Марк 7

Пӧрысьяслӧн шуӧмӧ кутчысьӧм

(Мт. 15:1-9)

1Исус дінӧ локтісны фарисейяс да Ерусалимысь воӧм Индӧдӧ велӧдысьяс. 2Кор найӧ аддзисны, мый Сылӧн велӧдчысьясысь кодсюрӧ сёйӧны няньсӧ мыськытӧм пеж киӧн, кутісны шуасьны на вылӧ. 3Иудейяс, торйӧн нин фарисейяс, кутчысисны пӧрысьяслӧн шуӧмӧ. Найӧ кинысӧ мыськытӧг эз пуксьывны сёйны 4и вузасянінысь локтӧм бӧрын мыссьытӧг эз сёйлыны. Нӧшта уна мукӧдторйӧ на кутчысисны, шуам, дозмук, тасьті-пӧрт да вольпась мыськалӧмӧ.

5Фарисейяс да Индӧдӧ велӧдысьяс юалісны Исуслысь: «Мыйла велӧдчысьясыд оз овны пӧрысьяслӧн шуӧм серти? Мыйла найӧ мыськытӧм киӧн сёйӧны?» 6Исус шуис налы: «Кык бана шаньгаяс! Бура шуӧма Гижӧдас тіян йылысь Исай пророк:

– Тайӧ йӧзыс вомнас пыдди пуктӧны Менӧ,

но налӧн сьӧлӧмныс ылын Меысь.

7Весьшӧрӧ ыдждӧдлӧны Менӧ

мортсянь тшӧктӧмъясӧ велӧдігӧн.

8Ті эновтінныд Енлысь тшӧктӧмсӧ, кутчысянныд мортлӧн шуӧмъясӧ – тасьті-дозмук мыськалӧмӧ да уна мукӧдторйӧ на».

9Исус водзӧ висьталіс: «Сюся ті вештанныд Енлысь тшӧктӧмсӧ, медым кутчысьны батьяслӧн шуӧмӧ. 10Мӧисей шуӧма: ”Пыдди пукты ассьыд бать-мамтӧ”, нӧшта шуӧма: ”Омӧльтан кӧ бать-мамтӧ, тэнӧ кулӧм вылӧ мыждасны”. 11А ті мӧдарӧ велӧданныд. Морт кӧ бать-мамыслы сетӧм пыдди шуас: ”Корбан”, мый лоӧ ”Енлы тайӧс кӧсйыси”, 12сэки ті онӧ нин лэдзӧй мортыслы вӧчны бурсӧ бать-мамыслы. 13Тадзи батьяслӧн шуӧмӧ кутчысьӧмӧн да велӧдӧмӧн ті вештанныд Енлысь кывсӧ. Уна татшӧмтор на ті вӧчанныд».

Мый мортӧс пежалӧ?

(Мт. 15:10-20)

14Исус бара корис йӧзсӧ да шуис налы: «Кывзӧй Менӧ ставныд да гӧгӧрвоӧй. 15Мортӧс оз пежав сійӧ, мый пытшкас пырӧ, а пежалӧ, мый сы пытшкысь петӧ. 16Кодлӧн эм пель, мед кылӧ!»

17Исус колис йӧзсӧ да пырис керкаӧ. Велӧдчысьясыс корисны Сійӧс гӧгӧрвоӧдны висьталӧмсӧ. 18Сійӧ шуис налы: «Весиг ті онӧ гӧгӧрвоӧй! Онӧ ӧмӧй вежӧртӧй: мортӧс оз вермы пежавны сійӧ, мый пытшкас пырӧ, 19ӧд сійӧ оз сьӧлӧмас пыр, а веськалӧ кынӧмас, сэсся ортсӧ петӧ». Тадзи Исус гӧгӧрвоӧдіс, мый став сёяныс сӧстӧм. 20Водзӧ висьталіс: «Мый петӧ морт пытшкысь, сійӧ пежалӧ мортсӧ. 21Буретш морт пытшкысь, сылӧн сьӧлӧмысь, петӧны лёк мӧвпъяс, гозъякост олӧм пежалӧм, кырсалӧм, морт виӧм, 22гусясьӧм, горшасьӧм, лёк вӧчӧм, ылӧдчӧм, лэдзчысьӧм оласног, колысь син, омӧльтӧм, асьсӧ вылӧ пуктӧм да мывкыдтӧмлун. 23Став тайӧ лёкыс петӧ морт пытшкысь да пежалӧ сійӧс».

Аньлӧн эскӧм

(Мт. 15:21-28)

24Сэтысь Исус муніс Тир да Сидон муясӧ. Сійӧ пырис ӧти керкаӧ да эз кӧсйы, мед кодкӧ тӧдіс та йылысь, но йӧзыс тӧдмалісны Сылӧн воӧм йылысь. 25Кывліс Сы йылысь ӧти ань, кодлысь нывсӧ вӧлі кутӧма пеж лов. Ань локтіс да уськӧдчис Исус водзӧ. 26Тайӧ аньыс вӧлі Сирияысь, Финикия войтырысь, сійӧ сёрнитіс грек кывйӧн. Ань корис Исусӧс вӧтлыны ныв пытшкысь пеж ловсӧ. 27Исус шуис: «Медводз мед ныв-пи пӧттӧдзныс сёясны. Абу бур мырддьыны ныв-пилысь няньсӧ да шыбитны сійӧс понпиянлы». 28Ань воча шуис: «Сідз, Господьӧй. Но понъяс тшӧтш пызан улысь сёйӧны ныв-пилысь нянь торпыригсӧ». 29Исус шуис сылы: «Тадз кӧ мӧвпалан, мун, пеж лов петіс тэнад ныв пытшкысь». 30Гортас локтӧм бӧрын ань аддзис: нылыс куйлӧ вольпасьын, пеж лов петӧма сы пытшкысь.

Пельтӧм кылӧ

31Тир да Сидон муясысь петӧм бӧрын Исус локтіс Даскар му пыр Галилея ты дорӧ. 32Сы дінӧ вайӧдісны пыскыль кывъя пельтӧм мортӧс да корисны Исусӧс пуктывны кисӧ тайӧ мортыс вылӧ. 33Исус нуӧдіс сійӧс йӧз дінсьыс бокӧ, пуктіс чуньяссӧ сылы пеляс да сьӧлыштӧмӧн инмӧдчис сылы кывъяс. 34Сэсся енэжӧ видзӧдлӧмӧн ышловзис да шуис пельтӧмлы: «Эффата», мый лоӧ «Воссьы». 35Дзик пыр тайӧ мортыслӧн пельыс воссис да кыв-ворыс разьсис, сійӧ пондіс ясыда сёрнитны.

36Исус ӧлӧдіс йӧзсӧ та йылысь мукӧдлы висьталӧмысь. Но кымын ёна ӧлӧдіс, сымын ёнджыка найӧ висьтавлісны. 37Йӧзыс шензьӧмӧн шензисны да шуалісны: «Сійӧ уна бурсӧ вӧчӧ. Пельтӧмъяслы сетӧ кывны, сёрниттӧмъяслы – сёрнитны».

Currently Selected:

Марк 7: КБ

Highlight

Copy