Матвей 17

(Мк 9:2-13; Лк 9:28-36)

1Зургаан хоногой үнгэрхэдэ, Иисүүс Пётрые, Яков Иоанн хоёр аха дүүнэрые абажа, хүнүүдэй нюдэнһөө далда байдаг үндэр хада өөдэ гараба. 2Тэндэ Иисүүс шабинарайнгаа урда эрид хубилба: нюурынь наран шэнгеэр ялараа, хубсаһаниинь туяа мэтэ һаргама сагаан болоо. 3Гэнтэ тэрээнтэй хөөрэлдэжэ байһан Моисей Элияа хоёр бии болооо. 4Пётр Иисүүстэ:

– Эзэн! Эндэ байхадамнай манда ямар һайн гээшэб! Хэрбээ хүсэбэлтнай, эндэ гурбан майхан бодхоохобди: нэгыень Танда, нэгыень Моисейдэ, үшөө нэгыень Элияада, – гэбэ.

5Тиигэжэ хэлэжэ байтарнь ялагар үүлэнэй һүүдэр тэдэниие хушаба, үүлэнһээ:

– Энэ Минии инаг хайрата Хүбүүмни юм, сэдьхэлэймни урма охин юм; үгыень дуулажа байгты, – гэһэн абяан дуулдаба.

6Энэ абяае дуулахадаа, шабинарынь ехээр айжа, уруугаа хаража газарта унаба. 7Зүгөөр Иисүүс дүтэлжэ, тэдэниие гараараа хүрөөд:

– Бодогты, бү айгты, – гээ. 8Тэдэнэй өөдөө харахадань, Иисүүсһээ ондоо хэншье тэдэндэ харагдабагүй.

9Шабинартаяа хадаһаа буужа ябахадаа, Иисүүс:

– Хүн түрэлхитэнэй Хүбүүнэй үхөөд амидыртар, энэ үзэһэнөө хэндэшье бү хөөрэгты, – гэжэ тэдээндээ захирба.

10– Хуули заадаг багшанар юундэ Бурханай табисуурта Христоосой ерэхын урда тээ Элияа лүндэншэ ерэхэ ёһотой гэдэг бэ? – гэжэ шабинарынь Иисүүсһээ асууба. 11Тиихэдэнь Иисүүс:

– Үнэхөөрөө Элияа түрүүн ерэжэ, бүхы юумые бэлэн болгохо ёһотой. 12Гэбэшье Элияа заларжа ерээ, харин хүнүүд тэрээниие таняагүй, дура зоргоороо тэрээнтэй болоо гэжэ танда хэлэхэ байнаб. Эгээл тиигэжэ тэдэ Хүн түрэлхитэнэй Хүбүүниие зобоохо юм, – гэжэ харюусаа.

13Тиихэдэнь Уһаар Арюудхагша Иоанн тухай Тэрэ хэлэнэ гэжэ шабинарынь ойлгобо.

Ада шүдхэртэ барюулһан хүбүүе эдэгээбэ

14Иисүүсэй шабинартайгаа улад зондо бусажа ерэхэдэнь, Тэрээндэ нэгэ хүн ойртоод, урдань үбдэг дээрээ һүгэдэн:

15– Эзэн! Минии хүбүүе үршөөжэ хайрлыт. Тэрэмни таталзажа унадаг, ада шүдхэрэй хэрзэгыгээр добтолходо, гал, уһа руу ходо һүрэдэг. 16Би тэрэнээ Танай шабинарташье асарааб, теэд тэдэ эдэгээжэ шадаагүй, – гэжэ хэлэбэ.

17– Этигэл һүзэггүй, забхай ябадалтай зон аа! Үшөө хэды шэнээн таанадтай байхабиб? Үшөө хэды болотор таанадые тэбшэхэбиб? Хүбүүгээ наашань Намда абаад ерэ, – гэжэ Иисүүс хэлэбэ. 18Иисүүсэй ада шүдхэртэ захирхадань, тэрэнь хүбүүнэй бэе сооһоо гараба, хүбүүн тэрэ дары эдэгэшэбэ.

19Хожомынь шабинарынь Иисүүстэ гансаараа байхадань дүтэлжэ:

– Яахадаа бидэ тэрэ ада шүдхэрые даража шадабагүй гээшэбибди? – гэжэ һурабад.

20Иисүүс тэдэндэ харюусаба:

– Таанарай этигэл багадаһанһаа болоно. Хэрбээ таанад горчицын жэжэхэн үрэһэнэйшье шэнээхэн этигэлтэй байжа, энэ хадада хандан: «Эндэһээ хүдэлжэ тиишээ боло» гээ һаатнай, хада тиишэлхэ юм. Таанар юушье хэжэ шадаха һэнта гэжэ танда баталан хэлэнэб#17:20 Зарим эртын грек эхэ бэшэгүүдтэ энэ хэһэг үгы байдаг: 21 Эдэ мэтын ада шүдхэрнүүдые имагтал зальбаралаар, масаг сахин даража болохо юм..

Иисүүс дахин үхэхэ тухайгаа хэлэнэ

22-23Бүхы шабинарайнгаа Галилейдэ суглараад байхада, Иисүүс тэдээндээ Өөр тухайгаа:

– Хүн түрэлхитэнэй Хүбүүн хүнүүдэй гарта тушаагдахань, тиигээд Тэрэ алуулаад, гурбадахи үдэртөө амидырха, – гэжэ хэлэбэ. Шабинарынь бултадаа ехээр гашуудаба.

Бурхан Һүмэдэ алба татабари түлэхэ тухай

24Иисүүсэй шабинартайгаа Капернаумда ерэхэдэнь, Һүмын алба татабари суглуулагшад Пётрто ойртоод:

– Багшатнай Һүмэдэ алба татабари түлэхэ гү? – гэжэ һураба.

25– Түлэнгүй яахаб, – гэжэ Пётр хэлээ.

Тиигээд Пётрой гэртэ ороходонь, Иисүүс түрүүлэн:

– Симон, ши юун гэжэ һананабши? Энэ дэлхэйн хаашуул хэнһээ түлөөһэ, алба татабари абадаг бэ? Өөһэдынгөө албатанһаа гү, али хариин зонһоо абадаг гү? – гэжэ һураба.

26Пётр тэрээндэ:

– Хариин зонһоо абадаг, – гэжэ харюусаа. Иисүүс тиигэхэдэнь:

– Тиимэһээ албатан зондонь түлэхэ хэрэггүй гэһэн удхатай бэшэ аал? 27Зүгөөр Бидэ эдэ зониие сухалдуулхагүйбди. Тиимэһээ ши далайн эрьедэ ошожо, загаһа хахуулида. Хахуулидашни ороһон түрүүшын загаһа абаад, амандань мүнгэ#17:27 Тэрэнь хоёр хүнэй алба татабари түлэхэдэ хүрэхэ статир гэжэ нэрэтэй мүнгэ һэн. олохош. Тэрэниие абаад, алба татагшадта Минии түлөө, өөрынгөөшье түлөө үгөөрэй, – гээ һэн.

Currently Selected:

Матвей 17: BurBBL2024

Highlight

Copy

Compare