Захарияа 14
14
Иерусалим хотын түгэс мандал
1Эзэнэй үдэр дүтэлжэ байна. Таанарһаа буляан абтаһан олзо хото соотнай хубаагдаха.
2«Би Иерусалимда эсэргүүсэхын тула бүхы үндэһэтэниие суглуулхам.
Тэдэ хотые эзэлжэ, гэрнүүдые тонохо, эхэнэрнүүдые хүсэрхэн,
хахад зонииень сүлэлгэдэ туужа абаашаха. Үсөөхэн лэ зон хото соо үлэхэ».
3Удаань Түмэн Сэрэгтэ Эзэн тулалдаанай үдэртэ дайладаг шэнгеэрээ тэдэ арад үндэһэтэдтэ эсэргүү дайгаар орохо.
4Тэрэ Иерусалимһаа зүүн тээшэ оршодог Элеон хада гэшхэхэ, тэрэ уула зүүнһээ баруун тээшээ хахаржа, уулын нэгэ талань хойшоо, нүгөө талань урагшаа нүүхэ. 5«Минии уулын хүндыгөөр таанар зугадаха болонот, уулын хүнды Ацээлдэ хүрэхэ юм. Иудын хаан Уззияагай байха үедэ газарай хүдэлэлгэһөө тэрьелһэн шэнги тэрьелхэт».
Тиин минии Бурхан болохо Эзэн заларха,
Тэрээнтэй хамта хамаг гэгээн сэрэгынь ерэхэ.
6Тэрэ үдэр гэрэл гэгээгүй боложо, одо мүшэд унтарха.
7Үдэршье бэшэ, һүнишье бэшэ, гансал Эзэндэ танигдаха юрэ бусын үдэр байха.
Үдэшын лэ сагта гэрэлтэй болохо.
8Тэрэ үдэр амидаралта уһан Иерусалимһаа урдан гаража,
хахад уһаниинь зүүн зүгэй далайда, хахад уһаниинь баруун зүгэй тэнгис далай тээшэ урдаха.
Урасхалынь үбэл, зун таһалгаряагүй урдаха.
9Тэрэ үдэр Эзэн бүхы дэлхэйн хаан боложо,
Эзэн ганса, Тэрэнэй нэрэнь ганса байха.
10Тэрэ үдэр Иерусалимай үмэнэ оршоһон Гээбэһээ Риммоон хүрэтэр газар тала болон хубилбашье, Иерусалим үндын һэргэхэ, Бэньямиинэй хаалгаһаа нэгэдэхи хаалгын газарай углуугай хаалга хүрэтэр, Хананээлэй шулуун барилгаһаа хаанай уһан үзэмэй шахуур хүрэтэр баригдан бодохо. 11Хүнүүд тэндэ амидарха, хараал тунахагүй, дайсан ерэхэгүй, Иерусалим аюулгүй оршохо.
12Иерусалимда эсэргүү дай үүдхэһэн арад түмэниие Эзэн хэһээхэ. Тэдэнэй хүл дээрээ ябаһаар байтарынь, мяхан бэень шалзаржа, нюдэниинь улхархайдаа, хэлэниинь аман соогоо үжэжэ эхилхэ. 13-15Иимэ гай гамшаг дайсанай дунда һүжэрэн дэлгэрхэ. Мүн тэрээндэ адли аймшагтай үбшэн бүхы мори, лууста, тэмээн, элжэгэндэ тудажа сохихо. Тэрэ үдэртэ арад түмэндэ аргагүй ехэ сэдьхэлэй үймөөн һандарал Эзэнһээ буужа, нэгэниинь нүгөөдэдөө эсэргүү гараа далайха. Иудын арад Иерусалимда дайтаха. Тойронхи бүхы үндэһэтэнэй эд баялиг болохо алта мүнгэн, хубсаһа хунар ехээр суглуулагдаха.
16Иерусалимда дайгаар ороһон бүхы үндэһэтэдһөө үлэһэн хүнүүд жэл бүри эндэ ерэжэ, Хаанда, Түмэн Сэрэгтэ Эзэндэ, мүргэн, Майханай һайндэрые тэмдэглэдэг болохо. 17Түмэн Сэрэгтэ Эзэндэ мүргэхэеэ Иерусалим хотодо ерээгүй аймаг угсаатанай газарта хура бороо орохогүй. 18Хэрбээ Египедэй аймаг угсаатан ерээгүй һаа, газар дээрэнь бороо баһал орохогүй. Майханай һайндэрые тэмдэглэхэеэ ерэдэггүй арад үндэһэтэниие Эзэнэй сохихо гай гамшаг энэ юм. 19Майхан баярые тэмдэглэхэеэ ерэдэггүй бүхы арад угсаатанай ба Египедэй нүгэлынь иигэжэ хэһээгдэхэ болоно.
20Эдэ үдэрнүүдтэ бүхы юумэн Эзэндэ хабаатай, моридой хонхонуудшье дээрэ «Эзэнэй арюун» гэжэ һиилэгдэһэн байха болоно. Эзэнэй үргөө соохи эдеэнэй тогоонууд үргэлэй шэрээгэй үмэнэ табяатай аяганууд мэтэ болохо. 21Иерусалим болон Иудада эдеэнэй хамаг тогоонууд Түмэн Сэрэгтэ Эзэнэй арюун зүйл болохо. Тахил үргэгшэ бүхэн тэдэниие абажа, эдеэ шанаха аргатай. Тиигээд Түмэн Сэрэгтэ Эзэнэй үргөөдэ хариин наймаашад байхаяа болихо.
Currently Selected:
Захарияа 14: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
