।”
4बे दुई गभा हैं, दुई जैतून के पेंड़ और दुई डीट जो पृथ्वी के प्रभु के सामने ठाड़े रहथैं।#जकर्याह 4:3 5और अगर कोई उनकै नुकसान पहोंचान की कोसिस करै, तौ उनके मोहों से आगी निकरकै उनके बैरियन कै नास करथै; और जो कोई उनकै नुकसान पहोंचान की कोसिस करैगो, बौ मार डारो जागो।#यिर्मयाह 5:14 6उनके झोने आसमान कै बंद करन को हक है, ताकी जब बे परमेस्वर को संदेस सुनामैं, बौ समय मेंहें ना बरसै। बे पानी के सोता मैं भी अधिकार रखथैं, कि उन्हैं खून भी बनाये देमैं; उन्हैं जौ भी अधिकार है कि बे जित्ती बार चाँहे पृथ्वी मैं सब तरह की महामारी की मार करैं।
7जब बे अपनी गभाई को संदेस सुनानो खतम कर लेंगे, तौ बौ जानवर जो अधोलोक मैं से निकरैगो, बौ उनसे लड़ैगो। बौ उनकै हराए कै उन्हैं मार डारैगो,#प्रकासितवाक्य 13:7 8और उनकी लास बौ बड़े नगर के चौहराय मैं पड़ी रैहंगी, जो आत्मिक रीति से सदोम और मिस्र कहो जाथै, जहाँ उनको प्रभु भी क्रूस मैं चढ़ाओ गौ रहै। 9और सब देस, कुलन, भासन, और जातिन के लोग बे लासन कै साढ़े तीन दिन ले देखत रहंगे और कबर मैं दफनान को आदेस ना देंगे। 10इन दोनों की मौत से पृथ्वी के लोग खुस होंगे। बे जस्न मनांगे और एक-दूसरे कै भेंट भेजंगे, काहैकि बे दोनों भविस्यवक्ता पूरी मानव जाति कै बड़ा सताई रहैं। 11साढ़े तीन दिन के बाद परमेस्वर कि तरफ से जिंदगी देन बारी आत्मा निकरी, और उनके भीतर घुस गई, और बे अपने पाँव के बल ठाड़गै, और उनके देखन बारेन के ऊपर बड़ा डर छाए गौ। 12और बे दोनों भविस्यवक्ता स्वर्ग से एक ऊँची अबाज से जौ कहत सुनी, “हिंयाँ ऊपर आओ!” जब उनके बैरी उनकै देखीं, तौ बे बादर ऊपर चढ़कै स्वर्ग मैं चले गै। 13बहे समय एक भैंकर हालाचाला आओ; और नगर को दसमों हिस्सा नास हुई गौ, और सात हजार लोग मारे गै। और बचे भै लोग डराय गै, और स्वर्ग के परमेस्वर की महिमा करीं।#प्रकासितवाक्य 14:7
14दूसरी आफत बीत चुकी है लेकिन तीसरी भयानक आफत जल्दिये आनबारी है!
सातवी तुरहई
15तौ सातमों स्वर्गदूत तुरहई फूँकी, तौ स्वर्ग मैं जौ बारे मैं ऊँची-ऊँची अबाज आन लगी, “अब दुनिया को राज्य हमरे प्रभु को और बाके मसीह को हुई गौ, और बौ हमेसा#11:15 हमेसा और हमेसा राज्य करैगो।”#दानिय्येल 7:27; जकर्याह 14:9 16तब चौबीस बड़े-बूढ़े जो परमेस्वर के सामने अपने-अपने सिंहासन मैं बैठे रहैं, मोहों के बल गिरकै परमेस्वर की आराधना करकै, 17जौ कहेन लगे:
“हे सर्वसक्तिमान प्रभु परमेस्वर, जो है और जो रहै!
हम तेरो धन्यवाद करथैं कि
तैं अपनी बड़ी सामर्थ्य लैकै राज्य करनो सुरु कर दौ है!
18गैर यहूदि गुस्सा से भर गै,
काहैकि तुमरे ऊपर गुस्सा करन को समय आए गौ है,
मरे भैन को न्याय करन को समय आए गौ है।
अपने सेवक, भविस्यवक्तन और पवित्र लोगन कै इनाम देन को समय आए गौ है,
जो तेरे ताहीं आदर रखथै चाँहे बे छोटे-बड़े के जैसे होमैं।
पृथ्वी कै नास करन बारेन कै नास करन को समय आए गौ है!”
19स्वर्ग मैं परमेस्वर को मंदिर खोलो गौ, और वाचा को बक्सा हुँआँ देखो गौ। फिर बिजली चमकी, और ऊँचे अबाज से गड़गड़ाहट भइ और हालाचाला भौ, और बड़ा ओला पड़े।#प्रकासितवाक्य 15:5
Currently Selected:
प्रकासितवाक्य 11: RTu2025
Highlight
Copy
Compare
Share
Want to have your highlights saved across all your devices? Sign up or sign in
The Rana Tharu Bible ©The Word for the World International and Rana Tharu Translation Samithi, Khatima, UttraKhanda, India. 2025
