Roma 2
2
Mohotara mutus sala atawa buah kokon dulun ma kosucing
2:1-16
1Jadi, kawan konduang co mutus sala atawa buah dulun, ikan mahi sala. Ikan aroko lian mantun iko bujur. Tului, ikan nguan kawan aang co jahat samah isan dulun co tomutus me. Jadi, ma mutus sala atawa buah dulun, sobujur eh ikan mutus arop me leh. 2Kokon to monau bahawa Mohotara sucing kotika Are mohukum dulun co nguan aang co jahat 3Jadi, amun ikan mutus sala atawa buah dulun tapi ikan mahi nguan kawan aang co samah, aroh ikan bopikir Mohotara aroko angar majap ikan! 4Mohotara korinah pio hintang sabar ma ikan. Are aroko holuh majap ikan. Aroh mangap koboraoi-Eh yoh sopele! Ikan sobulih paham bahawa Mohotara poleha koboraoi-Eh ma ikan awi Are jere ina me naat kawan dosam me. 5Tapi ikan makeng. Atoi me aroko kolu naat dosam me. Poko tului iyoh, ikan leh umpi ajapan me botambah meleh bahat kole. Nyan ondo kiamat daai waktu Mohotara poleha Are korinah angit-Eh tohimo dosa, paluh mohukum dulun ma sucing.
6Kotika cioh, Mohotara angar maleh sika kokon dulun sosuai ma kuan gawieh. 7Mohotara angar mihi kobolum sumong kotahi indan dulun co aroko monyarah tapi umpi aang co pio, iyohonon dulun co umpi aang co pio awi nyau tonara Mohotara hintang tomihi hormat ingkan Are, hintang nyau ihin kobolum sumong kototahieh ingkan Are. 8Tapi Mohotara angar korinah sangit hintang mohukum dulun co nganyap hormat indan arop tarop hintang aroko nyau nuhit ajaran co buah, tapi nyau ngumba co jahat. 9Kokon dulun co umpi kojahat angar soranta hintang mondorita, portama-tama dulun Yahudi, hintang ka dulun bokon ma Yahudi. 10Tapi kokon dulun co umpi aang co pio angar tonara, tomohormat hintang bolum landah, portama-tama dulun Yahudi, hintang ka dulun bokon ma Yahudi. 11Awi, Mohotara aroko mila ma kawan dulun totentu.
12Kokon dulun co bodosa angar tomohukum. Dulun bokon ma Yahudi aroko empun porentah hintang poraturan Mohotara co tonulih ponah Hukum Torat. Kokon doh co bodosa angar tomohukum sosuai ma aang co tomonau doh, aroh ma Hukum Torat. Tapi dulun Yahudi empun Hukum Torat. Kokon doh co bodosa angar tomohukum sosuai ma Hukum Torat yoh. 13Awi dulun jarin bujur nyan tohimo Mohotara aroko tului ngoneh Hukum Torat, tapi tului nuhit Hukum Torat yoh. 14Mula dulun co bokon ma Yahudi aroko empun Hukum Torat. Tapi amun iroh ma konyau doh tarop bolum sosuai ma Hukum Torat, maka iroh poleha bahawa atoi doh leh mombimbing iroh samah isan Hukum Torat mombimbing dulun Yahudi. 15Iroh ocop paham sangan Hukum Torat yoh ponah atoi doh leh. Jadi, pikiran ponah atoi doh posala iroh amun iroh umpi aang co jahat, hintang ngilang iroh amun iroh umpi aang co pio. 16Iyoh angar tojadi kotika Mohotara, molalui Kristus Yesus mutus kokon aranaang co tocuhuk ponah atoi kolunon. Ciohboh sosuai ma Tarung Pio co tomomborita kuh
Koadaan dulun Yahudi
2:17–3:8
17Maindeoi ma ikan? Ikan banga nisi arop me dulun Yahudi. Ikan bopikir angar tonyolamat awi ikan empun Hukum Torat. Ikan nara arop tului ikan bangsa co tomili Mohotara. 18Ikan tomajar ingkan Hukum Torat dapot ikan monau kojere Mohotara hintang monau ome co buah hintang co sala. 19Ikan nongkomo yakin bahawa ikan lian nuntun dulun bobuto hintang ngompandau calan indan dulun ponah kopindong. 20Ikan bopikir ikan monau kokon aranaang, hintang uras co buah dapot ikan jarin guru indan dulun co uong kawun pongajar indan dulun co aroko paham ome-ome. 21Ikan majar dulun bokon; Tapi kura ikan aroko majar arop me tarop? Ikan majar dulun, “aroh nako”, tapi kura ikan mahi nako? 22Ikan mantun, “Aroh nyoleweng ma co bokon ma bana atawa oruh!” Kura ikan leh nyoleweng? Ikan ngodolee kopatung kawan dewa. Kura ikan leh morampuk harta-banda ingkan lopo ika nyembah kawan dewa? 23Ikan banga tului ikan empun Hukum Torat. Kura ikan leh mohina Mohotara ma molangar Hukum Torat yoh? 24Isan co tonulih ponah Surat Borasih, “Tului ikan maka kawan bangsa bokon mohina aran Mohotara.”
25Amun ikan nuhit Hukum Torat, maka balak me oko gunaieh. Tapi amun ikan molangar Hukum Torat, maka mohampa leh kohobalak me. 26Sanioh ka, amun oko dulun co aroko tomalak, tapi are nuhit Hukum Torat, maka Mohotara angar norima are samah isan dulun co tomalak. 27Oko kawan dulun co nuhit Hukum Torat, oluco iroh aroko tomalak. Iroh angar mutus sala atawa buah ikan dulun Yahudi co tomalak, iyohonon ikan co empun Hukum Torat tonulih, tapi aroko nuhit eh. 28-29Dulun Yahudi co sobujur eh aroko co somata-mata are tonganak sobagai dulun Yahudi leh. Are sobulih jarin umat Mohotara ponah atoieh. Sanioh ka, dulun co hobalak sobagai ciri are tuu-tuu umat Mohotara, aroko co baya hobalak leh. Are sobulih tomalak ponah atoieh. Are bujur-bujur jarin tioh Mohotara amun are tomombimbing pian Roh Mohotara, aroko tului are nuhit Hukum Torat. Are haba koponara ingkan Mohotara, aroko ingkan kolunon.
Currently Selected:
Roma 2: TBSS
Highlight
Copy
Compare
Share
Want to have your highlights saved across all your devices? Sign up or sign in
Roma 2
2
Mohotara mutus sala atawa buah kokon dulun ma kosucing
2:1-16
1Jadi, kawan konduang co mutus sala atawa buah dulun, ikan mahi sala. Ikan aroko lian mantun iko bujur. Tului, ikan nguan kawan aang co jahat samah isan dulun co tomutus me. Jadi, ma mutus sala atawa buah dulun, sobujur eh ikan mutus arop me leh. 2Kokon to monau bahawa Mohotara sucing kotika Are mohukum dulun co nguan aang co jahat 3Jadi, amun ikan mutus sala atawa buah dulun tapi ikan mahi nguan kawan aang co samah, aroh ikan bopikir Mohotara aroko angar majap ikan! 4Mohotara korinah pio hintang sabar ma ikan. Are aroko holuh majap ikan. Aroh mangap koboraoi-Eh yoh sopele! Ikan sobulih paham bahawa Mohotara poleha koboraoi-Eh ma ikan awi Are jere ina me naat kawan dosam me. 5Tapi ikan makeng. Atoi me aroko kolu naat dosam me. Poko tului iyoh, ikan leh umpi ajapan me botambah meleh bahat kole. Nyan ondo kiamat daai waktu Mohotara poleha Are korinah angit-Eh tohimo dosa, paluh mohukum dulun ma sucing.
6Kotika cioh, Mohotara angar maleh sika kokon dulun sosuai ma kuan gawieh. 7Mohotara angar mihi kobolum sumong kotahi indan dulun co aroko monyarah tapi umpi aang co pio, iyohonon dulun co umpi aang co pio awi nyau tonara Mohotara hintang tomihi hormat ingkan Are, hintang nyau ihin kobolum sumong kototahieh ingkan Are. 8Tapi Mohotara angar korinah sangit hintang mohukum dulun co nganyap hormat indan arop tarop hintang aroko nyau nuhit ajaran co buah, tapi nyau ngumba co jahat. 9Kokon dulun co umpi kojahat angar soranta hintang mondorita, portama-tama dulun Yahudi, hintang ka dulun bokon ma Yahudi. 10Tapi kokon dulun co umpi aang co pio angar tonara, tomohormat hintang bolum landah, portama-tama dulun Yahudi, hintang ka dulun bokon ma Yahudi. 11Awi, Mohotara aroko mila ma kawan dulun totentu.
12Kokon dulun co bodosa angar tomohukum. Dulun bokon ma Yahudi aroko empun porentah hintang poraturan Mohotara co tonulih ponah Hukum Torat. Kokon doh co bodosa angar tomohukum sosuai ma aang co tomonau doh, aroh ma Hukum Torat. Tapi dulun Yahudi empun Hukum Torat. Kokon doh co bodosa angar tomohukum sosuai ma Hukum Torat yoh. 13Awi dulun jarin bujur nyan tohimo Mohotara aroko tului ngoneh Hukum Torat, tapi tului nuhit Hukum Torat yoh. 14Mula dulun co bokon ma Yahudi aroko empun Hukum Torat. Tapi amun iroh ma konyau doh tarop bolum sosuai ma Hukum Torat, maka iroh poleha bahawa atoi doh leh mombimbing iroh samah isan Hukum Torat mombimbing dulun Yahudi. 15Iroh ocop paham sangan Hukum Torat yoh ponah atoi doh leh. Jadi, pikiran ponah atoi doh posala iroh amun iroh umpi aang co jahat, hintang ngilang iroh amun iroh umpi aang co pio. 16Iyoh angar tojadi kotika Mohotara, molalui Kristus Yesus mutus kokon aranaang co tocuhuk ponah atoi kolunon. Ciohboh sosuai ma Tarung Pio co tomomborita kuh
Koadaan dulun Yahudi
2:17–3:8
17Maindeoi ma ikan? Ikan banga nisi arop me dulun Yahudi. Ikan bopikir angar tonyolamat awi ikan empun Hukum Torat. Ikan nara arop tului ikan bangsa co tomili Mohotara. 18Ikan tomajar ingkan Hukum Torat dapot ikan monau kojere Mohotara hintang monau ome co buah hintang co sala. 19Ikan nongkomo yakin bahawa ikan lian nuntun dulun bobuto hintang ngompandau calan indan dulun ponah kopindong. 20Ikan bopikir ikan monau kokon aranaang, hintang uras co buah dapot ikan jarin guru indan dulun co uong kawun pongajar indan dulun co aroko paham ome-ome. 21Ikan majar dulun bokon; Tapi kura ikan aroko majar arop me tarop? Ikan majar dulun, “aroh nako”, tapi kura ikan mahi nako? 22Ikan mantun, “Aroh nyoleweng ma co bokon ma bana atawa oruh!” Kura ikan leh nyoleweng? Ikan ngodolee kopatung kawan dewa. Kura ikan leh morampuk harta-banda ingkan lopo ika nyembah kawan dewa? 23Ikan banga tului ikan empun Hukum Torat. Kura ikan leh mohina Mohotara ma molangar Hukum Torat yoh? 24Isan co tonulih ponah Surat Borasih, “Tului ikan maka kawan bangsa bokon mohina aran Mohotara.”
25Amun ikan nuhit Hukum Torat, maka balak me oko gunaieh. Tapi amun ikan molangar Hukum Torat, maka mohampa leh kohobalak me. 26Sanioh ka, amun oko dulun co aroko tomalak, tapi are nuhit Hukum Torat, maka Mohotara angar norima are samah isan dulun co tomalak. 27Oko kawan dulun co nuhit Hukum Torat, oluco iroh aroko tomalak. Iroh angar mutus sala atawa buah ikan dulun Yahudi co tomalak, iyohonon ikan co empun Hukum Torat tonulih, tapi aroko nuhit eh. 28-29Dulun Yahudi co sobujur eh aroko co somata-mata are tonganak sobagai dulun Yahudi leh. Are sobulih jarin umat Mohotara ponah atoieh. Sanioh ka, dulun co hobalak sobagai ciri are tuu-tuu umat Mohotara, aroko co baya hobalak leh. Are sobulih tomalak ponah atoieh. Are bujur-bujur jarin tioh Mohotara amun are tomombimbing pian Roh Mohotara, aroko tului are nuhit Hukum Torat. Are haba koponara ingkan Mohotara, aroko ingkan kolunon.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in