EBELEO 12

1MBWÔSO coco kabidi, bwalo butwamadingibwa yi kimbukuma bunene noku kia bena ntôbô bea lubungi, twekyeyi buxitu bwoso yi bubi budi yi lungwoso lwa kutucimbila, yi tusamboli sambo yi bwika amaxembama ku mpala ecu ; 2tudi mu kudingila Yisu sosonyi, mubangodi yi musudeyi a kwetabusa. Yei, ku bwalo bwa kiango kiakatekyebwa ku mpala anci, akatata nkulusu yi bwika, akatamuna bundu bobu, yi amaxikama ku kidyo kia lukwasa lwa Ncembi. 3Nwelekyesi pako you akakwekyela yi mpeto bungi noku yakapetolebwa kudi boni, binutaxepenyuka yi binutaxepwangwa mu micima yenu. 4Nonu nukidi kanutandili pôi ku maxi pa kusungwañana yi bubi. 5Yi nwamakwelwa kibondelu kinwabondabonda luna bana, ene, Mwanami, kutamuni kwekyelesa kwa Fumu, kupwangwi pa kukamibwa dikamu kudiyi ; 6bwalo bwamakwekyelesa Fumu muntu you amanangayi, yi amakuma mwana mwoso amangatayi. 7Nonu nwombombwa kusama bwalo bwa kwekyelexebwa ; Ncembi udi mu kwenca yinenu bea yi bana. Ape mwana kai udiko utasomukuma tetenci ? 8Mo ndo nwakala kutena kwekyelexebwa, kwamatekyebwa bana boso babanyañani yinaku, nudi lolo bana ba sanga, kumoni bana.

9Bunga bwalo kabidi ; twakadi yi batetecu ba munyu ěcu ba kutwekyelesa, yi twakabanemeka ; ki tuxedika kwedeya Tete a bidimu ndo kwakala yi môyo ? 10Bwalo bwakatwombwesabo kusama matuku mabende bea biakadi loko ku meso abo, mo yei ku bwalo bwa kutetowa kwecu, bituxekwabanyañana ku babala anci. 11Kusama kwoso kutwamakwombwexebwa kakusomoneka kiango ku kikondo kieki, kate buxitu ; kaninga kunyuma kulolwa dimona dia polo ku bwalo bwa bantu bamakixixibwa kudiku, dimoma dia nkwami.

12Mbwôso nusangoli bianca bialembelela muxi, yi binu bialukuta ; 13yi nuxembeyi ncila swi bwalo bwa makasa enu, ximbi muna kitumbi uxepengowexebwa ; mo bixencincidixibwayi. 14Nulabeli polo yi bantu boso, yi mwosambu ou ă kubalolebwa utasolubukwa muntu kumona Fumu kutena udi yinau. 15Nuxexeli ximbi muntu mwoso udiko amaxikila bwalo bwa lwoxixi lwa Ncembi ; ximbi dicina dioso dia bululu dixemena yi dixenutepesa, yi bangi baxepindixibwa kudidio ; 16ximbi mudibi mwoso udiko, ndo muna mwotangu luna Esô, akakwodisa bwabukulu bwanci ku diso dia kidilu kimokimwe kia kudya, 17Bwalo bunwalubukwa kabidi ene, kunyuma pakakyebayi kukita mwokito ă kulwangwasanibwa, akanyañanibwa, bwalo butasañanayi kidi kia kwela lwombixi isanga akapalala kulwangwasanibwa yi masonci.

18Bwalo bunutaluli ku lupongo lubili kubakibwa bianca, lwakalumuxibwa mudilu, ndo ku kupindañana kwa diulu, ndo ku mwedima, ndo ku ngiembi, 19ndo ku mukuma ă mpungi, ndo ku diyi dia miiangu kumoni. Bobo bakadiombwa dedi bakaxengula ene, dinga diyi kadibambidibwi kabidi nyô. 20Bwalo butalubukwabo kwombwa mulangu ăkalangibwa ene, Aka isanga nyama anabakama yi lupongo, unakwelebwa mabwe. 21Yi kimonenu kiakadi bowa bungi noku biakatôya Mosese ene, Ndi yi bowa yi lokomba bongonco. 22Kate nwamalwa ku lupongo lwa Siono ; yi ku bula bwa Ncembi a môyo, Yelusaleme a diulu ; yi ku bimbukuma bia bangele, kisangilu kiabo bungi bwabo ; 23yi ku kikokye kia bana ba buxi bamafundibwa mena abo mu diulu ; yi kudi Ncembi, musambodi a bantu boso ; yi kudi bidimu bia bena nkwami bamakukixibwa ; 24yi kudi Yisu, musambodi a disambi dipyadipya ; yi ku maxi akacakibwa amadika aa a Ebele yi kutôya kwa loko.

25Nudingili binutaxenyañana you atôya. Bwalo ndo bobo bakadi kabasopanduka, pakamunyañanabo akadimusa pa loboko, coco katunapanduka po, bamakulumuka kudi you amadimusa mu diulu. 26Ku kikondo kieki kwakanyingisa diyi dienci loboko ; mo nkyekyu amaxiya kilaka ene, Ku kinga kikondo nakunyingisa kumoni loboko lutupu, kate diuiu kabidi. 27Mo diyi dedi, ene, Ku kinga kikondo kimokimwe, diamakwebesa dia kuncudibwa kwa bintu bebi biamanyingixibwa, bilexi yi bintu biamapangibwa, bixesala bintu bebi bitasonyingixibwa. 28Mbwôso bwalo bututanangata bufumu butabiyi kunyingixibwa, coco twakali yi lwoxixi lutuxexingila Ncembi yinalu yi fionu, yi diedya yi bowa. 29Bwalo budi Ncembi ecu kabidi mudilu ă kupisafiana nya.

Currently Selected:

EBELEO 12: Luna_NT

Highlight

Copy

Compare