Римӧ 16

Римсаяслы чолӧмъяс

1Ме тӧдмӧда тіянӧс Фива чойкӧд. Сійӧ Кенкреяын вичкоса отсасьысь. 2Сибӧдӧй сійӧс Господь нимсянь, кыдзи лӧсялӧ вежа войтырлы. Быд ногыс отсалӧй сылы, кор ковмас сылы отсӧг. Ачыс ӧд сійӧ уналы отсаліс, тшӧтш меным. 3Висьталӧй чолӧм Прискиллалы да Акиллы. Найӧ мекӧд ӧтвыв кесъялӧны Исус Кристослы. 4Найӧ вӧліны дасьӧсь олӧмнысӧ сетны ме вӧсна. Ог сӧмын ӧтнам ме аттьӧав найӧс, мукӧд войтыръясысь эскысьяслӧн вичкояс тшӧтш аттьӧалӧны. 5Чолӧм тшӧтш на ордын чукӧртчысь эскысьяслы. Чолӧм менам муса Эпенетлы, Акайяын сійӧ медводдзаӧн эскис Кристослы. 6Чолӧм Мариамлы, сійӧ уна уджаліс-отсасис миянлы. 7Чолӧм менам войтырысь Андрониклы да Юниялы, кодъяскӧд ме пукавлі дзескыдінын. Найӧ пыдди пуктана йӧз апостолъяс пӧвстын, и найӧ меысь водз эскисны Кристослы.

8Чолӧм Амплийлы, Господь пытшкын сійӧ меным муса вок. 9Чолӧм Урбанлы, сійӧ миянкӧд ӧтвылысь кесъялӧ Кристослы. Чолӧм муса Стакий ёртлы. 10Чолӧм Апелеслы. Сійӧ Кристос вӧсна уна сьӧкыд пыр муніс. Чолӧм Аристовуллӧн гортсалы. 11Чолӧм менам Иродион рӧдвужлы. Висьталӧй чолӧм Наркислӧн гортсаяс пиысь налы, кодъяс эскӧны Господьлы. 12Чолӧм тшӧтш мӧдӧда Енлысь уджсӧ вӧчысьяслы: Трифеналы да Трифосалы. Чолӧм муса Персида чойлы, сійӧ ёна уджаліс Господьлы. 13Чолӧм Руфослы, Господьӧн бӧрйӧмалы, да сылӧн мамыслы, ӧд сійӧ меным тшӧтш мам кодь. 14Чолӧм Асинкритлы, Флегонтлы, Ермийлы, Патровлы, Ермаслы да накӧд уджалысь вокъяслы. 15Чолӧм Филологлы да Юлиялы, Нирейлы да сылӧн чойыслы, Олимпанлы да накӧд сэні став вежа войтырлы. 16Чолӧмалӧй ӧта-мӧднытӧ вежа окыштӧмӧн. Тіянлы ыстӧны чолӧм Кристослӧн вичкояс.

17Вокъяс, кора тіянӧс, видзчысьӧй да ылыстчӧй наысь, кодъяс пыртӧны вичкоад вензьӧмъяс да кежӧдӧны эскӧмсьыс, мыйӧ тіянӧс велӧдӧма. 18Татшӧм йӧзыс кесъялӧны оз Исус Кристос Господьнымлы, но асланыс рушкулы. Мича сёрнинас найӧ кокньыда ылӧдлӧны восьса сьӧлӧмаясӧс. 19Тіян кывзысяна олӧмныд быдӧнлы бура тӧдса. Таысь меным нимкодь. Кӧсъя, мед эськӧ ті вӧлінныд тэрыбӧсь бурыс вылӧ, но ньӧжмыдӧсь лёкыс вылӧ. 20Лӧньлунсӧ сетысь Ен регыд песовтас сӧтанасӧ тіян кокъяс улӧ. Миян Господь Исус Кристослӧн буралӧмыс тіянкӧд. Аминь.

21Тіянлы ыстӧны чолӧм менам Тимофей уджъёртӧй да ас войтырысь Лукий, Ясон да Сосипатр вокъяс. 22Чолӧмала тіянӧс Господьсянь тшӧтш ме, Тертий, тайӧ гижӧдсӧ гижысь. 23Чолӧм Гайсянь. Сійӧ сибӧдӧ ас ордас став эскысьсӧ, тшӧтш и менӧ. Тіянлы ыстӧны чолӧм Кварт вок да карса сьӧм видзысь Ераст. 24Миян Господь Исус Кристослӧн буралӧмыс ставныдкӧд тіянкӧд. Аминь.

Currently Selected:

Римӧ 16: КБ

Highlight

Copy