Даниил 12
12
Сагай эсэс тухай
1Тэрэ үедэ арадайтнай аршалагша сахюусан Михаээл заларан бии болохо. Хүн түрэлтэнэй үдэжэ эхилһэн сагһаа хойшо харагдаа-үзэгдөөгүй хүндэ үе тиихэдэ тохёолдохо. Харин Бурханай ном соо бэшээтэй танай арадай бүхы зон абарагдаха.
2Газарай шорой соо
унтажа байгааша зоной олонхинь
тиихэдэ нойрһоо һэрихэл:
заримань хэтэ мүнхэ ами наһатай болохо,
нүгөөшүүл хэтэ мүнхэдөө нэрээ хухарха, хүндэгүй болохо.
3Сэсэн ухаатайшуул
тэнгэриин мандалай туяа гэрэлдэл яларха,
зүб шударга хэрэгүүдтэ зониие һургагшад
огторгойн одод мэтэ
хододоо, мүнхэдөө яларха!
4Ши, Даниил, эдэ үгэнүүдые ном соо хадагалжа, тамгалаад, энэ дэлхэйн дүүрэтэр нюугаад байгаарай. Олон зон юумэ ойлгохоёо һэдэжэ, тэрэниие бэдэрхэл.
Даниилай һүүлшын үзэгдэл
5Минии, Даниилай, харахада, үшөө хоёр хүн зогсожо байна. Хоюулаа тэдэ голой ондо ондоо эрьенүүд дээрэ. 6Голой урасхал өөдэ байгааша, улһан хубсаһа үмдэгшэ нэгэндээ нүгөөдэнь хандажа:
– Энэ гайхамшагта хэрэгүүд хэзээ дүүрэхэ гээшэб? – гэжэ асууба.
7Голой урасхал өөдэ байгааша, улһан хубсаһа үмдөөшэ тэрэ нэгэн хоёр гараа тэнгэри өөдэ һунгаад, иигэжэ хэлэбэ:
– Хэтэ мүнхын Бурханай нэрээр тангаригланаб: гурбан жэлэй үнгэрхэдэ, нангин арад түмэнэй хүсэ шадалай дууһахада энэ дүүрэхэ.
8Би энээниие дуулабашье, ойлгобогүйб. Тиимэһээ:
– Эзэмни, энэ бүгэдын удаа юун болохо гээшэб? – гэжэ асуубаб.
9Тэрэ:
– Яба, Даниил! Эдэ үгэнүүд нюуса, эсэсэй болотор нюултатай байха ёһотой. 10Олон зон арюудхагдажа, сагааруулагдажа, туршалга гараха, харин хилэнсэгтэ зон муу муухай хэрэгүүдээ үргэлжэлүүлжэ, энээниие ойлгохогүй. Гансал сэсэн мэргэшүүл ойлгохо.
11Үдэр бүриин үргэл болюулһанай, һандаралай мандажа эхилһэнэй удаа нэгэ мянга хоёр зуун ерэн үдэр үнгэрхэ. 12Нэгэ мянга гурбан зуун гушан табан үдэрэй үнгэрхые тэсэбэритэйгээр хүлеэгшэд Бурханай магтаалда хүртэхэ.
13Ши өөрынгөө замаар эсэс хүрэтэрөө ябахаараа яба! Нүгшэжэ амархаш, удаань сагай эсэстэ шагналаа абахаяа дахин бодон һэргэхэш, – гэбэ.
Currently Selected:
Даниил 12: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
