Матвей 4

Исус овтӧминын

(Мк. 1:12-13; Лк. 4:1-13)

1Та бӧрын Лов нуӧдіс Исусӧс овтӧминӧ, медым омӧльыс ыштӧдіс Сійӧс. 2Нелямын лун да нелямын вой видзалӧм бӧрын Исуслӧн кынӧмыс сюммис. 3Сэки Сы дінӧ локтіс ыштӧдысь да шуис: «Тэ кӧ Ен Пи, пӧрт тайӧ изъяссӧ няньӧ». 4Исус воча шуис: «Гижӧма: ”Оз куш няньӧн мортыд ов, а Енсянь быд шуӧм кывйӧн”».

5Сэсся омӧль нуӧдіс Исусӧс вежа карӧ, сувтӧдіс Сійӧс крам вевт вылӧ 6да шуис: «Тэ кӧ Ен Пи, шыбитчы увлань. Гижӧма ӧд: ”Аслас анделъяслы Сійӧ тшӧктӧ видзны Тэнӧ. Найӧ нуасны Тэнӧ ки выланыс, видзасны изйӧ крукасьӧмысь”». 7Исус воча шуис: «Гижӧма тшӧтш: ”Эн дӧзмӧд Господьӧс, ассьыд Ентӧ”».

8Омӧль бара вайӧдіс Исусӧс зэв джуджыд керӧс йылӧ да петкӧдліс Сылы таладор югыдсьыс став мусӧ, налысь мичлун-озырлунсӧ. 9Сэсся шуис: «Ставсӧ тайӧс сета Тэныд, копыртчылан кӧ меным». 10Исус шуис сылы: «Вешйы Ме дінысь, сӧтана! Гижӧма: ”Господьлы, аслад Енлы, копрась да сӧмын Сылы кесъяв”».

11Сэки омӧль эновтіс Исусӧс. Сэсся воисны анделъяс да кесъялісны Исуслы.

Исус вуджӧ Галилея муӧ

(Мк. 1:14-15; Лк. 4:14-15)

12Кор Исус тӧдмаліс Иоанӧс дзескыдінӧ йӧртӧм йылысь, муніс Галилеяӧ. 13Сійӧ колис Назарет карсӧ да овмӧдчис тыдорса Капернаум карӧ, Завулон да Неффалим муӧ. 14Тадзи иніс Исай пророклӧн шуӧмыс:

15– Завулон му, Неффалим му,

саридзбердса туй, Йӧрдан юсайса му,

мукӧд войтыра Галилея му!

16Пемыдын олысь войтыр яр биа югыд аддзис,

кулӧмыслӧн вуджӧр улын олысьяслы югыд кыа петіс.

17Тайӧ кадсяньыс Исус пондіс юӧртны-висьтавлыны: «Бергӧдчӧй мыжъяссьыныд! Енэжвыв Юралӧмыс матын».

Медводдза велӧдчысьяс

(Мк. 1:16-20; Лк. 5:1-11; 6:17-19)

18Галилея ты пӧлӧн мунігӧн Исус аддзис кык вокӧс: Симонӧс, кодӧс нимтісны Петырӧн, да сылысь Ӧндрей воксӧ. Найӧ вӧліны чери кыйысьяс. Кык вок буретш вӧйтасисны ты вылын. 19Исус шуис налы: «Локтӧй Ме бӧрся. Ме вӧча тіянӧс морт кыйысьясӧн». 20Кык вок дзик пыр эновтісны тывъяснысӧ да мунісны Исус бӧрся.

21Исус муніс водзӧ да аддзис мӧд кык вокӧс: Яковӧс да Иоанӧс. Зеведей батьныскӧд найӧ пыжын дзоньталісны тывъяс. Исус чукӧстіс вокъясӧс. 22Найӧ дзик пыр колисны пыжсӧ, батьнысӧ да мунісны Исус бӧрся.

23Исус ветлӧдліс Галилея му пасьтала. Сійӧ велӧдіс синагогаясын, висьтавліс Ен Юралӧм йылысь Евангелльӧ да бурдӧдаліс йӧзӧс быд висьӧм-доймӧмысь. 24Сы йылысь юӧрыс разаліс Сирия му пасьтала. Исус дінӧ вайӧдлісны быдсикас висьысьӧс-вермытӧмӧс, пеж лолӧн кутӧмаясӧс, шыблалан висьӧмӧн висьысьясӧс, ки-коксӧ вӧрзьӧдны вермытӧмъясӧс. Сійӧ быдӧнӧс бурдӧдіс. 25Исус бӧрся муніс зэв уна йӧз. Найӧ вӧліны Галилеяысь, Даскарысь, Иудеяысь, Ерусалим карысь да Йӧрдан ю сайысь.

Currently Selected:

Матвей 4: КБ

Highlight

Copy