उत्पत्ति 3
3
मानुसक पापी होय जाने क वर्णन
1योहोवा भगवान जतरा जंगली जोनवारीयान क बोनायो हुतो, हेनु सब मा घोड़सो धुर्त हुतो; हुयो बाई सी कयो, काय छाचीन छे की परमेश्वर न कयो, तुमु इनी वाड़ी क काहना झाड़ोन फोव नी खानो ( रोम 12:9, योएल 8:44, प्रका. 20:2) 2बाई न घोड़सा सी कोहि, इनी वाड़ी क झाड़ क फोव हामु खाय सोकजे; 3बाकु जो झाड़ वाड़ी क वीच मा छे, तेना फोव क वारा मा परमेश्वर कोवले छे की नी ते तुमु ओको खाजे आरु नी ओको छिमजो नी ते तुमु मोर जासु 4ती घोड़सो न बायोर सी कयो, तुमु छाचीन नी मोरसु 5बाखुन परमेश्वर जाने की जेने दाहड़े तुमु हेरो फोव खासु तेने दाहड़े तुमरा डुळा उगड़ी जासे, आरु तुमु वारु भुण्डा क गियान जोड़से ती परमेश्वर जोसा होय जासु (यहेज. 28:2) 6एने: जोत्यार बायर न देखी की हेना झाड़ क फोव खाने मा वारु, आरु देखने मा मनभाऊ, आरु ओकोल आपने क लीय ओसो वी छे, ती होयी हेनाम सी तुड़ीन खादी; आरु आपसा घोरवाळा क वी आपी, जु हेरे सात मा हुतो; आरु हुयो वी खादो। 7ती हेनु दुयो क डुळा उगड़ी गोया, आरु ओको मालुम होयो की हुये नांगा छे; ओतरान कोरीन हुये अंजीर क पान्टा जुड़ जुड़ीन छिन्दरा बोनाय लेदा।
8योहोवा परमेश्वर, जु दाहड़ा क सेळ्ळे टेमे वाड़ी मा फिरतो हुतो, ओको बुल सोमळाय देदो। ती आदम आरु ओकी घोरवाळी वाड़ी क झाड़ क वीच योहोवा परमेश्वर सी डुकाय गोया। 9ती योहोवा परमेश्वर न आयड़ीन आदम सी पुछ्यो, “तु काँ छे?” 10हुयो कयो, “हांव तारा बुले वाड़ी मा सोमळीन बीह गोयु, काहकी हांव नांगु होतु; एकालीय डुकाय गोयु।” 11योहोवा परमेश्वर न कयो, “कुन तुसे बताड्यो की तु नांगु छे? जेना झाड़ क फोव खाने क हांव तुसे मोना कोर्यु होतु, काय तु हेरो फोव खादलु छे?” 12आदम न कयो, “जेनी बायर क तु मारे पुठी रोहने क आपलो छे होयी हेना झाड़ क फोव मेसे आपी, आरु हांव खादु।” 13ती योहोवा परमेश्वर न बायर सी कयो, “तु यो कोरली छे?” बायर न कोहि, घोड़सो न मेसे बोहकाड़ देदो, ती हांव खादी (रोम 7:11, 2 कुरी 11:3, 1 तीमु 2:14) 14ती योहोवा परमेश्वर न घोड़सा सी कयो, “तु जो यो काम कोरलु छे ओतरान कोरीन तु आखा घरोन ढुरोक, आरु आखा जोंगली ढुरो सी जादा शापित छे; तु पेटोल भुरसे जालीस, आरु जीवन भोरीन धुळु चाटतु रोहीस; 15आरु हांव तारे आरु एनी बायोर क वीच मा, आरु तारा ओवलीयाद आरु ओकी ओवलीयाद क वीच मा घाड़ाय पोयदा कोरीस, हुयो तारो मुनका क कुचनी नाखसे, आरु तु एरी पाय पाटली क चावीस।” 16ओळतेन बायोर सी हुयो कयो, हांव तारी पीड़ा आरु तारा भारपाये होयने क दुख क बेस वोदाड़ीस; तु मान्दी होईन पुर्याक पोयदा कोरीस; आरु तारी लालोस तारा घोरवाळा क भीनी रोहसे, आरु हुयो तोर पोर पोरबुता कोरसे (1 कुरी 11:3, इफि 5:22, कुलु 3:18) 17आरु आदम सी हेनासी कयो, “तु जो आपसी घोरवाळी क वात सोमळ्यु, आरु जेना झाड़ क फोव क वारा हांव तुसे हुकुम आपलु होतु की तु हेनाक नी खानो, ओको तु खादलो छे, ओतरान कोरीन कोळ तार कारण शापित छे। तु ओको उपज जीवन भोर दुख क सात खाया कोरीस (इब्रा 6:8) 18आरु हुयो तारे लीय काटा आरु ऊँटकटारे उगाड़से, आरु खेत क उपज खाईस; 19आरु आपसा माथा क पेसोव क रुटा खाया कोरीस, आरु आखरी मा धुळा मा मेळ जाईस; काहकी तु एना मासी निकावला गोयला छे, तु धुळु ते छे आरु धुऴा मा ओळी मीळ जाईस।” 20आदम न आपसी घोरवाळी क नाव हेवा पाड़्यो; काहकी जोतरा मानसे जीवतला छे हेनु सब क मुलमाता हुयी होयी। 21आरु योहोवा परमेश्वर न आदम आरु ओकी लाड़ी क लीय चामड़ा क छिन्दरा बोनावीन ओको पेहराय देदो। 22ओळी योहोवा परमेश्वर न कयो, “मानुस वारु भुण्डा क गियान पावीन हामु मा सी एक क जोसा होय गोया छे: ओतरान कोरीन हिमी ओसो नी होय, की हुयो हात बोड़ावीन जीवन क झाड़ क फोव वी तुड़ीन खाय ले आरु होमीसा जीवतो रोहे।” 23ओतरान कोरीन योहोवा परमेश्वर न ओको अदन क वाड़ी मासी निकाळ देदो की हियो हेना जागा पोर कीरसानी कोरे जेनामा सी त्यो बोनावलो गोयो हुतो। 24ओतरान कोरीन आदम क हुयो निकाळ देदो आरु जीवन क झाड़ क वाट क पेहरो देने क लीय अदन क वाड़ी क उगेवनो भिनी करुबो क, आरु च्यारु मेर फिरनेवाऴा आगठा जोसो तलवार क वी नेवाड़ कोर देदो।
Currently Selected:
उत्पत्ति 3: Dii25
Highlight
Copy
Compare
Share
Want to have your highlights saved across all your devices? Sign up or sign in
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025
