उत्पत्ति 20
20
अब्राहम और अबीमेलेक
1फिर अब्राहम हूँना से तरिहाँए नेगेब के इलाका के घाँईं आएकै कादेस और सूर के बीच मैं ठहरो, और गरार सहर मैं रहन लगो, 2और अब्राहम अपनी बईय्यर सारा के बारे मै कहन लगो, बौ मेरी बहेनिया है, तौ गरार को राजा अबीमेलेक अपने आदमिन कै भेजकै सारा कै बुलबाए लई। 3रात कै परमेस्वर सपने मै अबीमेलेक से कही, “सुन, जो बईय्यर कै तैं रखो है, बाके बजह से तू मर जागो, काहैकि बौ सादीसुदा है और बाको लोगा है।”
4लेकिन अबीमेलेक अबले सारा के झोने नाय गौ रहै; तौ बौ कहथै, “प्रभु, का तू देस के निर्दोस आदमी कै भी मार डारैगो? 5का बौ खुद मोसे ना कही, कि बौ मेरी बहेनिया है और बौ बईय्यर भी खुद कही, कि बौ मेरो भईय्या है, मैं तौ अपने निस्कपट मन और निर्दोस हाथ से जौ काम करो।”
6परमेस्वर बासे सपने मै कही, “मैं जानथौं कि तू निस्कपट मन से जौ काम करो है, और मैं तोकै रोके भी रखो कि तैं मेरे खिलाफ पाप ना करै; जहे बजह से मैं तोकै बाकै छून तक नाय दौ। 7अब बौ लोग की बईय्यर लौटा। काहैकि बौ भविस्यवक्ता है, और तेरे ताहीं प्रार्थना करैगो, और तू जीत रहगो, लेकिन अगर तू बाकै नाय लौटागो तौ याद रख कि, तू और तेरे जित्ते लोग हैं बे सब मर जांगे।”
8तड़के सुबेरे उठकै अबीमेलेक अपने सब कर्मचारिन कै बुलबाएकै जे सब बात उनकै सुनाईं, और बे लोग गजब डराए गै। 9तौ अबीमेलेक अब्राहम कै बुलबाए कही, “तैं हमरे संग जौ का करो है? मैं तेरे प्रति कौन सो पाप करो रहौं कि तैं मोसे और मेरे राज्य के रहन बारेन से इतनो बड़ो पाप करवाओ? तैं मेरे संग जो व्यवहार करो है, बौ तोकै ना करनो चाहिए रहै।” 10फिर अबीमेलेक अब्राहम से पूँछी, “तैं का समझकै जौ काम करो?”
11अब्राहम कही, मैं जौ काम जौ बजह से करो: कि मैं सोचत रहौं कि जौ जघा मै परमेस्वर को कोई भय कोई कै न है। जौ बजह से बे मोकै मेरी बईय्यर के बजह से मार डारंगे। 12जासे जाधा, सच मै जौ मेरी बहेनिया है, जौ मेरी दऊवा की लौड़िया तौ है लेकिन मेरी अईय्या की लौड़िया नाय है; फिर जौ मेरी बईय्यर बन गई। 13और ऐसो भौ कि जब परमेस्वर मोए अपने दऊवा को घर छोड़कै निकरन की आग्या दई, तौ मैं सारा से कहो कि “तैं मेरे ऊपर जौ कृपा करिये कि हर जघा मैं, आपन जहाँ-जहाँ जांगे हूँना-हूँना तू मेरे बारे मै बतइये कि जौ मेरो भईय्या है।”
14तौ अबीमेलेक अपनी भेंड़, बकरिया, गईंय्या-बरधा और दास, दासिन कै लैकै अब्राहम कै दई, और बाकी बईय्यर सारा कै भी बाकै लौटाए दई। 15और अबीमेलेक कही, “देख, मेरो देस तेरे सामने है, जहाँ तोए भाबै हूँना तैं रह सकथै।” 16अबीमेलेक सारा से कही, “देख, मैं तेरे भईय्या कै एक हजार चाँदी के सिक्का दौ हौं। जो लोग तुम्हारे संग हैं, बे सब लोगन की नजर मैं जौ तुमरी निर्दोसता को सबूत है कि तुम निर्दोस हौ। सब लोगन के सामने, तुमरे संग न्याय भौ है।”
17अब्राहम प्रभु से प्रार्थना करी, और प्रभु अबीमेलेक और बाकी बईय्यर और दासिन कै चंगो करी ताकि बे फिर से बालकन कै पैदा कर सकैं। 18काहैकि प्रभु अब्राहम की बईय्यर सारा की बजह से अबीमेलेक की बईय्यर और बाके घर की सब बईंय्यरन की कोक कै पूरी तरह से बंद कर दई रहै।
Currently Selected:
उत्पत्ति 20: RTu2025
Highlight
Copy
Compare
Share
Want to have your highlights saved across all your devices? Sign up or sign in
The Rana Tharu Bible ©The Word for the World International and Rana Tharu Translation Samithi, Khatima, UttraKhanda, India. 2025
