LOMA 10

1BAKUNYI, muxekyelelu ă mucima ămene ku bwalo bwabo yi lulombu lumbalombela ku mpala a Ncembi bidi bwalo bwa kupandixibwa kwabo. 2Bwalo bumbatobôlela ntôbô ene, badi yi mwokulu ă Ncembi, kate kumoni ă bwinu. 3Bwalo bwamasakabo yi kilubukilu kia nkwami ya Ncembi, yi bwalo bwamapalalabo kusubisa nkwami yabo, ndo butakwedeyabo nkwami ya Ncembi.

4Bwalo budi Kalistu kisudeyelu kia bwadi ku bwalo bwa nkwamiku mucwe ă muntu mwoso amakwetabusa. 5Bwalo bwamafunda Mosese dia nkwami idi ya bwadi ene, Muntu you amakwenca malo aa unakala yi môyo kudio. 6Mo nkwami ya kwetabusa yamatôya noku ene, Kutôyi mu mucima ěbe ene, Ñani unabanda mu diulu ? (ndo kufikisa Kalistu paxi) ; 7ndo ene, Ñani unapweka munda mwa dina kibiyi ? (ndo kubisa Kalistu kudi bafu). 8Kate yamatôya beci ? Ene, Diyi didi pepe yinebe, ku musuku ěbe, yi ku mucima ěbe ; ka dedi ndo diyi dia kwetabusa ditwamasakola ; 9ene, aka owe unasakola Yisu ku musuku ěbe ene, Fumu ; yi ndo unakwetabusa ku mucima ěbe ene, Ncembi akamubisa kudi bafu, unapandixibwa. 10Bwalo bwamakwetabusa muntu yi mucima ku nkwami, yi ku musuku kwamasakola muntu ku kupandixibwa kwa môyo. 11Bwalo bwamatôya mukanda ă Ncembi ene, Muntu mwoso umwetabuxila kanaxipibwa bundu. 12Bwalo butasoxiyañana muna Yuda yi muna Ngiliki ; bwalo budi Fumu you kulu kwa bantu boso, yi amalekola yi madidi apapayi bantu boso bamwabila. 13Bwalo bunapandixibwa muntu you, isanga muntu mwoso unakwabila dina dia Fumu.

14Kaninga banakwabila muntu beci utasokwetabuxilabo ? Yi banakwetabuxila muntu beci utasokwombwabo diembi dienci ? Yi banakwombwa beci kutena mwambidi a diembi ? 15Yi banakwambila diembi beci kutena bamatumibwa ? Bea biakafundibwa ene, Kai lwoxixi ludi yi makasa abo a bantu bacwala losangu lunengela lwa malo anengela !

16Kate kabakwedeya losangu lunengela bungi bwabo kumoni. Bwalo bwamatôya Esaya ene, Fumu, nani amakwetabusa mwoximo ěcu ? 17Mbwôso kwetabusa kulolwa ku mwoximo, yi mwoximo ulolwa ku diyi dia Ncembi.

18Kate ngwapangusa ene, Ki bamakwombwa bobo ? Ya, sôsôlwo. Ku bungi bwa loboko ndo kwamabatuka mutôyelu ăbo, yi meyi abo pôi ku sula kwa loboko.

19Kate ngwapangusa ene, Bena Isalele bakadi kabasolubukwa ? Ku buxi Mosese amatôya ene, Nakunwombwesa mwokunyo ku bubila butena bubila ; ku bubila butena yi lukanyi ndo kunanuteka yi bituku. 20Mo Esaya udi yi mucima mungi ; yei amatôya ene, Namasokololebwa kudi bantu batangupaladili ; namalwa kwebexebwa kudi bantu batangwapanguxili. 21Mo ku bwalo bwa Isalele kwatôyayi ene, Dituku dincimancima namaxombola bianca biamene kudi bantu batasokwetabuxixibwa, bamapetola mpeto.

Currently Selected:

LOMA 10: Luna_NT

Highlight

Copy