Марк 2

Вӧрзьӧдчыны вермытӧмӧс бурдӧдӧм

(Мт. 9:1-8; Лк. 5:17-26)

1Кымынкӧ лун мысти Исус бара локтіс Капернаумӧ. Йӧз пӧвстын кывсис, мый Сійӧ гортас, 2и дзик пыр уна йӧз чукӧртчис Сы ордӧ, весиг пыранінас сулалісны. Исус висьталіс налы Енлысь кывсӧ. 3Сэки нёльӧн вайисны вӧрзьӧдчыны вермытӧм мортӧс, 4но уна йӧз вӧсна найӧ эз вермыны матыстчыны Исус дінӧ. Та вӧсна найӧ разисны керка вевтсӧ да Исус весьтті лэдзисны висьысьӧс вольпасьнас. 5Налысь эскӧмсӧ аддзӧмӧн Исус шуис висьысьлы: «Пиӧй, тэнсьыд мыжъястӧ прӧститӧма».

6Сэні пукалісны Индӧдӧ велӧдысьясысь кодсюрӧ да мӧвпалісны: 7«Мыйла Сійӧ Енмӧс омӧльтӧ? Ен кындзи вермас-ӧ кодкӧ прӧститны мыжъяс?» 8Исуслӧн лолыс дзик пыр тӧдмаліс налысь мӧвпъяссӧ. Сійӧ шуис: «Мыйла ті мӧвпаланныд тадзи? 9Мый кокньыдджык шуны вӧрзьӧдчыны вермытӧмлы: ”Тэнсьыд мыжъястӧ прӧститӧма” либӧ ”Чеччы, босьт вольпасьтӧ да ветлы”? 10Ӧні ті тӧдмаланныд, мый Морт Пи вермӧ прӧститны мыжъяс му вылын». Сэсся Исус шуис висьысьлы: 11«Тэныд шуа: чеччы, босьт вольпасьтӧ да мун гортад». 12Сійӧ дзик пыр чеччис, босьтіс вольпасьсӧ да ставныслӧн син водзын петіс. Йӧзыс шензьӧмӧн ошкисны Енмӧс да шуалісны, татшӧмсӧ пӧ ми эгӧ на аддзылӧй.

Левийӧс корӧм

(Мт. 9:9-13; Лк. 5:27-32)

13Исус бара муніс ты дорӧ. Йӧзыс ставныс локтісны Сы дінӧ, и Сійӧ велӧдіс найӧс. 14Сэтысь мунігас Исус аддзис Алфей Левийӧс, коді пукаліс вотчукӧртанінын. Исус шуис сылы: «Лок Ме бӧрся». Сійӧ чеччис да муніс Исус бӧрся.

15Исус сёйӧ вӧлі Левий ордын. Сэні Исускӧд да Сылӧн велӧдчысьяскӧд сёйисны тшӧтш вот перйысьяс да мукӧд мыжа йӧз. Унаӧн на пиысь вӧліны Исус бӧрся мунысьяс. 16Индӧдӧ велӧдысьяс да фарисейяс аддзисны, мый Исус сёйӧ мыжа йӧзкӧд да вот перйысьяскӧд. Найӧ юалісны Исуслӧн велӧдчысьяслысь: «Мыйла Сійӧ сёйӧ-юӧ вот перйысьяскӧд да мыжа йӧзкӧд?» 17Исус кыліс тайӧс да шуис налы: «Дзоньвидзалы бурдӧдысьыд оз ков, сійӧ висьысьлы колӧ. Ме локті корны Ен дінӧ мыжаясӧс, эг веськыда олысьясӧс».

Видзалӧм йылысь юалӧм

(Мт. 9:14-17; Лк. 5:33-39)

18Иоанлӧн да фарисейяслӧн велӧдчысьясыс вӧлі видзалӧны. Йӧзыс локтісны Исус дінӧ да юалісны: «Иоанлӧн да фарисейяслӧн велӧдчысьяс видзалӧны, а Тэнад велӧдчысьясыд мыйла оз?» 19Исус вочавидзис: «Вермӧны-ӧ видзавны кӧлысь вылын верӧспукӧд гажӧдчысь ёртъясыс? Верӧспуыс кӧ накӧд, найӧ оз вермыны видзавнысӧ. 20Воасны на сійӧ лунъясыс, кор колясны верӧспутӧг, сэки и видзаласны.

21Важ паськӧмтӧ оз дӧмны выль дӧра дӧмасӧн. Тадзи кӧ вӧчан, выль дӧмас дортіыс нёйдас-косяссяс паськӧмыд, розьыс ёнджыка на ыдждас. 22Выль винатӧ оз кисьтны важ кучик дозйӧ. Тадзи кӧ вӧчан, кучик дозйыс потас, и винаыс киссяс. Выль винатӧ кисьтӧны выль кучик дозйӧ».

Шойччан лун йылысь

(Мт. 12:1-8; Лк. 6:1-5)

23Шойччан лунӧ Исус мунӧ вӧлі нянь муяс вомӧн. Сылӧн велӧдчысьясыс мунігмозныс пондісны нетшкыны шепсӧ. 24Фарисейяс шуисны Исуслы: «Видзӧдлы, мый Тэнад велӧдчысьясыд вӧчӧны! Тайӧс оз позь вӧчны шойччан лунӧ». 25Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд, а сёяныс налӧн эз вӧв? 26Авиатар аркирей дырйи сійӧ пырис Ен керкаӧ, сёйис вежа нянь да сетіс тшӧтш аслас йӧзлы. Тайӧ няньсӧ сӧмын попъяслы позис сёйны». 27Сэсся Исус шуис фарисейяслы: «Шойччан лунсӧ лӧсьӧдӧма мортлы, абу мортсӧ – шойччан лунлы. 28Та вӧсна Морт Пи шойччан лун вылын ыджыдыс».

Currently Selected:

Марк 2: КБ

Highlight

Copy